Job 9 - Biblia ande chib Romani

Job

¹ Ondaka o Job phenda:

² Chachimaia me llanav kai gia si. ¿A sar ka chacharelpe o manus e Devlea?

³ Soke te mangea te dobi e Devle pe iek orba, ande milia, ni ka phene iek alav.

⁴ O Del si but bizai ta but zuralo, ¿Ko zurailo ta dobisarda e Devle?

⁵ Vou chirdel ta ikanel e burdura pe jolinaia, ta niko ni llanel ko cherda le.

⁶ Vou miskol e phuv katar po than, ta dermol la llik telal katar lake barra.

⁷ Vou phenel e khameke, ta o kham ni likel, ta ucharel e cheraia te na klichin.

⁸ Vou korkorre buliarda o miloso, ta llal upral pe valura e morake.

⁹ Vou cherda e sa e cheraia, vou cherda e cheraia kai ikhardon Osa ta o Orion, gola kai si chidine ande iek than ta gola katar o sur.

¹⁰ Vou cherel ezgode bare kai niko ni acharel, ta glamne bi llinde.

¹¹ Vou ka nakhel angla mande ta ni ka dikhav le, ka nakhel ta ni ka acharav.

¹² Te lel vareso, ¿ko ka cherel le te thovel pe po than so lia? ¿Ko ka phenel leke: Soke chere goia ezgoda?

¹³ O Del ni ka del palpale pi joli, tala le peren gola kai pomozin e llenen kai istardon.

¹⁴ ¿A sar ka malavav alava te dobiu e Devle?

¹⁵ I te avava chacho, ni phenava niso, soke vou si mo krisari, ta mai anglal molivaman leke.

¹⁶ I te ikharava le ta te del anglal, ni gia ni ka pachav kai asunda mo avazi.

¹⁷ Soke dukhada man zurale, ta bariarda me rane pala niso.

¹⁸ Pherda zalba mo zivoto ta ni mukla man te lav mange duo.

¹⁹ Ta da orba katar leki zor, vou si zuralo, a te da orba katar e kris, ¿Ko ka phenel leke te avel pe kris?

²⁰ Te chacharava me man, sai dosarel man mi chib, a te phenav kai sem orta, avava dilo.

²¹ Te na avilema dosalo, ni thodema sama me mange ta murzisardema pe mo zivoto.

²² Samo iek ezgoda achel man te phenav: O Del zatril e llene kai si orta ta i e bilache.

²³ Te si iek bari belava ta meren llene bidosale, vou asal katar e duk kai nakhen.

²⁴ E phuv si dini ande va katar e bilache llene, ta ucharel o mui katar lenge krisaria, te inai o Del, ¿ko sai avel?

²⁵ Mo zivoto nakhel but zurale, llelotar mandar bi te dikhel o lachipe.

²⁶ Nakhlo sargo e llimie ka llan zurale, sargo e agila kai perel upral pe izivirinia kai ka jal.

²⁷ Te phenava: Ka bristarav man katar mo roipe, ka lav mandar e zalba ta ka thovav sa mi zor.

²⁸ Ni muken man sa me dukha, ta llanav kai chuke ni ka avav bidosalo.

²⁹ Te sem bilacho, ¿Soke ka radiu samo gia?

³⁰ I te jalavav man ando pai o mai chisto, ta te jalavav me va ando mai baro chistope,

³¹ Isto gia tu ka chude man ando glibo, ta isto me patave ka gadonpe mandar.

³² Soke vou inai manus sargo me, te de le anglal, ta te llal manchar pe kris.

³³ Inai maskar amende iek krisari te krisil amen,

³⁴ te lel mandar e duk kai del man, ta te na daravel man leki dar.

³⁵ Ondaka ka dav orba ta ni ka darav letar, soke gia sar sem, ni sem me.