Job 10 - Biblia ande chib Romani

¹ Gadome sem katar mo zivoto, ka mukav te likel o roipe ka mukav te del orba e duk katar mo lio.

² Ka phenav e Devleke: ¡Na dosar man, cher te llanav soke krisi man!

³ Tu cherdan man, inai sukar te dukhave man, te chude man ta te chere so mangen e bilache llene.

⁴ ¿A so? ¿Tu dikhe sar dikhen e manusa?

⁵ ¿Che llivesa si sargo e manusenge? ¿O che bursa sargo o vreme e manusengo

⁶ te prezo ande mi dos ta te rode mo bilachipe.

⁷ A tu llane kai me ni sem bilacho, ta kai inai ko te kurtulil man katar cho va?

⁸ Tu cherdan man che vastenchar, ¿a akana mange te zatri man?

⁹ De tut golli kai cherdan man katar o glibo, ¿A akana ka chere man prajo?

¹⁰ ¿Ni thodan man sargo thud kai zuriaol ta cherdol chiral?

¹¹ Thodan pe mande o mas ta e morchi ta khuvdan man ande kokala ta e zile.

¹² Dian man zivoto ta volipe, ta arakhlan mo duo.

¹³ Gala ezgode si gurudine ande cho lio, me llanav kai si pasa tu.

¹⁴ Te cherdem o bilachipe, tu dikhlan man, ta ni ka avav chuke chisto katar mo bilachipe.

¹⁵ Te avilem bilacho, ¡Tesko mange! A te avilem chacho ni ka cherav baripe, soke sem chinio katar o lallao ta e duk.

¹⁶ A te cherdem baripe, ka istare man sargo liono ta cheres ma pale ka chere bare ezgode.

¹⁷ Nevo zumadipe thove pe mande, ta bariardan chi joli pe mande sargo boñikura kai marenpe ta ni achen.

¹⁸ ¿Soke muklan te biandivav? Te mulema niko ni dikhlaia man nikada.

¹⁹ Te na zivisardema nikada, avilema inllardo katar o lli kai o limori.

²⁰ ¿Inai but e llivesa kai ziviu? duriu mandar ta muk te lav mange cherricha zor,

²¹ mai anglal te llautar ta te na iriu man, ande phuv katar o truniariko ta kai si e senka e merimaki,

²² e phuv kai si o truniariko kote kai niso inai pe po than ta o villelo si sargo e tufina.