Job 3 - Biblia ande chib Romani

O Job del orba katar pi belava

¹ Ondaka o Job proketisarda o llive kai biandilo.

² Dia orba ta phenda:

Job

³ Proketime te avel o llive kai biandilem ta e riat kai phende: ¡Murus si!

⁴ Daboida te avel gua llive truniariko, te na arakhel le o Del upral ta te na avel le villelo.

⁵ Te gadol le o truniariko ta e senka e merimaki te aven pe lete e oblakura ta te cheren le gado ta truniariko.

⁶ Te avel ande goia riat samo o truniariko, te na llinen le ande llivesa katar o burs, ni ande llivesa katar e chona.

⁷ ¡Ioi te avilia iek riat pusti, te na avilaia llilabipe veselo ande late!

⁸ ¡Te avel proketime gua llive katar gola kai cheren te llungadol o Leviatan!

⁹ Te na klichisardea e cheraia katar goia thiarin, te na aviloia o villelo katar gua llive ta te na dikhiloia sar pharron e zore e lliveseke.

¹⁰ ¡Proketo te avel goia riat kai mukla man te biandivav ta kai ni phangla me akha te na dikhav o chorripe!

¹¹ ¿Soke ni mulem kana sema ande me dako lli, o te mulema kana biandilem?

¹² ¿Soke aduricharena gola changa ta gola kolina te piav lendar kana biandilem?

¹³ Te na biandilema ondaka, akana sovtema esmiro ta avilema mulo,

¹⁴ e charonenchar ta e glamne llenenchar katar e phuv kai vazden peke katar o phagipe bare chera,

¹⁵ ta golenchar kai gazdarin kai saia len sunakai, ta pherena rup pe chera.

¹⁶ ¿Soke ni prajosarde man sargo iek baiato kai merel, sargo e minone kai meren mai anglal te biandon?

¹⁷ Kote e bilache llene ni izdran ios, ta kote lelpe o chiñipe katar e llene chinie,

¹⁸ kote malaven e pas e llene phangle, ta ni asunen ios o avazi katar o gazda,

¹⁹ kote si bare ta i minone sargo iek, ta o sluga si mukliardo katar po gazda.

²⁰ ¿Soke dikhen o villelo gola kai si dukhade? ¿Soke del zivoto golen kai zivin ande nuzda

²¹ ta aduricharen o meripe ta ni meren, ta roden o meripe sargo kana si iek barvalipe?

²² Kai veselinpe zurale, ta si lengi dragostia kana meren ta llan ando limori.

²³ ¿Soke del zivoto e golen kai ni llanel katar te llan, ta o Del phandel lenge o drom?

²⁴ Soke mo jape si mi duk ta mo pipe si mo roipe.

²⁵ Soke e dar kai saia mange avili pe mande, ta nakhav e ezgode kai darava.

²⁶ Inai man sar te lelpe mandar o chiñipe, inai man pas ta avile pe mande e brige.