Job 6 - Biblia ande chib Romani

Job

¹ Ondaka o Job phenda:

² ¡Ioi, te sai phariadol mo roipe ta mi duk, ta te vazden len ta te phariaven len!

³ Avena mai phare neko e chisai e moraki. Goleke diem orba sa me liea.

⁴ Soke o Del kai si le sa e zor chudia ande mande pe llide, ta lengo drab kai mundarel llal ande mi esnaga, ta avel pe mande e dar katar o Del.

⁵ ¿Basel o magarcho katar o burdo pasa e patra? ¿Basel o guruv pasa e cher?

⁶ ¿Sai jalpe so si cherko bi te thove lon? ¿Si guglo o parrnipe katar o arrno?

⁷ So ni kamama ni te dodiu, akana si mo jape.

⁸ ¡Daboida te del man o Del so mangav, ta te cherel mange so zeliu!

⁹ ¡Daboida te mangel o Del ta te zatril man te mukel po va pe ma ta te mundarel man!

¹⁰ I te dukhavel man zurale, avela mange iek lachipe, soke me cherdem so phenen e zakonura katar o Santo.

¹¹ ¿Savi si mi zor te aduricharav llik akana? ¿Savo ka avel mo son kai terpiu gachin?

¹² Mi zor inai barrustuni, ta mi mo mas inai tuchno.

¹³ Nasti arakhav me man, ta inai man ko te pomozil man.

¹⁴ O amale kai si dukhado trubul te voli le i te na kandia e Devle.

¹⁵ A tumen kai sen me amal pharrudon sargo iek len, sargo iek pai kai nakhel zurale,

¹⁶ kai si telal katar o ledo ta uchardo katar o iv,

¹⁷ kai bilaon ta kana cherel tatipe ta kana taton ni dikhon ios.

¹⁸ Den avrial katar ta liken katar po drom mapalal sukon ta jasaon.

¹⁹ Rodena len e llene kai phiren katar o Teman, ta gola kai phirena katar o Saba aduricharena len.

²⁰ A jale lallao kai aduricharena len soke avile llik lende ta ni llanena so ka cheren.

²¹ Akana tumen sen mange sargo von soke dikhen e duk ta daran.

²² Me ni manglem tumendar te braduin man tumare lovenchar,

²³ o te kurtulin man katar iek dusmano, ni te pochinen te muken man e llene silne.

²⁴ Sikaven man, ta ka achav, sikaven mange ande so kojadilem.

²⁵ ¡Gia gugle si e alava chache! A tumen ¿Soke dosaren man bi te avav dosalo?

²⁶ ¿Tumen den me orbe pala o dilipe kai phendem ande mi duk kana gola alava inllarel len e balav?

²⁷ ¡Ta i tumen sai bichinen o zivoto katar o bidadeko ta anaven iek limori tumare amaleke!

²⁸ Akana te mangena, dikhen pe mande, ta phenen mange pe mo mui dal kojavav.

²⁹ Pharruven so phenden ta na mislin o bilachipe, mislin chachimaia kai ni sem dosalo.

³⁰ ¿O mislin kai me alava si kojamne? ¿Ta kai ni llanav save alava si bilache?