Job 2 - Biblia ande chib Romani

¹ Aver llive kai chidinaile e suechura angla o Del, avilo i o satanas maskar lende.

² Ta o Del phenda leke: ¿Katar ave? O satanas phenda: Avav katar e phuv, phirdem la pe suako rig.

³ Ondaka o Del phenda: ¿Dikhlan sar si mo sluga o Job? ¡Inai niko sargo vou pe phuv, vou si chacho ta orta, del liubao e Devle ta inai ando bilachipe, ta llik kate llal orta, i kana tu thodan man te zatriv le pala niso!

⁴ A o satanas phenda e Devleke: Te dukhadan le pe leko mas, ka del sogo avela le pala po zivoto.

⁵ A inzar cho va pe lete, ta dodisar leke kokala ta leko mas, ta dik dal ni ka kusel tut isto angla tu.

⁶ Ta o Del phenda leke: Vou si ande che va, samo na mundar le.

⁷ Ondaka o satanas llelotar katar o Del, ta thoda po Job iek ller bilachi, katar leke porrne llik kai leko soro.

⁸ Ta o Job llelo te besel pasa iek umpa llubri ta lia o kotor katar iek piri te janudelpe.

⁹ Ondaka leki rromi phenda leke: ¿Llik kate san chacho? ¡Kus e Devle ta mer!

¹⁰ A vou phenda: ¡Chei, na de orbe sargo e diskinie dile! ¿A so? ¿Ka la katar o Del o lachipe a o bilachipe ni ka la le? ta ande sa gala ezgode o Job ni cherda o bilachipe.

E amal katar o Job aven te dikhen le

¹¹ Trin amal katar o Job, o Elifas temanita, o Bildad sujita ta o Zofar naamatita, kana asunde sa o bilachipe kai nakhla, avile suako iek katar pi phuv, soke achilea pe orba te aven te dikhel kai saia lenge zalba pala le, ta de den le zor.

¹² Dikhle le duratar ta ni pinllarde le, ta rovde ando baro avazi ta e trin chudie pe po soro o prajo.

¹³ Ta besle pe phuv pasa le efta llive ta efta racha, ta ni iek lendar ni phenela leke niso, soke dikhena kai saia but dukhado.