Jeremias 52 - Biblia ande chib Romani

O Sedekias charoil

¹ Kana o Sedekias thoda te charoil sea leke bis ta iek burs, ta charoisarda desuiek burs ando Jerusalem. Leki dei ikhardola Jamutal lako dad saia o Jeremias.

² O Sedekias cherda o bilachipe angla o Del, gia sar cherda o Joasim.

³ Ta pala e joli e Devleki po Jerusalem ta po Juda, tradia len petar. Ta o Sedekias vazdinailo po charo katar e Babilonia.

O Jerusalem jasarel

⁴ Ta avilape kai pala e inia burs ta inia chon ta desto des llive kai vou charoila, aviloia o Nabukodonosor charo katar e Babilonia, ta anda sa pe boñikonen po Jerusalem te marenpe ta inzarde pe chare truial ta pe suako rig cherda zidura te marenpe laia.

⁵ Ta achile truial katar o foro llik kai e desudui burs kai charoila o Sedekias.

⁶ Pala e star chon ta inia llive, avila lenge but bok ta ni saia len marrno te jan ando foro.

⁷ Ta cherde iek putardipe po zido e foroko ta sa e boñikura nasle, ta lleletar katar o foro orachaia katar o drom e udareko maskar e dui zidura kai sea pasa e bar zeleni e charoki ta lleletar po drom katar o Araba a e kaldeura sea truial katar o foro.

⁸ Ta e boñikura katar e kaldeura llele pala o charo ta resle e Sedekiase pe umalia katar o Jeriko. Ta sa leke boñikura mukle le.

⁹ Ondaka istarde e charo e Sedekiase ta inllarde le kai o charo katar e Babilonia ando Ribla kai si ando Jamat, kote o Nabukodonosor krisisarda le.

¹⁰ Ta o charo katar e Babilonia chinda e korr katar e chave e Sedekiaseke isto angla le ta isto ando Ribla chinda e korr katar e mai bare sudura katar o Juda.

¹¹ A o charo katar e Babilonia samo ikanda e akha e Sedekiaseke ta phangla le pe lanchura ta bichalda le ande Babilonia ta mukla le ande rubie lligo ni mulo.

Zatrin o cher e Devleko

¹² Ando llive desto katar chon starto katar o burs desuiniato kana charoila o Nabukodonosor, charo katar e Babilonia, avilo ando Jerusalem o Nebuzaradan, sudo e charoko ta gazda katar e boñikura ta vou saia angla o charo katar e Babilonia.

¹³ Ta phabarda o cher e Devleko, o cher e charoko ta sa e chera katar o Jerusalem, ta suako baro cher.

¹⁴ Ta sa e boñikura katar e kaldeura kai avena pe gazdaia, zatrisarde sa e zidura kai sea truial katar o Jerusalem.

¹⁵ Ta o Nebuzaradan cherda te inllaren phangle sa e llenen kai sea chorre ando foro ta sa ogole llenen kai achilea ando foro, e llenen kai llelea pe rig katar o charo katar e Babilonia ta sa e llenen kai achile katar o foro.

¹⁶ A katar e chorre kai sea ando foro mukla len te radin e phuv ta te arakhen e drak.

¹⁷ Ta e kaldeura phagle e direkura tuchne kai sea ando cher e Devleko ta o lelleno ta leke porrne e lellenoke kai sea ando cher e Devleko ta inllarde sa o tuch ande Babilonia.

¹⁸ Ta inllarde i e kavie, e pale, e kata, e tasura, e roia, e ta sa e ezgode tuchne kai radina lenchar,

¹⁹ ta e ezgode e taimanoke, e tasura bare ta e minone, e kavie, e ezgode kai thodon upral e memelia, e kavie minone, e tasura, so saia sunakuno po sunakai, a so saia rupuno po rup, inllarda o gazda e boñikonengo.

²⁰ E dui direkura, o lelleno, ta e desudui guruva tuchne kai sea telal katar e porrne kai cherdaia o charo o Salomon ando cher e Devleko. O pharipe katar sa o tuch saia billindo.

²¹ A suako iek direko saia le mai but katar e ojto pole llik upre ta iek solo saia truial katar o direko kai saia le mai but katar e panch pole ta leke pasuare sea thule sargo star naia ta andral saia chucho.

²² Ta upral pe suako direko saia iek ezgoda sukar kai saia la mai but katar e dui pole ta pe late saia iek mreza ta phabaia truial, sa saia tuchno ta i o duito direko ta e phabaia.

²³ Pe suako nizo sea iniavardes ta sov phabaia, a gola kai sea truial ta pe mreza sea stotina.

E judiura kai sea inllarde po pusto

²⁴ O gazda katar e boñikura inllarda pea i e Seraiase kai saia o baro popo, ta e Sofoniase, kai o duito pala le ta trine llenen kai arakhena o cher e Devleko.

²⁵ Ta katar o foro lia iekhe sudo kai saia gazda katar e boñikura, efta llenen katar gola kai sea mai pasa o charo ta dena lea orba, kai sea ando foro, ta e mai bare popo katar e boñikura, kai dela orba e llenenge kai saia te marenpe ta sovardes llene ios kai sea ando foro.

²⁶ Lia len o Nabuzaradan o gazda e boñikonengo ta inllarda len kai o charo katar e Babilonia kai saia ande Ribla.

²⁷ Ta o charo katar e Babilonia dukhada len ta mundarda len ande Ribla ande phuv katar o Jamat. Gia saia ikando o Juda katar pi phuv.

²⁸ Gava si o foro kai o Nabukodonosor inllarda phanglo: Ando burs eftato, trin milie ta bis ta trin murusen katar o Juda.

²⁹ Ando burs desojtoto kai charoila o Nabukodonosor inllarda phangle katar o Jerusalem ojto stotine ta tranda ta dui llene.

³⁰ Ando burs bis ta trin kai charoila o Nabukodonosor, o Nabuzaradan gazda katar e boñikura inllarda phangle efta stotine ta saranda ta panch llenen katar e murusa katar o Juda. Sa e llene kai sea inllarde sea star milie ta sov stotine.

Mukliaren e Joakine ta den le pachiu ande Babilonia

³¹ Ando burs tranda ta eftato kai saia phanglo o Joakin charo katar o Juda, ando chon desuduito, ta ando llive bis ta panchto, o Evil Merodak charo katar e Babilonia, ando purvo burs kai charoila, ikanda katar e rubie e Joakine charo katar o Juda.

³² Ta dia lea orba pachimalivaia ta thoda le te besel maskar e charura ande Babilonia.

³³ Cherda te premenilpe katar e patave kai sea pe lete ande rubie ta jala pe siña e charoki sa po zivoto.

³⁴ Ta suako drom pravarela le o charo katar e Babilonia, suako llive sa leko zivoto lligo ni mulo.