Jonas 1 - Biblia ande chib Romani

O Jonas nasel katar o Del

¹ O Del dia orba e Jonasea, chavo katar o Amitai, ta phenda leke:

² Lla ando Ninive ta phen gole foroke kai ka zatriv le, soke e viasta katar leko bilachipe resli llik mande.

³ A o Jonas mangla te nasel katar o Del ta fulisto ando Jope, kote malada iek llimia kai lela te llaltar karing o Tarsis, ta pochinda te inllaren le incha.

⁴ A o Del cherda te phurdel iek balav but bari, ta vazdinailo ande mora iek bursin, gia baro kai mislina kai e llimia ka phagol.

⁵ E llene kai radina ande llimia merena daratar, ta suako iek molilape pe devleke. Ondaka, chudie ande mora sa o pharipe te achel mai lokhi e llimia. A o Jonas fulistoia kai si e soba katar e llimia, ta kote thodape te sovel.

⁶ Ondaka o gazda katar e llimia llelo kai o Jonas, ta phenda leke: ¿So chere kote, gia drago chuke te sove? ¡Uste ta molisao che Devleke! Sai avelpe kai ka thovel amenge sama ta ka cherel te na mera.

⁷ A e llene kai radina ande llimia phenena iek avereke: Chela amen te dikha ko si o dosalo katar gaia belava kai avila pe amende. Cheldepe, ta likista lenge kai o Jonas saia o dosalo.

⁸ Ondaka phende e Jonaseke: Phen amenge soke avila amenge gaia belava. ¿Ande so radi? ¿Katar ave? ¿Savi si chi phuv? ¿Katar savi vicha san?

⁹ Ondaka o Jonas phenda lenge: Me sem ebreo, ta blagosiv e Dele, o Del katar o miloso, kai cherda e mora ta e phuv.

¹⁰ Ta gola llene daraile but, ta puchena le soke cherda goia ezgoda, soke von llangle kai nasela katar o Del prema so vou phendaia lenge.

¹¹ Ta puchle le: ¿So ka chera tuia te achel e mora? Soke e mora ios mai divolpe.

¹² O Jonas phenda: Chuden man ande mora, ta e mora ka achel. Me llanav kai me sem o dosalo pala gava baro bursin kai avilo pe tumende.

¹³ E llene cherena zor e kastenchar ande mora te avel mai pase e llimia katar e phuv, ta nasti cherde le, soke e mora ios mai divolape.

¹⁴ Ondaka mangle katar o Del ta phende: Del, na muk amen te mera pala e dos gale lleneki. A te inai dosalo, na dosar amen katar leko meripe, soke tu chere e ezgode prema chi volia.

¹⁵ Samo phende gola alava, chudie e Jonase ande mora, ta e mora achili.

¹⁶ Kana dikhle gaia ezgoda, e llene kai radina ande llimia acharde e Dele ande po lio, ta cherde leke iek kurbano, ta jale leke sovel.

¹⁷ A o Del bichaldaia iek baro macho te nakhavel e Jonase. Ta o Jonas achilo trin llive ta trin racha andre ando macho.