Job 21 - Biblia ande chib Romani

Job

¹ Ondaka o Job phenda:

² Thoven sama so ka phenav tumenge, a golea ka den man zor.

³ Terpin mange ta ka dav orba, ta kana ka gotoviu mi orba, maren mandar espurnia.

⁴ Me ni dav orbe iekhe manusea, me dav orba e Devlea, goleke sem gia izdramno.

⁵ Dikhen pe mande, ta daran, ta ucharen e vastea tumaro mui.

⁶ Kana dav man golli, isto me chudiu man, ta izdral pe mande mo mas.

⁷ ¿Soke zivin e llene bilache, ta phurion, ta i cherdon ios mai barvale?

⁸ Dikhen sar bariol zuralo lengo porodo, ta sar lenge minone barion angla lenge akha.

⁹ Inai pe ni iek dar lenge chera ta o Del ni dukhavel len.

¹⁰ Lenge guruva si len minone, ta lenge minone ni biandon mule.

¹¹ Liken lenge minone sargo stoka ta lenge minone prasten ta juten.

¹² Basel o tambor ta o salterio, a von juten ta veselinpe kana basel o firo.

¹³ Zivin ando lachipe, ta meren ande pas.

¹⁴ Ta phenen e Devleke: Duriu amendar, soke ni kama te kanda tut.

¹⁵ ¿Ko si o Del kai si le sa e zor, te radi leke? ¿Ta so ka dobi te moli amen leke?

¹⁶ Lengo lachipe inai ande lenge va, ta lengi orba si dur mandar.

¹⁷ ¿Gachin droma mundardol lengi lampara, ta avel pe lende lengi belava, ta o Del ande pi joli bichalel lende e duk?

¹⁸ Ka aven sargo e char suki ta sargo o prajo kai inllarel len e balav.

¹⁹ O Del ka guruvel lenge chaurrenge po silnope, ka pochinel lenge te sikon.

²⁰ Ka dikhen pe akhenchar pi duk, ta ka pien katar e joli e Devleki kai si le sa e zor.

²¹ Soke ¿savi veselia ka avel le katar po cher kana vou ni ka avel ios, a leke chona si chinde?

²² ¿Ka sikavel vareko e Devle o bizaipe, kana vou krisil golen kai si mai upre?

²³ Gua lleno ka merel ande po ternipe kana ni ka avel le ni iek nuzda.

²⁴ Leke piria ka aven pherde thud, ta ka leke kokala ka aven zurale.

²⁵ A aver lleno ka merel ande nuzda ta e zalba, ta ni jala nikada dragostimaia.

²⁶ A eli dui ka achen prajome ta e cherme ka ucharen len.

²⁷ Me pinllarav tumare mislura, ta llanav e ezgode bilache kai mislin mandar.

²⁸ Soke tumen phenen: ¿kaitalo o cher katar o glamno lleno, ta e chare kai zivina e bilache llene?

²⁹ ¿Ni puchlen e llenen kai nakhen pe droma, ta ni asunden so phende tumenge,

³⁰ kai o lleno bilacho ka avel uchardo ando llive katar e zatrania, ta ni nakhel ni iek bilachipe?

³¹ ¿Ko ka phenel leke pe leko mui so cherel? ¿Ta ko ka pochinel leke so cherda?

³² Soke la inllaren le ande limoria, ta upral pe leko limori e llene ka arakhen le.

³³ E chik ka avel leke kovli, pala le llele but llene ta angla le ka llan llene billinde.

³⁴ ¿Soke aven te den man zor samo gia? ¿Ta aven te phenen mange alava kojamne?