Job 11 - Biblia ande chib Romani

Zofar

¹ Ondaka o Zofar o naamitita phenda:

² ¿Ni ka phendol niso goleke kai del but orbe? ¿Ta pala e but orbe o manus ka avel chachardo?

³ ¿Misli kai che orbiche ka achaven e llenen? ¿Ta kai niko ni ka del pe tute te ache ando lallao?

⁴ Tu phene: So me pachav si chacho, ta me sem chisto angla tu.

⁵ ¡Ioi, so dava te putarel po mui o Del ta te del tuia orba,

⁶ ta te phenel chuke o bizaipe kai si gurudino, kai mol le dui droma mai but neko o barvalipe! Ondaka ka llane kai o Del dia tut iek duk mai minoni neko so saia te le pala o bilachipe kai cherdan.

⁷ ¿Sai pinllare e ezgode gurudine e Devleke? ¿Sai ave orta gia sar si o Del kai si le sa e zor?

⁸ ¿So ka chere kana si mai upre neko o miloso? ¿Sar ka pinllare len kana si mai tele neko o limori?

⁹ Lengo lungipe si mai baro neko e phuv, ta lengo bulipe si mai baro neko e mora.

¹⁰ A te avel o Del te phandel ta te chinel e kris, ¿Ko ka achavel le?

¹¹ Vou pinllarel e bilache llenen, dikhel o bilachipe ¿ta ni ka thovel sama?

¹² O lleno bilacho ka cherdol bizai, kana iek magarcha ka bianel iekhe manuse.

¹³ A te de le cho lio, ta te vazde lete che va,

¹⁴ te avela tut varesavo bilachipe ta te chudea le tutar, ta te na mukea ande chi chara o bilachipe,

¹⁵ ondaka ka uste bi lallaimaia, ka ave zuralo ta ni ka avel chuke dar,

¹⁶ ka bristare cho chorripe, ta ka avel chuke sargo iek pai kai nakhlo.

¹⁷ O zivoto ka avel chuke bristo sargo o llive, i te avela o truniariko, chuke ka avel sargo e thiarin.

¹⁸ Ka uzdi tut soke si so adurichare, ka dikhe truial tutar ta ka sove bidarako.

¹⁹ Ka sove ta niko ni ka phagel chi lindri, ta but llene ka mangen te aven pasa tu.

²⁰ A e bilache ni ka llanen kai ka gurudon, ka avel o truniariko pe lenge akha ta ka aduricharen o meripe.