Job 4 - Biblia ande chib Romani

E purvi orba katar but orbe Elifas

¹ Ondaka o Elifas o temanita phenda:

² Te zumava te da tuia orba sai te na avel chuke drago a ¿ko sai achavel e alava?

³ Tu kai sikavea bute llenen ta dea zor gole kai ni saia kovlo,

⁴ Che alava vazdena golen kai perena ta zuriarela e porrne kai ni saia len zor,

⁵ a akana kai avila pe tute o bilachipe, ¿jasare e zor ta ni llane so ka cher?

⁶ ¿Ni uzdi tut ando liubao kai de e Devle? ¿Ni adurichare e Devletar pala o drom orta kai phire?

⁷ Mislisao orta, ¿savo lleno chacho jasailo? O ¿kai avile zatrime e llene orta?

⁸ Prema so dikhlem pe mo zivoto, ko cherel o bilachipe, lel o bilachipe ta lel prema so cherda omanglal.

⁹ E Devleko aburo del pe lende ta meren, phurdel jolinaia pe lende ta zatrinpe.

¹⁰ E lionura kai basen ta e danda lenge minonenge phagon.

¹¹ O liono phuro inai le so te jal, ta e minone katar e liona rispinpe.

¹² Goia ezgoda saia mange gurudini, a asundem ta achardem latar vareso.

¹³ Kana misliu man ta dikhav ande sune kana e lindri perel pe manusa,

¹⁴ avila mange iek bari dar ta lia man iek izdrape.

¹⁵ Iek balav nakhli pe mo mui ta vazdinaile e bal pe mande.

¹⁶ Thodape angla mande iek manus, kai ni phinllardem leko mui, ta ni asundola niso, ta asundem kai phenela:

¹⁷ ¿Sai avel o manus chacho angla o Del? ¿Sai avel o manus mai chisto neko gua kai cherda le?

¹⁸ Ni ande gola kai radin leke ando miloso o Del ni uzdilpe ande lende, ta dikhla kai ni von inai but chache,

¹⁹ a sar ka uzdilpe ande gola kai zivin ande chera chikake kai si thode po prajo, ta kai ka aven zatrime sargo e papuruga.

²⁰ Maskar e thiarin ta e riat si zatrinpe ta jasaon ostade, ta inai niko te thovel lenge sama.

²¹ Lengo sukaripe llaltar lenchar ta meren bi te sikon o bizaipe.