Jeremias 7 - Biblia ande chib Romani

O Jeremias del orba andre ando cher e Devleko

¹ Alav e Devleko avilo kai o Jeremias ta phenda:

² Thou tut po udar katar o cher e Devleko ta phen kote gaia orba: Asunen o alav e Devleko sa o Juda, gola kai den katar gala udara te blagosin e Devle.

³ Gia phenda o Del kai si le sa e zor, o Del katar o Israel: Lacharen tumare droma ta e ezgode kai cheren ta ka cherav te zivin kate.

⁴ Na uzdintumen ande alava kojamne, kai phenen: Cher e Devleko, cher e Devleko si gava.

⁵ A te lacharden tumaro drom ta e ezgode kai cheren, te cherden chachimaia so si orta maskar iek lleno ta aver,

⁶ ta na chichiden e llene kai si katar aver phuv, ni e minonen kai inai len dada, ni e phivlien, ta pe gava than ni ka cheren te chordol o rat katar o lleno kai inai dosalo ta na llan pala aver dela isto pala tumaro bilachipe,

⁷ ka cherav te zivin pe gava than kai diem tumare paponen ostade.

⁸ Tumen uzdintumen ande alava kojamne ni mol len niso.

⁹ Choren, mundaren, cheren o kurvaluko, jan sovel bange, phabaren o taimano karing o Baal, ta llan pala e dela kai ni pinllarena.

¹⁰ ¿Ka aven ta ka thoven tumen angla mande ande gava cher kai tumen ikharen man te avav upral, ta ka phenen: Mukliarde sam, te cheren sa gala ezgode kai si iek gadope?

¹¹ ¿Si tumenge iek than kai gurudon e chorane gava cher kai tumen ikharen man te avav upral? I me dikhav gaia ezgoda, phenel o Del

¹² Llan akana kai mo than ando Silo, kote kai thodem te zivil mo anav mai anglal, ta dikhen so cherdem leke pala o bilachipe katar mo foro o Israel.

¹³ O Del phenel: Pala sa gala ezgode kai cherden, ta makar diem tumenge orba rano ta ni achilem, ni asunden ta ikhardem tumen ta ni dien anglal,

¹⁴ Golek, gia sar zatrisardem o santuario katar o Silo, isto gia ka zatriv gava cher kai si chinado mange, kai diem le tumenge ta tumare puranenge ta kai tumen uzdin tumen ende lete.

¹⁵ Ka tradav tumen mandar, gia sar tradiem sa tumare phlalen, sa e vicha katar o Efrain.

O Israel ni kandel

¹⁶ Goleke tu, na molisao pala gava foro, ta na urki ta na mang mandar, soke ni ka asunav tut.

¹⁷ ¿Ni dikhe so cheren ande forura katar o Juda ta pe droma katar o Jerusalem?

¹⁸ E chaurre chiden e kasta, a e diskinie amin e arina te cheren e pogache kai e charoina e milosoki ta te anen ezgode dine kai e dela avere phuvienge, te cheren te joliaivav.

¹⁹ O Del phenel: ¿Ka cheren te joliaivav? ¿Ni cheren isto von te achen ando lallao?

²⁰ Goleke gia phenda o Del o Gazda: Mi joli ta mo silnope ka peren pe gava than, pe manusa, pe zivirinie, pe kasta kai si ando vos ta pe septelie e phuviake, ka phabon ta ni ka meren.

²¹ Gia phenel o Del kai si le sa e zor, o Del katar o Israel: Thoven tumare kurbanura phabarde upral pe tumare kurbanura ta jan o mas.

²² Soke o llive kana ikandem tumare paponen katar o Ejipto, me ni phendem lenge te cheren kurbanura phabarde ni te cheren kurbanura.

²³ A me phendem lenge gia: Asunen mo avazi, ta ka avav tumaro Del, ta tumen ka aven mo foro, ta cheren sa so ka phenav tumenge, te llal tumenge sukar.

²⁴ Ta ni asunde ni thode sama, ta cherde pe piro ande zuralipe katar lengo lio bilacho, ta llele palpale a na angle,

²⁵ sar kana likiste tumare papura katar o Ejipto llik allive. Ta bichaldem tumenge sa e profetanen me sluge, bichaldem len rano bi te achen,

²⁶ a ni asunde man ta ni thode sama, von zuriarde po soro, ta cherde mai gore neko pe dada.

²⁷ Goleke tu ka phene lenge sa gala ezgode, a ni ka asunen tut, ka ikhare len ta ni ka den anglal.

²⁸ Goleke ka phene lenge gia: Gaia si e phuv kai ni asunda o avazi e Devleko, ta ni kamla te sikol, mulo o chachipe, ta niko ni phenda le.

Blagosin avere delen ando Jerusalem

²⁹ Chin che bal ta chude len, ta kukisar pe burdura, soke o Del murzisarda ta mukla e vicha kai dia le joli.

³⁰ Soke e chave katar o Juda cherde o bilachipe angla me akha, gia phenel le o Del, thode pe ezgode gado ando cher kote kai dena man mui ta makhle le.

³¹ Ta cherde e thana vazdine katar o Tofet, kai si ande bari umal katar o chavo Inonoko, te phabaren ande iag pe chaurren ta pe chorren, kai me ni phendem lenge te cheren le, ta ni mislisailem.

³² Goleke o Del phenda te na ikharen la, Tofet, ni e bari umal katar o chavo e Inonoko, vou phenda te ikharen la e bari umal katar o mundaripe, ta ka avel prajome ando Tofet soke ni ka avel aver than.

³³ Ta e esnage katar e mule ka jan len e bare chiriklia e milosoke ta e zivirinie dive, ta ni ka avel ko te tradel len.

³⁴ Ta ka ikanav katar e chera katar o Juda ta katar e droma katar o Jerusalem o avazi katar e dragostia ta o avazi veseli, o avazi katar o rrom ta o avazi katar e rromi, soke e phuv ka achel pisti.