Job 41 - Biblia ande chib Romani

¹ ¿Ka istare tu e Leviatane iekhe udichaia, o ka istare le e chibatar iekhe solea?

² ¿Ka nakhave katar lako nak iek solo? ¿Ka jirave leke chama iekhe zichaia?

³ ¿Tu misli kai ka molilpe chuke? ¿Tu misli kai ka del tuia orba lachimaia?

⁴ ¿Tu misli kai ka del tut po alav te avel cho sluga ostade?

⁵ ¿Ka cheletut lea sargo iekhe chirikliaia, o ka phande le te chelenpe lea che chorra?

⁶ ¿Ka chere letar iek jape che amalenge? ¿Ka fulave kote kai chinen ta bichinen?

⁷ ¿Ka chine tu leko mas e churiaia, o ka jirave leko soro iekhe kastea?

⁸ Thou cho va pe lete ta ka de tut golli katar maripe kai ka del tut ta nikada ni ka cherele pale.

⁹ Niko nasti uzdilpe te istarel le soke samo te dikhe pe lete ka baldi tut daratar.

¹⁰ Niko inai gia tromano te llungavel le, a te si gia, ¿Ko ka thovelpe angla mande?

¹¹ ¿Ko dia man vareso te sai iriule leke? Sogo si pe phuv telal katar o kham si murno.

¹² Si man but te phenav katar leki esnaga, katar leki zor ta gia glamno dikhol vou.

¹³ ¿Ko sai thovelpe angla le? ¿Si vareko tromano te achavel le?

¹⁴ ¿Ko sai putarel leko mui kana leke danda cheren te izdra daratar?

¹⁵ Leki esnaga si pherdi kore lipime iek pe aver ta zurale sargo barr.

¹⁶ Gia lipime si e kore kai e balav ni del maskar lende.

¹⁷ Lipime si iek pe aver, istarde si maskarpe ta nasti putaon.

¹⁸ Kana del chi a iag phabol, a leke akha si sargo o kham kana llivosaol.

¹⁹ Katar leko mui liken plamekura, ta juten lliske phabarde.

²⁰ Katar leko nak likel thuv, sargo katar iek kavi kai chirol.

²¹ Leko aburo phabarel e angara, ta katar leko mui liken plamekura.

²² Ande leki korr si leki zor, kogo dikhel le merel daratar.

²³ Leko mas kai dikhol kovlo, si zuralo sargo o sastri ta ni miskolpe.

²⁴ Leko lio si zuralo sargo iek barr, chapeno sargo o barr kai moren lea.

²⁵ E llene zurale daran katar leko baripe ta angla le jasaren e zor ta nasen.

²⁶ A te istarel le vareko, nasti ka jiravel le o jarni, ni e lansa, ni e llide bare ta ni e llide minone ni.

²⁷ O sastri si leke sargo e char suki, a e ezgode tuchne sargo iek kas cherno.

²⁸ Ni nasel katar e llide, e barra kai chuden ande lete si leke sargo char suki.

²⁹ E ezgode kai marenpe lenchar lea, si leke sargo patra suke.

³⁰ Pe leko lli si thule kore kai kana terrilpe, putarel o glibo sargo kana putaren e phuv te thoven e simiche.

³¹ Cherel te chirol e mora chak andral, cherel la sargo iek kavi kai chirol.

³² Pala pe mukel iek sivka parrni kai klichil sargo e bal parrne.

³³ Pe phuv inai niko sargo vou, iek zivirinia kai ni daral nikatar.

³⁴ Ni chitilpe leke ni iek ezgoda bari, vou si charo pe sa gola kai istardon.