Joel 2 - Biblia ande chib Romani

¹ Basalen e tuturuga ando Sion, urkisaren pe mo santo burdo. Te izdran daratar e llene katar o Juda, soke avel o llive e Devleko,

² iek llive kai si samo truniariko, iek llive katar oblakura ta e senke. But boñikura kai si zurale, foro baro ta zuralo sargo kana likel o kham pe burdura Nikada ni dikhile llene sargo von, ta nikada ni ka dikhon pale.

E langoste den ande phuv

³ Von si sargo e iag kai jal sa. Mai anglal te nakhel, e phuv si sargo o vostano katar o Eden angla le, ta kana nakhel e phuv achel sargo o pusto. ¡Niko nasti nasel letar!

⁴ Dikhol sargo gra, prastel sargo llene kai llan pe gra,

⁵ ta kana jutel pe burdura asundol sargo kana aven bordona marimake, basen sargo e patra suke kana phabon. Von si sargo but boñikura zurale kai lachardon e marimake.

⁶ E llene daran kana dikhen len, ta lenge muia achen parrne.

⁷ Sargo murusa tromane, prasten, liken pe zidura ta llan angle ta llan orta pe po drom.

⁸ Ni ka ustavel iek avere, suako iek llal pe po drom, ta te perena po jarni ni ka ranimpe.

⁹ Ka llan ando foro, ka prasten pe zidura, ka den ande chera ta sargo e chorane, ka den katar e penllerave.

¹⁰ Angla le e phuv dermolpe, dermolpe o miloso, o kham ta o chon ka cherdon truniariko ta e cheraia ni ka klichin.

¹¹ Ta o Del angla pe boñikura ka del orba sargo girmipe. Leke boñikura si but, gachin kai nasti llindon, ta cheren so phenel o Del. ¡Gia baro ta darano si o llive e Devleko! ¿Ko sai terpil le?

E zalba e Devleki

¹² A akana, phenel o Del, irin tumen mande sa tumare liea, ando alluno ta ando roipe.

¹³ Irin tumen kai o Gazda tumaro Del. Pharraven tumaro lio na tumare patave, soke o Del si pherdo zalba ta ni joliaol oma, inai leke drago kana dukhavel, ta suako drom prostil.

¹⁴ Sai avel kai ni ka dukhavel tumen ta ka blagosil tumen ando lliu ta ande mol, te sai den ofrende e Gazda tumaro Del.

¹⁵ ¡Basalen e tuturuge po burdo katar o Sion! ¡Chidiniaon te cheren alluno!

¹⁶ Chiden e foro e Devleko ta chinaven le e Devleke. Chiden e phuren ta e minonen, ta i e minonen kai pien kolin. ¡Te liken katar pi soba e bori ta o terno kai zinisaile!

¹⁷ Te roven e popura kai radin e Devleke, te phenen maskar o than kai delpe andre ta o altar: Prostisar Devla che foro, na muk te maren espurnia katar che llene, te na gazdarin pe lende aver phuvia, te na phenen e llene kai blagosin avere delen: ¿Kaitalo lengo Del?

¹⁸ Ta o Del ka sikavel po volipe pala pi phuv ta ka prostil pe foro.

¹⁹ Ta ka vacharel pe foroke: Ka dav tut o lliu, e mol ta o zeitino, lligo ni ka achen chalie, ta nikada ios ni ka mukav te maren espurnia tumendar aver phuvia.

²⁰ Ka cherav te durion tumendar e langoste kai aven katar o norte, ta ka chudav len po pusto. E boñikura kai llana anglal ka tasavav len ande Mora e Muli, ta e boñikura kai llana palal ka tasavav len ande mora katar o Mediterraneo, lenge esnage ka chernion ta ka khanden, soke cherde bare ezgode.

²¹ Veselisao phuv ta na dara, soke o Del ka cherel bare ezgode.

²² Na daran tumen zivirinie dive soke pale ka barion e patra po pusto, ta e kasta pale ka den pe septelie, ka aven but simochine ta drakha.

²³ Ta tumen chavalen katar o Sion, veselin tumen ando Gazda tumaro Del, soke dia tumen o purvo bursin ta o duito bursin ando vreme kana si te del peke, ando viend ta kana o milai si pase, isto gia sar cherela le omanglal.

²⁴ Ka chiden but lliu ta but mol ta zeitino.

²⁵ Me pale ka dav tumen sa e bursa kai jasaile pala e zatrania kai ande o chermo ta e langoste, me boñikura kai bichaldem pe tumende te zatrin tumen.

²⁶ Tumen ka jan lligo ni ka achen chalie, ta ka blagosin e Gazda tumaro Del, kai cherda bare ezgode tumenge, Ta nikada ios ni ka jal lallao mo foro.

²⁷ Ta tumen e israelitura ka pinllaren kai maskar o Israel sem me, ta kai me, o Gazda o Del, sem tumenchar ta inai aver. Ta nikada ios mo foro ni ka jal lallao.

Avel o duo e Devleko

²⁸ Mapalal katar gale ezgode, ka dav mo duo sa e llenen, ta tumare chave ta chorra ka poraukin, e phure ka dikhen sune, a e terne ka dikhen sargo sune.

²⁹ Ta i ande gola llivesa ka dav mo duo e slugen murusa ta e slugen diskinie.

³⁰ Ta ka cherav bare ezgode Devlikane ando miloso, ta pe phuv, rat, iag ta thuv.

³¹ O kham ka cherdol truniariko, ta o chon sargo rat, mai anglal te avel o llive e Gazdako, o llive baro ta darano.

³² Ta suako lleno kai ka ikharel o anav e Devleko ka avel braduime, soke po burdo o Sion, ta ando Jerusalem ka avel o braduipe, isto gia sar phenda le o Del, ta maskar lende gola kai achile.