Job 1 - Biblia ande chib Romani

O Del mukel te perel o Job ando chorripe

¹ Ande phuv katar o Uz saia iek lleno kai ikhardola Job, kai leko zivoto saia chacho ta orta ta dela liubao e Devle, ta ni saia ando bilachipe.

² O Job saia le efta chaurre ta trin chorra.

³ Saia le efta milie bakre, trin milie deve, milia gurova, panch stotine magarche. Ta i saia le but sluge, ta vou saia o mai baro ande phuvia katar o oriente.

⁴ Leke chaurre sea sikade te thoven bare sinie ande pe chera, suako iek kana saia leko vreme, ta suako drom ikharena pe trine phiorren.

⁵ Ta kana getonape e llivesa kai thovena e sinie, o Job ikharela len thiarinako ta chinela kurbano pala suako iek lendar. Soke vou phenela: Sai avelpe kai me chaurre cherde o bilachipe, ta sai mislisaile o bilache katar o Del ande po lio. Ta gia cherelale suako llive.

⁶ Iek llive kana e suechura chidinaile angla o Del, avilo maskar lende i o satanas.

⁷ O Del phenda leke: ¿Katar ave? O satanas phenda: Avav katar e phuv, phirdem la pe suako rig.

⁸ Ondaka o Del phenda leke: ¿Dikhlan sar si mo sluga o Job? ¡Inai niko sargo vou pe phuv, vou si chacho ta orta, del liubao e Devle ta inai ando bilachipe!

⁹ A o satanas phenda e Devleke: ¿O Job del liubao e Devle samo gia?

¹⁰ ¿Ni thodan iek bar truial letar ta katar leko cher ta katar sa so si le? Blagosisardan le ande leko rado, goleke si le but pe phuv.

¹¹ A inzar cho va akana ta zatrisar sa so si le, ta ka dikhe sar ka kusel tut isto angla tu.

¹² O Del phenda e Satanaseke: Sogo si le akana si ande che va, samo na thov cho va pe lete. Ta llelotar angla o Del o satanas.

¹³ Iek llive kana leke e chave ta leke chea jana ta piena mol ando cher katar o phlal o mai purano,

¹⁴ iek lleno avilo kai o cher katar o Job ta phenda leke gia: Radia e phuv e guruvenchar, ta e magarche jana char pasa lende,

¹⁵ ta die pe lende e sabeura, ta mundarde e slugen e jarnienchar ta lie peke e guruven ta e magarchen, samo me naslem te sai phenavle chuke.

¹⁶ Kana dela orba gua lleno, avilo aver lleno ta phenda leke: Peli iek esterlicha pe chobanura ta pe bakre ta mule, samo me naslem te sai phenavle chuke.

¹⁷ Kana dela orba gua lleno avilo aver lleno ta phenda leke: Trin umpe llene katar e kaldeura mardepe amenchar ta lie peke e deven ta mundarde e llenen e jarnienchar, samo me naslem te sai phenavle chuke.

¹⁸ Kana dela orba gua lleno avilo aver lleno ta phenda leke: Che chave ta che chea jana ta piena mol ando cher katar o phlal o mai purano,

¹⁹ ta avili iek balav katar o pusto ta chinosarda e star riga katar o cher ta pelotar upral pe chaurre, ta mule, samo me naslem te sai phenavle chuke.

²⁰ Ondaka o Job ustilo, pharrada pe patave ta jaliarda po soro, ta chudiape pe te blagosil e Devle,

²¹ ta phenda: Nango avilem pe gaia phuv, ta nango si te llautar latar. O Del dia, o Del lia, ¡Te avel blagosime e Devleko anav!

²² Ta ande sa gala ezgode, o Job ni cherda o bilachipe ta ni thoda e dos po Del.