Jeremias 50 - Biblia ande chib Romani

E Babilonia jasarel

¹ O Del cherda te del orba o Jeremias cheres e Babilonia, e phuv katar e kaldeura.

² Phenen ande phuvia ta cheren te llanen. Ta vazden bariakura, phenen ta na guruven. Phenen: Lie peke e Babilonia, o Bel achilo ando lallao, o Merodak achilo drobome, phage achile leke slike, phage achile leke dela.

³ Soke avilo pe lete iek foro katar o norte ta ka zatril lake phuvia ta ni ka achel ni manusa ni zivirinie ni ka zivin kote. Sa nasle ta lleletar.

E israelitura irinpe

⁴ Ande gua vreme, phenel o Del, ka aven e chave katar o Israel, von ta lenchar ka aven e chave katar o Juda. Ka phiren ta ka roven ta ka roden e Gazda lengo Del.

⁵ Ka puchen po drom katar o Sion, ta incha ka llan ta ka phenen: Aven ta chidiniaiva kai o Del ta ja leke sovel ostade kai ni ka bristara len nikada.

⁶ Mo foro saia sargo bakre jasarde. Leke chobanura cherde len te kojadon, jasarde len pe burdura, llele burdo po burdo, ta bristraile katar pe rindura.

⁷ Kogo malavela len jala len ta lenge dusmanura phenena: Ni ka ava dosale, soke von cherde o bilachipe e Devleke kai si o chachipe, kai ande lete uzdinape lenge papura.

⁸ Nasen katar e Babilonia ta liken katar e phuv e kaldeonengi llan angla e stoka sargo busne.

⁹ Soke me ka bichalav pe Babilonia but phuvia chidine katar o norte. Kotar ka lacharenpe te marenpe laia ta ka len la peke. Lake llide si sargo e llide katar o tromano, kai chalaven orta po maskaral.

¹⁰ Ta ka len peke e Kaldea. Ta sa gola kai ka len peke vareso latar ka achen pherde, gia phenenl le o Del.

E Babilonia jasarel

¹¹ Soke veselisailen, soke avila tumenge dragostia, kana zatrisarden mi phuv, soke pherdilen sargo iek telcho pe char, ta baslen sargo e gra.

¹² Tumari phuv lallaili but, avila lake lallao goia kai bianda tumen, voi ka avel e mai chorri katar e phuvia, ka avel pusti, suki ta bi burdoki.

¹³ Pala e joli e Devleki ni ka zivil andre niko, soke ka avel zatrime sa, kogo ka nakhel katar e Babilonia ka chudilpe ta ka marel espurnia katar lake zatranie.

¹⁴ Thoven tumen orta truial katar e Babilonia sa gola kai chapenin o arko, chuden ande late, ta te na chitilpe tumenge gachin llide ka chuden soke cherda o bilachipe e Devleke.

¹⁵ Urkin pe late truial letar. Jasarda, peletar lake barra, peradine si lake zidura, soke o Del ikanda pi duk. Ikanen tumari duk pe late cheren laia gia sar cherda voi.

¹⁶ Zatrisaren ende Babilonia gole kai thovel e simicha ande phuv, ta gole kai chinel o lliu kana avel o vreme. Angla o jarni kai zatril, suako iek ka dikhel karing po foro, ta suako iek ka nasel kai pi phuv.

O Israel irilpe

¹⁷ O Israel si iek stoka bakrengi jasardi, e lionura chinde le pe kotora. O charo katar e Asiria jala le mai anglal, mapalal o Nabukodonosor o charo katar e Babilonia ikanda leke kokala.

¹⁸ Goleke o Del kai si le sa e zor, o Del katar o Israel phenda gia: Me ka dukhavav e charo katar e Babilonia ta leke phuvia, gia sar dukhadem e charo katar e Asiria.

¹⁹ Ta pale ka anav e Israele kai o than kai zivila ta ka cherel o bilachipe po burdo o Karmelo ta ando Basan. Ta po burdo katar o Efrain ta ando Galaad ka chaliarel po lio.

²⁰ Ande gola llivesa ta ande gua vreme, phenel o Del kai, ka roden e dos katar o Israel ta ni ka malaven la, ta i o bilachipe katar o Juda, ta ni ka dikhon, soke me ka prostiv golen kai me ka mukav.

E Babilonia jasarel

²¹ Lla ta mar tut ande phuv katar o Merataim, mar tut laia ta e llenenchar katar o Pekod. Zatrisar len ta mundar len saurren, ta cher sa sar phendem chuke, gia phenel le o Del.

²² Asundol zurale sar marenpe pe phuv ta baro phagipe si.

²³ ¡Chindilo ta phagilo o chokano e sa e phuviengo, e Babiloniako achili pusti maskar e phuvia!

²⁴ Thodem chuke sole, Babilonia, ta pelan pe lende, avilan maladini ta phangli, ta ni llanglanle, soke vazdinailan po Del.

²⁵ Ikanda pe ezgode marimake katar o than kai sea le gurudine, soke gaia si e buchi katar o Gazda, o Del kai si le sa e zor, pe phuv katar e kaldeura.

²⁶ Avel katar suako rig te maren tumen laia, putaren lake sobe, cheren la iek umpa phagipe ta zatrisaren la, te na achel latar niso.

²⁷ Mundaren sa lenge telchura, inllaren len kai o than kai mundardon. ¡Tesko lenge! soke avilo lengo llive, avilo o vreme katar lengi zatrania.

²⁸ Asundol o avazi katar gola kai nasen katar e Babilonia, llan te phenen ando Sion kai o Gazda amaro Del ka del amen vareso, kai ikanda pi joli pala o cher e Devleko.

²⁹ Chiden pe Babilonia e llenen kai chuden e llide, e llenen kai chapenin o arko, inzaren tumare chare pe lende, thoven tumare chare truial latar te na nasel latar ni iek lleno. Pochinen lake prema sa so cherda, prema sa e ezgode kai voi cherda, cheren lake i tumen soke cherda po baripe po Del, po Santo katar o Israel.

³⁰ Goleke lake llene terne ka meren pe plase ta sa lake llene kai llan te marenpe, ka aven zatrime ande gua llive, gia phenel le o Del.

³¹ Me avilem pe tute, tu kai san barikano, gia phenel o Gazda, o Del kai si le sa e zor. Soke avilo cho llive, avilo o vreme kai ka dukhavav tut.

³² Ta o barikano ka eskombal ta ka perel, ta ni ka avel ko te vazdel le. Ta ka thovav e iag pe lenge forura, ta ka phabarav sa so si truial lendar.

³³ Gia phenda o Del kai si le sa e zor: O foro katar o Israel ta o foro katar o Juda nakhen duk ta sa gola kai phangle len, ni mukle len, ni kamle te muken len.

³⁴ Lengo Braduimari si o Zuralo, o Del kai si le sa e zor si leko anav. Vou ka del orba cheres lende te sai achel esmiro e phuv ta ka cherel te izdran e llene kai zivin ande Babilonia.

³⁵ O jarni pe kaldeura, phenel o Del, pe llene katar e Babilonia, pe lenge sudura ta pe lenge llene bizai.

³⁶ O jarni pe llene kai apogodin ta ka diliaon. O jarni pe lenge llene tromane, ta ka meren daratar.

³⁷ O jarni pe lenge gra, pe lenge bordona ta pe sa o foro kai zivil kote ta ka daran sargo diskinie. O jarni pe lengo barvalipe ta ka len lendar sa.

³⁸ Sukipe pe lenge paia ta ka sukon, soke si iek foro kai si le avere dela ta diliaon e slikenchar.

³⁹ Goleke, kote ka meren e zivirinie dive katar o pusto ta e llukela dive, ta kote ka meren i e minone katar e avestrus. Nikada ios ni ka zivil niko ta ni ka cherdol iek pero vicha pala e vicha.

⁴⁰ Niko ni ka zivil ios ane Babilonia. Ka avel sargo kana zatrisardem e Sodoma ta e Gomorra ta e forura kai sea truial, gia phenel le o Del, ta gia kote ni ka zivil niko.

⁴¹ Avel iek foro katar o norte, iek bari phuv ta but charura ka vazdiniao katar suako rig e phuviaki.

⁴² Ka llanen te istaren o jarni ta e lansa, ta ni ka avel lenge zao. Lengo avazi ka asundol sargo e mora ta ka llan pe gra, ka lacharenpe te aven pe tute sargo gola kai llan te marenpe, tu kai san e chei katar e Babilonia.

⁴³ Kana o charo katar e Babilonia asunda gaia orba, jasarda e zor ande pe va. Avila leke iek bari briga, dukhaia le sargo iek diskinia kai si te maladol kake.

⁴⁴ Sargo iek liono ka likav katar e patra e Jordaneke ta ka llav kai e zidura kote kai zivil. But oma ka cherav te likel kotar ta gole kai me ka esviriu ka gazdaril. ¿Ko si sargo me? ¿Ta ko ka thovelpe pe mo than? ¿O savo chobano ka terpil man?

⁴⁵ Goleke, asunen e orba kai phenda o Del cheres e Babilonia ta so mislil katar o foro e kaldeonengo: E mai minonen katar lengi stoka ka terrin len ta ka zatrin lenge chera ta i len,

⁴⁶ Kana e Babilonia ka perel, lengo urkipe ka cherel te dermolpe e phuv ta ka asundol ande sa e phuvia.