Joel 3 - Biblia ande chib Romani

¹ Soke ande gola llivesa ka cherav te irinpe o Juda ta o Jerusalem katar e phuvia kai von sea phangle,

² ka chidav sa e phuvien ta ka cherav te llan ande bari umal katar o Josafat, kote ka krisiv len katar so cherde me foroke o Israel. Soke rispisisarde len maskar sa e phuvia ta fulade maskar pete mi phuv.

³ Cheldepe te sai fulaven me foro, die e minonen pala iek kurvichka, bichinde e chorren te sai pien mol.

O Del krisil e phuvien

⁴ ¿So mangen mandar tumen, Tiro ta Sidon ta sa e Filistea? ¿Mangen te ikanen tumari duk pe ma? A te cherena le, me ka cherav te perel pe tumare sore.

⁵ Soke inllarden mo rup, mo sunakai ta me ezgode sukar te thoven len ande tumare delenge chera,

⁶ ta e chaven katar o Juda ta katar o Jerusalem bichinden len e griegonenge te durion katar pi phuv.

⁷ A me ka ikanav len kotar katar bichinden len, ta tumaro pochindipe ka perel pe tumare sore,

⁸ ta ka bichinav tumare minonen, ta von ka bichinen len e sabeonenge kai lengi phuv si but dur. Me o Del phenav le.

⁹ ¡Phenen gava e phuvienge! ¡Phenen kai si maripe! ¡Llungaven e murusen tromane! ¡Te aven sa e murusa marimake!

¹⁰ Te cheren jarnie katar tumare ezgode te radin e phuv, ta cheren lanse katar e churia bangarde kai chinen o lliu. Te phenel o lleno kai inai le zor: Zuralo sem.

¹¹ Sa e phuvia kai si truial ¡Sigaren te chidiniaon! ¡Devla, cher te aven kote che llene zurale!

¹² Te lachardon e phuvia ta te llan karing e bari umal katar o Josafat, soke kote ka krisil o Del sa e phuvien kai si truial.

¹³ Thoven e jarnie bangarde, soke si but o lliu kai barilo. Aven te dikhen e drakha kai si but. Ustaven len te sai cheren e mol, soke lengo bilachipe si but.

¹⁴ But forura chidinaile ande bari umal katar e Kris, soke si pase o llive e Devleko.

¹⁵ O kham ta o chon kacherdon truniariko ta e cheraia ni ka klichin.

¹⁶ Ta o Del ka basel katar o burdo o Sion, katar o Jerusalem ka asundol leko avazi ta ka dermolpe o miloso ta e phuv, a o foro katar o Israel ka uzdilpe ando Del ta o Del ka avel leki zor.

E dragostia kai ka avel e Judaeke

¹⁷ Ta ka pinllaren kai me sem tumaro Del kai ziviv ando Sion, mo santo burdo. Ta o Jerusalem ka avel santo, nikada ios ni ka nakhen letar e llene kai inai katar o Israel.

¹⁸ Ande gua llive e mol ta o thud ka chordon sargo o pai pe burdura, ta ande sa e paiorra katar o Juda ka avel but pai. Ande mo cher ka avel iek bunari, ta leko pai ka chingarel sa e bari umal katar o Sitim.

¹⁹ O Ejipto ka avel zatrime, ta o Edom ka achel pusto, pala o kojaipe kai ikande pe chaurre katar o Juda, soke ande lengi phuv mundarde bute llenen lache.

²⁰ A ando Juda ta ando Jerusalem suako drom ka zivin llene ande lende.

²¹ Ka chistou o rat katar e llene kai ni chistosardem, ta o Del ka zivil ando Sion.