Jeremias 6 - Biblia ande chib Romani

O dusmano thovel pe truial katar o Israel

¹ Nasen chavalen katar o Benjamin, katar o Jerusalem ta basalen e sing ando Tekoa, ta cheren te dikhol o thuv upral po Bet Akerem, soke katar o norte dikhilo o bilachipe ta bari duk.

² Ka zatriv e sukar ta suki chei katar o Sion

³ Ka aven pe late e chobanura ta lenge stoke, pasa late ka inzaren pe chare, suako iek ka del te jan pe bakren pe po than.

⁴ Phenen kai ka maren tumen laia, usten ta mara amen laia ande desudui e lliveseke. ¡Tesko amenge! kai llaltar o llive, kai avile e senke pasa e riat.

⁵ Usten ta mara amen laia orachaia, ta phaga lake bare chera.

⁶ Soke gia phenda o Del kai si le sa e zor: ¡Chinen kasta ta cheren sargo iek phurd po Jerusalem! Gaia phuv trubul te avel dukhadi, soke voi si pherdi silnope.

⁷ Gia sar ni achel o pai kai likel katar e phuv, isto gia ni achel te likel latar o bilachipe. Andre delpe orba katar o choripe ta o kojaipe, ta suako drom angla mande si rane ta nasualipe.

⁸ Ortosao Jerusalem, te na durivav tutar, te na cherav tut pusto, te na cherav tut phuv kai ni blazil.

Phendol e duk

⁹ Gia phenda o Del kai si le sa e zor: Rode sargo e drak so achel katar o Israel, thov cho va ta rode maskar e kastorra drakhenge sargo o lleno kai chidel e drak.

¹⁰ ¿Kaia ka dav orba ta pe ka ka dav te asunen? Lenge kan si phangle ta nasti asunen, lallan katar o alav e Devleko, ni volin le.

¹¹ Goleke sem pherdo katar e joli e Devleki ta sem chinio te achavav la. Ka mukav te perel pe minone kai si po drom, ta pe chave kana chidiniaon, soke ka aven phangle o murus ta e diskinia kai si zinime, o purano ta o phuro.

¹² Ta lenge chera ka nakhen avere lleneke, lenge umalia ta i lenge diskinie, soke ka vazdav mo va pe llene kai zivin pe phuv, gia phenel le o Del.

¹³ Soke katar o mai minono llik kai o mi baro, suako iek merel pala e love, ta katar o profeta llik kai o popo, sa kojaven.

¹⁴ Sastaren e duk katar mo foro uprorral ta phenen: Pas, pas, a inai pas.

¹⁵ ¿Lallaile katar o gado kai cherde? Chachimaia ni lallaile, ta ni llanen so si o lallao, goleke ka peren maskar gola kai ka peren, kana ka aven dukhave ka peren, gia phenel le o Del.

O Israel ni kandel

¹⁶ Gia phenda o Del: Thoven tumen pe porrne pe droma, dikhen ta phuchen pe droma e purane, savo avela o lacho drom ta phiren pe lete, ta ka lelpe o chiñipe katar tumaro zivoto. A von phende: Ni ka lla.

¹⁷ Bichaldem pe tumende llenen kai prezon te phenen tumenge: Thoven sama kana ka basel e tuturuga. A von phende: Ni ka thova sama.

¹⁸ Goleke asunen phuvialen, ta acharen tumen kai chidinaon, so ka avelpe lenchar.

¹⁹ Asun phuv: Me anav bilachipe pe gava foro, so del len lenge mislura, soke ni asunde me alava, ta murzisarde pe mo zakono.

²⁰ ¿Soke anen mange katar o Seba taimano ta kastorra gugle katar e phuvia kai si dur? Tumare kurbanura phabarde ni kamam len, ni tumare kurbanura inai mange drago.

²¹ Goleke o Del phenel gia: Me thovav lenge vareso te peren, ta ka peren e dada ta e chave, iek lleno ta i gua kai zivil pasa lete ka meren.

Aven te maren len katar o norte

²² Gia phenda o Del: Avel iek foro katar o norte, iek bari phuv ka vazdiniaol katar e rig kai si mai dur.

²³ O arko ta o pulso ka istaren ande pe va, von si bilache ta ni ka avel lenge zao, basen sargo e mora, ta ka llan pe gra te marenpe tuia, chei katar o Sion.

²⁴ Samo kai asundam sar si von, estuknisaile amare va daratar ta dukhaia amen sargo iek diskinia kai maladol lake.

²⁵ Na like pe umalia, ta na phir po drom, soke o jarni katar o dusmano ta e dar si pe suako rig.

²⁶ Chei me foroki, taulisao po prajo ta thov le pe cho soro, achi zalosno sargo kana mulo chuke cho edino chaurro, rov bare ausenchar soke oma ka avel pe amende o dusmano.

²⁷ Thodem tut sargo iek zido ande mo foro, sargo iek cher vazdino, goleke ka prezo sar si lengo drom.

²⁸ Saurre ni kanden, ta si besne, samo orbe den, ta i bichindon, von si sargo tuch ta sastri.

²⁹ Phabilo o pisot, pala e iag phabilo o molivi, samo gia bilada o lleno kai bilavel, soke e mel ni likisti letar.

³⁰ Ka ikharen tumen rup chudino, soke o Del chudia tumen.