Joel 1 - Biblia ande chib Romani

E langoste jan o lliu

¹ O alav e Devleko kai avilo e Joeleke, chavo katar o Petuel.

² Asunen tumen e phure, ta sa tumen e llene kai zivin ande phuv. ¿Dikhlen fisavi drom gaia ezgoda? ¿Dikhle la tumare purane?

³ Phenen le tumare chavenge, a tumare chave te phenen le pe chaurrenge, ta lenge chaurre te phenel le ogole vichake.

⁴ So ni jala o chermo, jala le e langoste ta so mukle gola langoste, avile aver langoste ta jale le.

⁵ ¡Usten tumen e matarne, ta roven! ¡Thoven te roven tumen kai pien mol, soke ka len katar tumaro mui e mol!

⁶ Soke iek foro baro kai nasti llindol dia ande murni phuv, leke danda si danda lionoke, ta leke tharia si tharia lionoke.

⁷ Zatrisarda me vostanura drakhake, chinda mo kas simochinengo jaliarda leke krangura lligo ni achile parrne.

⁸ Rov sargo bori kai thovel pe pete patave zalosne soke mulo lako terno kai saia te zinilpe laia.

⁹ Ni dikhol ios e ofrenda ta e ofrenda moliaki ando cher e Devleko, e popura kai radin e Devleke si zalosne.

¹⁰ E umalia si zatrime, e phuv si zalosni soke jasailo o lliu e vostanura drakhake sukile jasailo o zeitino.

¹¹ Tumen kai radin ande umalia ta ande vostanura drakhake, roven tristomaia, soke jasaile e simiche ta jasailo o lliu ta e sebada.

¹² Sukile e vostanura drakhake ta jasaile e kasta simochinenge. Sukile e granade, e palmere ta e kasta e phabaiake, sukile sa e kasta katar e umalia. ¡Gia jasaili e veselia katar sa e llene!

¹³ Tumen e popura kai radin ando altar, thoven pe tumende patave zalosne ta roven dukhaia, soke ando cher tumaro Devleko inai lliu ta mol te den ofrenda, ta ofrenda moliaki.

¹⁴ Ikharen te chidiniaon e llene ta te cheren alluno, chiden ando cher e Devleko e poponen ta sa e llenen katar e phuv, ta ikharen e Devle.

¹⁵ ¡Ioi o llive e Devleko si pase! Llive kai anel e zatrania katar e Del kai si le sa e zor.

¹⁶ ¿Ni lie amaro jape angla amare akha, ta inai ios e veselia ando cher e Devleko?

¹⁷ E simicha muli ande phuv, jasailo o lliu e chera kai gurudol o lliu si sa peradine.

¹⁸ ¡Sar basen e zivirinie! E guruva roden char samo gia ta e bakre meren soke inai char.

¹⁹ Me ikharav tut Devla, soke e iag phabarda e char ta e kasta kai sea ande umalia.

²⁰ Ta i e zivirinie dive ikharen tut, soke sukile e paia ta e iag phabarda e patra zelene.