Job 16 - Biblia ande chib Romani

Job

¹ O Job phenda leke:

² But droma asundem orbe sargo gala, aven te den man zor ta joliaven man saurre.

³ ¿Kana ka achen tumare orbe kai si sargo e balav? ¿Soke jan tumen manchar?

⁴ I me sai dav orba sargo tumen, te avilena tumen sargo me, ta lachardema nesave alava, ta sai miskosardema mo soro espurniaia.

⁵ A me diema tumen zor ma alavenchar, ta diema tumen zor te lelpe tumari duk.

⁶ A te dav orba, mi duk ni achel, a te na dav orba, ni llaltar mandar.

⁷ A akana tu Devla chiniardan man, cherdan te muken man korkorre sa e llene.

⁸ Tu cherdan te gorcholpe mo mui, mo sukipe del orbe mandar angla mande,

⁹ leki joli drobosarda man, ta marelpe manchar, jirchisarda pe mande pe danda, ta mo dusmano thoda pe mande pe akha.

¹⁰ E llene den orbe pe mande, chalade man pe mo mui, sa chidinaile pe mande.

¹¹ O Del dia man ando va e kojamneko ta cherda te perav ande va katar e bilache.

¹² Llala mange sukar, a vou drobosarda man, chirdia man e korratar ta cherda man pe milia kotora ta thoda man te chudel pe llide ande mande.

¹³ Thodepe truial mandar leke llene kai chuden e llide, ta den amde mo mas ta chinde me bubreskura, ta mi feria thavdia llik pe phuv.

¹⁴ Phlagla man ta pale phagla man, prastio pala mande sargo iek manus but baro.

¹⁵ Thodem o prajo pe mo mas, ta thodem mo soro ande prajo.

¹⁶ Mo mui si suvlo katar o roipe, ta nasti dukhav pe me akha,

¹⁷ a me va si chiste katar o bilachipe, ta mo molipe si chacho.

¹⁸ ¡Ioi phuv, te na uchare mo rat, ta te asundol mo avazi pe suako rig!

¹⁹ A ando miloso si ko dikhla sa, ta del e orba chachi chak upral.

²⁰ Gola kai janpe manchar si isto me amal, a angla o Del ka peren me ausa.

²¹ ¡Gia sukar avela iek kris e Devlea sar krisi e manusa!

²² A e burs kai si chinade si te aven, ta si te llav po drom kai ni ka iriu man palpale.