Jeremias 49 - Biblia ande chib Romani

Poroka katar e amonitura

¹ Katar e amonitura, o Del phenda gia: ¿A so, o Israel inai le chaurre? ¿Inai le ko te achel leke ezgodenchar? ¿Soke o Milkon lia sa katar o Gad ta thoda pire llenen ande leke forura?

² Goleke o Del phenel kai aven llivesa, kai ka asundol o urkipe katar e llenen kai marenpe ando Raba, o foro katar e amonitura ta ka cherdol iek umpa phagipe ta ka phabaren lenge forura ta o Israel ka lel pale e phuvia kai lie lendar, gia phenda le o Del.

³ ¡Rov Jesbon, soke o Ai si zatrime! ¡Kukin diskinie katar o Raba! ¡Thoven pe tumende patave zalosne! ¡Roven ta llan truial katar e bar! Soke phangle e llenen katar o Milkon, lenge poponen ta lenge sudonen.

⁴ ¿Soke fali tut katar che umalia? Tu kai san iek foro besno, kai uzdi tut ande cho barvalipe ta phene: ¿Ko ka avel te marelpe manchar?

⁵ A me ka anav pe tute iek bari dar katar sa e forura kai si truial tutar, gia phenel le o Del kai si le sa e zor, ta ka chuden traden tumen mai angle ta ni ka avel ko te lel e llenen kai ka nasen.

⁶ Ta mapalal katar sa gala ezgode, ka cherav te irinpe e amonitura katar e phuvia kai sea phangle.

E poroka katar o Edom

⁷ Katar o Edom. O Del kai si le sa e zor phanda gia: ¿Inai bizaipe ando Teman? ¿Getosaile e alava katar e llene bizai? ¿Murisailo lengo bizaipe?

⁸ ¡Nasen, irin tumen palpale! Llan ande thana kai si chak tele, tumen kai zivin ando Dedan, soke e zatrania katar o Esav ka anav pe lete kana ka dukhavav le.

⁹ Te avilea llene kai chiden e drak, ¿ni muklea varesave kuchurra? ¿A te avilea e chorane inllardea so trubul len?

¹⁰ A me ka cherav te dikhol o Esav, ka sikavav sa e thana kai sai gurudol, ta nasti ka gurudol. Leko porodo ka avel zatrime, leke phlal ta e llene kai zivin pasa le, ta ni ka avel ios.

¹¹ Muk che minonen kai me ka bariarav len, ta che phivlia ka uzdinpe ande mande.

¹² Soke gia phenda o Del: Gola kai ni sea chinade te pien e mol katar e duk, akana ka pien. ¿A tu ni ka le ni iek duk? Tu chachimaia ka pie e mol katar e duk.

¹³ Soke jalem sovel pe mo anav, gia phenel o Del, kai ka anav zatrania, lallao, pusto ta proketo ka avel o Bosra ta sa leke forura ka aven puste ostade.

¹⁴ Asundem e viasta, kai o Del bichalda iekhe llene te inllarel e poroka kai e phuvia, ta phenel: Chidiniaon ta aven po Edom te mara amen lea.

¹⁵ Ka cherav te ache minono maskar e phuvia, e manusa ka maren tutar espuria.

¹⁶ Cho istardipe kojada tut, ta o baripe katar cho lio. Tu kai zivi ando putardipe katar e pechine, tu kai san upre pe bare burdura, i te avel cho kuibo chak upre sargo e agila, me ka cherav te fulie, gia phenel le o Del.

¹⁷ Ta o Edom ka achel pusto, ta kogo ka nakhel kotar ka chudilpe ta ka maren espurnia katar sa leke zatranie.

¹⁸ Gia sar saia e zatrania katar e Sodoma ta e Gomorra ta katar e forura kai sea pase, o Del phenel kai isto gia ka achel pusto o Edom ta ni ka zivil niko kote.

¹⁹ Sargo iek liono ka likav katar e patra e Jordaneke ta ka jutav pe lete sargo kana si iek zivirinia ta but oma ka cherav te nasel letar ta ka esviriu ko te gazdaril le. Soke ¿Ko si sargo me ta ko ka lel mo than? ¿Ko ka avel gua chobano kai ka terpil man?

²⁰ Goleke, asunen so phenel o Del cheres o Edom ta so mislil te cherel e llenenchar kai zivin ando Teman. E mai minonen katar lengi stoka ka terrin len ta ka zatrin lenge chera ta i len.

²¹ Gia zurale ka basel kana ka zatrinpe kai e phuv ka dermolpe ta o urkipe katar leko avazi ka asundol llik kai e Mora e Loli.

²² Sargo iek agila ka furial ta ka buliarel pe pakha po Bosra. Ta o lio katar e tromane katar o Edom ka cherdol sargo o lio katar iek diskinia kai si te maladol leke.

E poroka katar o Damasko

²³ Katar o Damasko, o Del phenda: e forura katar o Jamat ta o Arfad achile ando lallao, soke avila lenge iek bilachi viasta bilaon daratar, nasti achen po than sargo e valura e morake.

²⁴ O Damasko baldisailo, boldinailo te nasel, ta lia le o izdrape ta e briga, dukhaia le sargo iekhe diskinia kai si te maladol lake.

²⁵ ¡Sar mukle e foro kai saia gia blagosime, e foro katar mi dragostia!

²⁶ Goleke, pe plase ka peren leke terne, ta sa e murusa kai llan te marenpe ka meren ande gua llive, gia phenda le o Del kai si le sa e zor.

²⁷ Ta ka cherav te phabol e iag po zido katar o Damasko ta ka phabarel e chera katar o Ben Adad.

Poroka katar o Sedar ta o Jasor

²⁸ E viasta kai o Del anda cheres o Sedar ta katar e charoine katar o Jasor kai o Nabukodonosor charo katar e Babilonia zatrisarda. Gia phenda o Del: Usten ta llan po Sedar ta zatrin e llenen kai zivin pe rig katar likel o kham.

²⁹ Len lenge chare ta lenge bakre, lenge chitura ta sa lenge ezgode ta len tumenge lenge deve, ta urkin pe lende gia te daran: ¡E dar si pe suako rig!

³⁰ Nasen, llantar dur, zivisaren pe thana kai si chak tele, tumen kai zivin ando Jasor, o Del phenel le, soke Nabukodonosor charo katar e Babilonia thoda sama e llenenge kai dena bilache orbe tumendar ta thoda ande po lio te marelpe tumenchar.

³¹ Usten ta llan te maren tumen iekhe phuviaia kai ni marelpe ta ni daral, o Del phenel, kai inai la ni udara ni alkave, ta kai zivin korkorre.

³² Lenge deve ta lenge sivirinie ka aven o chari ta ka rispiu len pe sa e baliava, pe suako rig e phuviaki ta katar suako rigf ka anav lenge e zatrania, gia phenel le o Del.

³³ Ando Jasor ka zivin e llukela dive ka achel pusti, niko ni ka zivil kote, nisavo chavo manuseko ni ka besel kote.

E poroka katar o Elam

³⁴ O Del dia orba e Jeremiasea o profeta cheres o Elam, kana iakom charoila o Sedekias charo katar o Juda, ta phenda leke:

³⁵ Gia phenda o Del kai si le sa e zor: Me mangav o arko katar o Elam, soke goia si e ezgoda mai angluni katar leki zor.

³⁶ Ka anav po Elam e star baliava katar e star riga e milosoke, ta ka chudav len pe sa e baliava, ta ni ka avel phuv kai ni ka aven llene katar o katar o Elam te gurudon.

³⁷ Ta ka cherav te daral o Elam katar pe dusmanura ta katar gola kai roden te mundaren le. Ta ka anav pe lende o bilachipe ta mi joli ka phabol pe lende, gia phenel le o Del, ta ka anav pe lende o jarni lligo ni ka zatril len.

³⁸ Ta ka thovav mo trono ando Elam ta ka zatriv leke charo ta leke sudonen, gia phenel le o Del.

³⁹ A ka avelpe iek ezgoda ande llivesa katar o son, ka cherav te irinpe e phangle katar o Elam, gia phenel le o Del.