Job 5 - Biblia ande chib Romani

¹ Akana urkisar, ta dikha ko ka del tut anglal. ¿Kai savo suecho ka lla?

² Chachimaia e dile mundarel le e joli, ta gua kai merel pala e love zatril le e joli kana avere si.

³ Dikhlem sar o dilo barvaol ta isto kote proketisardem leko cher.

⁴ Leke chaurre ka aven dur ta ni ka avel ko te pomozil len ta te arakhel len, po udar ka aven zatrime ta ni ka avel ko te braduil len.

⁵ E llene bokhale ka den ande lenge umalia katar so dia len e phuv ka jan e bokhale ta ka ikanen le maskar e karrne, ta e trusale ka phagen pi trus ande lengo barvalipe.

⁶ Soke e duk ni likel katar o prajo ta ni chiñipe ni likel katar e phuv.

⁷ Soke isto gia sar liken e lliske katar e iag, isto gia liken amendar e dukha.

⁸ Te avilema pe cho than, rodiema e Devle ta muklema ande leke va mo zivoto,

⁹ ¡Soke vou cherel ezgode bare kai niko nasti mislilpe ande lende ta ezgode glamne kai si billinde!

¹⁰ Kai bichalel o bursin pe phuv, ta bichalel e paia pe umalia.

¹¹ Vou bariarel e chorren zor ta vazdel e llenen kai si zalosne.

¹² Vou phagel e mislura katar o llanglo te na cherel niso pe vastenchar.

¹³ Vou phandel e bizaien isto ande lengo bizaipe ta phagel lenge bilache mislura.

¹⁴ Cherel te eskonban ollivesea sargo kana si ando truniariko ta ande desudui e lliveseke, llan pipindo sargo kana si orachaia.

¹⁵ Gia braduil e llenen kai si chorre katar e llene kai si bilache ta silne,

¹⁶ vou si so aduricharen e chorre, ta phandel e bilachengo mui.

¹⁷ Blagosime o lleno kai dukhavel le o Del, goleke thoven sama kana sikavel tumen o Del kai si le sa e zor.

¹⁸ Soke vou dukhavel, ta isto vou lel e duk. Vou chalavel, ta pe vastenchar sastarel.

¹⁹ Ande sov nuzde ka braduil tut, a kai e efta ni ka avel pe tute o bilachipe.

²⁰ Kana ka avel e bok ka braduil tut te na mere, kana ka marenpe ka braduil tut katar o jarni.

²¹ Ka braduil tut katar e orbe, ni ka dara kana ka avel e zatrania.

²² Ka asa katar e bok ta katar e zatrania, ta ni ka dara katar e zivirinie dive.

²³ Ni ka aven barra pe cho drom, ta e zivirinie dive ka aven che amal.

²⁴ Ka llane kai si pas ande chi chara. Ta kana ka ave chere sa che ezgode ka aven isto kote.

²⁵ Ta ka dikhe sar cho porodo ka avel but, sargo e char kai si pe umalia.

²⁶ Kana ka phurio ta ka mere ka ave sargo o lliu kai chinenle kana si reslo.

²⁷ Sa gala ezgode dikhlam, ta gia si, asun len ta sikiu lendar.