Jeremias 5 - Biblia ande chib Romani

O bilachipe katar o Jerusalem

¹ Phiren e droma katar o Jerusalem, ta dikhen akana, ta llanen, roden pe plase dal si vareko, dal si vareko te cherel so si orta, te rodel o chachipe, ta me ka prostiv le.

² I te phenena: Ando anav e Devleko von jan sovel bange.

³ Ioi Devla, tu dikhe po chachipe, chaladan len, ta ni dukhaia len, zatrisardan len, ta ni kamle te sikon, zuriarde po mui mai but neko iek barr, ta ni kamle te kanden tut.

⁴ A me phendem: Chachimaia gala llene si chorre, dilaile soke ni pinllaren o drom e Devleko, ni pinllaren e kris katar lengo Del.

⁵ Ka llav kai e llene glamne, soke von pinllaren o drom e Devleko, von pinllaren e kris katar lengo Del. A i von phagle o alav ka saia amen ta chinde e sole kai thovena amen zanio.

⁶ Goleke, o liono katar o vos ka mundarel len, ka zatril len o ruv katar o pusto, o liono makhlo ka prezol pe lenge forura, kogo ka likel andral ka lel le peke, soke lengo bilachipe cherdilo mai baro, ta ios mai gore ni kanden.

⁷ ¿Sar ka prostil tut pala goia ezgoda? Lenge chave mukle man ta jale sovel pe so inai Del. Chaliardem len ta cherde o kurvaluko ta ande chera e kurvichkenge chidiniaona po but llene.

⁸ Sargo gra saste ta zelne basena pe avereki diskinia.

⁹ ¿Ni ka dukhavav len pala gaia ezgoda? Gia phenda le o Del. Iek foro sargo gava, ¿ni ka avel dukhado mandar?

¹⁰ Liken pe lenge zidura, samo na zatrinla sa, ikanen e kasta drakhenge katar lenge zidura soke inai e Devleke.

¹¹ Soke chachimaia ni kandie man e llene katar o Israel ta katar o Juda, gia phenda le o Del.

Phendol e orba katar o duk

¹² Von ni kamle e Devle ta phende: Vou inai, ta ni ka avel pe amende e duk, ta ni ka llana so si o jarni ta ni ka nakha bok,

¹³ e poraukura ka aven sargo e balav, soke inai len so te phenen, ta gia ka avelpe lenchar.

¹⁴ Goleke, gia phenel o Gazda o Del kai si le sa e zor: Pala goia orba kai von phende, me thovav me alava ande cho mui sargo iag, ta gale foro sargo kasta kai ka phabarel len.

¹⁵ Foro katar o Israel, me anav pe tumende llenen duratar, gia phenda le o Del, llene zurale, llene purane, llene kai ni ka achare lenge so phenen, ta ni ka llane save alava phenen.

¹⁶ Saurre si tromane ta lengi ambava kai thovel e llide si sargo iek limori putardo.

¹⁷ Ka jan sa cho lliu ta cho marrno, ka jan che chaurren ta che chorren, ka jan che bakren ta che guruven, ka jan che drakha ta che kasta simochinenge, ta e jarniea ka mukel puste che forura zidome kai tu uzdia tut ande lende.

¹⁸ A o Del phenel kai ande gola llivesa ni ka zatril len sa,

¹⁹ ta kana ka phenen: ¿Soke o Gazda amaro Del cherda amenchar sa gala ezgode? Ondaka ka phene lenge: Gia sar muklen man ta radisarden avere delenge ande tumare phuvia, isto gia ka radin e llenenge katar aver phuvia.

So ka nakhel o Israel

²⁰ Phenen gia e foroke katar o Jakob ta cheren te asundol gaia orba ando Juda:

²¹ Asunen gaia ezgoda tumen kai sen iek foro dilo ta ni mislilpe:

²² O Del phenel gia: ¿Ni ka daran mandar? ¿Ni ka lel tumen e dar angla mande? kai achadem e mora llik kai e chisai, iek zakono ostade kai ni ka phagen ka vazdiniaon bursinda a ni ka dobin, ka basen lake valura a ni ka ni ka nakhen.

²³ A gava foro si le iek li kojamno kai ni kandel, durile ta lleletar.

²⁴ Ta ni phende ande po lio: Dara akana katar amaro Gazda o Del, kai del o bursin po vreme ta i mapalal, ta chinavel amenge o vreme te ikana so del e phuv.

²⁵ Tumaro bilachipe achada gala ezgode, ta tumari dos duriarda tumendar o lachipe.

²⁶ Soke ande mo foro sea llene kai ni pachana, prezona sargo gola kai thoven solo, thode kojaipe te istaren e manuse.

²⁷ Sargo iek phandipe pherdo chiriklia, gia si lenge chera pherde kojaipe, gia cherdile bare ta barvaile,

²⁸ Thulile ta lengo mas klichila, ta cherde mai but ezgode neko e bilache llene, ni krisisarde pe iek orba, pe orba katar e minone bi dadenge, ta barvaile ta ni krisisarde pe orba katar e chorre.

²⁹ O Del phenel gia: ¿Ni dukhavav pe gaia ezgoda? ¿Ta ni ka ikanav mi duk pe gala llene?

³⁰ Iek ezgoda darani ta gado cherdol pe phuv.

³¹ E poraukura poraukisarde o kojaipe, ta e popura gazdarina tala lengo va, ta mo foro manglale gia. ¿A so ka cheren kana ka avel o son?