Job 12 - Biblia ande chib Romani

Job

¹ Ondaka o Job phenda:

² Chachimaia tumen sen o foro ta kana tumen ka meren ni ka avel ios bizaipe.

³ I man si bizaipe sargo tumen, ta tumen ni sen mai bizai neko me, ¿savi ezgode nevi phenden tumen?

⁴ Tumaro amal asal peke mandar, kai moliv man e Devleke ta del mange anglal, ta sa iek maren espurnia katar o chacho ta orta.

⁵ O lleno kai sinzan leke porrne si sargo iek lampara kai ni thovel lake sama o lleno kai si ando bulipe.

⁶ Barvaon e chare katar e chorane, ta zivin bidarako gola kai den joli e Devle, a o Del dia len sa so si len.

⁷ Gia si, lla kai e zivirinie ta puch len, ta von ka sikaven chuke, o kai e chiriklia te phenen chuke.

⁸ O de orba e phuviaia, ta voi ka sikavel tut, o kai e mache kai si ande mora te phenenle chuke i von.

⁹ Von llanen kai o Del cherda sa e ezgode.

¹⁰ Ande leko va si suako zivoto, ta o duo katar suako manus.

¹¹ Chachimaia o kan pinllarel e alava, ta o mui llanel kana si iek lacho jape.

¹² E phure si llangle, ta e llene purane si len bizaipe.

¹³ E Devlea si o bizaipe ta e zor, leko si o sikadipe ta o bizaipe.

¹⁴ So vou phagela, niko nasti vazdel le pale, ka phandel e manuse ta ni ka avel ko te putarel leke.

¹⁵ Te achavel e paia, sa sukol, a te bichalel len, zatrin e phuv.

¹⁶ Ande leke va si e zor ta o bizaipe, leko o kojado ta gua kai kojavel.

¹⁷ Vou cherel te na llanen so ka cheren gola kai sikaven averen, ta cherel te diliaon e krisaria.

¹⁸ Vou chinel e bilachenge lanchura, ta phandel iek solo pe lenge zea.

¹⁹ Vou inllarel puste e glamne llenen, ta diliarel e llenen kai si mai zurale.

²⁰ Ni mukel te den orba gola kai phenen o chachipe, ta lel katar e phure e orbe kai sikaven.

²¹ Lel o liubao katar e glamne llene, ta putarel e zuralengo kavisi.

²² Vou cherel te dikhol truniariko mai gurudino, ta ikanel ando villelo e senka merimaki.

²³ Vou cherel te barion e phuvia, ta i zatril len, rispil e phuvien, ta pale chidel len.

²⁴ Vou lel o bizaipe katar e gazda e phuvienge, ta cherel len te phiren po pusto kai inai drom.

²⁵ Llan pipindo sargo ando truniariko ta bi villeloko, ta cherel len te peren sargo mate.