Jeremias 48 - Biblia ande chib Romani

E poroka katar o Moab

¹ O Del kai si le sa e zor, o Del katar o Israel phenda gia katar o Moab: ¡Tesko e Neboeke! Soke avilo zatrime ta achilo ando lallao: O Kiriataim achilo ande averenge va, o Misagab ni llanela so ka cherel ta nasti achilo pe porrne.

² Ni ka avel ios blagosime o Moab, soke ando Jesbon diepe orba sar te zatrin le, ta phende: Aven te ikana la katar e phuvia. Ta i tu, Madmena ka ave chindi, o jarni ka llal pala tute.

³ ¡Rovel o Joronaim, Soke bari si e zatrania ta o phagipe!

⁴ O Moab si sa phago. Cherde te roven lenge minone daratar.

⁵ Soke po drom kai llal upre karing o Luit e llene roven ta kukin, ta po drom kai llal tele karing o Joronaim e llene nasti achaven po roipe.

⁶ Nasen, nasalen tumaro zivoto ta cherdon sargo e char suki po pusto.

⁷ Soke uzdisailen mai but ande tumare ezgode ta ande tumaro barvalipe, i tu ka che ande avereke va ta e llene katar o Kemos ka llan phangle, ta i lenge popura ta lenge sudura.

⁸ Ta ka avel e zatrania ande suako foro, ta ni iek foro ni ka kurtulilpe. Ka murin e bari umal ta ka zatrinla gia sar phenda le o Del.

⁹ Den le pakha e Moabe, te furial ta te llaltar, soke ka aven zatrime lake forura ta ni ka achel ko te zivil ende lende.

¹⁰ Proketo te avel o lleno kai cherel lenomaia o rado kai o Del phenda te cherel ta proketo te avel gua kai ni ka mundarel pe jarniea.

¹¹ Sar kana saia terno o Moab saia esmiro ta inzilo pe pi phuv, nikada ni chucharde le katar iek piri ande aver, ta nikada ni saia phanglo, goleke achilo leko guglipe ande lete ta leki khand ni pharrudili.

¹² Goleke o Del phenel kai ka aven llivesa kai vou ka anel llenen te chucharen lenge piria ta ka pharraven lenge morcha.

¹³ O Moab ka avel leke lallao katar o Kemos, gia sar lallailo o Israel katar o Betel kai uzdilape ande lete.

¹⁴ ¿Sar ka phenen tumen kai sen tromane ta surale te marentumen?

¹⁵ A o Moab si sa phago ta leke forura zatrime ta leke llene terne kai si esvirime llele kai o than kai chinen e korra, gia phenda le o Charo, kai leko anav si o Del kai si le sa e zor.

¹⁶ Cherricha vreme achel te avel zatrime o Moab, ta sigarel te avel leki belava.

¹⁷ Zaontumen letar sa e phuvia kai si truial ta sa gola kai llanen leko anav ta phenen: ¡Sar phagilo o zuralo kas, e sukar rovli!

¹⁸ Fulie katar o blagosipe te bes pe chik e suki, chei katar o Dibon, soke gua kai zatrisarda e Moabe avilo pala tute te phagel che zidura.

¹⁹ Achi pe porrne po drom ta dik tu kai zivi ando Aroer. Puch gola kai pomozil ta gole kai naslo, ta phen leke: ¿So avilape?

²⁰ Lallailo o Moab, soke avilo zatrime. Roven ta kukin, phenen ando Arnon kai o Moab si zatrime.

²¹ Avilo o llive katar e kris pe umalia, po Olon, po Iaas ta po Mefagat,

²² po Dibon, po Nebo ta po Bet Diblataim,

²³ po Kiriataim, po Bet Megon,

²⁴ po Keriot, po Bosra ta pe sa e forura e katar o Moab, kai si pase ta kai si dur.

²⁵ E zor katar Moab si jasardi ta leko va phagilo, gia phenel le o Del.

²⁶ Mataren le soke vazdinailo po Del, te taulilpe o Moab pe po chadipe ta te achel ando lallao.

²⁷ A tu Moab, mardan espurnia katar Israel sargo kana ikande le katar e chorane ta kana dea leki orba miskoa cho soro.

²⁸ Like katar e forura ta zivisar maskar e pechine, tumen kai zivin ando Moab ta cherdon sargo o gulubo kai cheren pe kuibura po putardipe kai delpe maskar e barra.

²⁹ Asundam sar cherel baripe o Moab, kai istardol ta si barikano lako lio.

³⁰ Ta o Del phenel kai pinllarel leki joli, a o baripe kai cherel, ni ka blazil leke niso.

³¹ Goleke ka auchiu man po Moab, upral pe sa o Moab ka kukiu, ta pe llene katar o Kir Jeres ka rovav.

³² Ka rovav i pala tumende kai zivin ando Sibema gia sar rovdem pala o Jaser. Che drakha nakhle e mora, resle llik kai e mora katar o Jazer. Pe che septelie ta pe che drakha avilo gua kai zatril.

³³ Ta ka avel chindi e veselia ta e dragostia katar e umal kai si pherdo zivoto laki phuv katar o Moab, ta ka cherav ta na avel len ios e mol, ni ka llilaben ios gola kai cheren mol goia llili ni ka asundol ios.

³⁴ O roipe katar o Jesbon resel llik kai o Eleale ta kai o Iaas, ando Joronallin, ando Eglat, ando Selesilla asundol leko avazi. Ta i e len katar o Nimrim sukili.

³⁵ Ta ka zatriv e foro katar o Moab, gia phenel le o Del, sa golen kai cheren curbano pe thana vazdine ta golen kai phabaren o taimano avere delenge.

³⁶ Goleke, mo lio ka basel sargo firura pala o Moab ta pala e llene katar o Kir Jeres, soke zatrisailo sa o barvalipe kai cherde.

³⁷ Soke sa e sore ka aven jaliarde ta sa e chor ka aven ikande. Sa e va ka aven rangle ta o prajo ka avel pe sa e zea.

³⁸ Pe sa e chera katar o Moab ta pe leke droma, samo roipe ka avel. Soke me ka phagav e Moabe sargo iek piri kai ni trubul, gia phenel le o Del.

³⁹ ¡Roven soke o Moab si phago! ¡O Moab dia e zea ta achilo ando lallao! Marde espurnia katar o Moab ta chudisaile letar kogo saia truial.

⁴⁰ Soke o Del phenda gia: Ka irilpe sargo agila ta ka buliarel pe pakha po Moab.

⁴¹ Ka len peke e forura ta e zidura. Ta gua llive ka izdral o lio katar e tromane, sargo e diskinie kana si te maladol lake.

⁴² Ta o Moab ka avel zatrime ta ni ka avel ios iek foro, soke cherda baripe angla o Del.

⁴³ Ka nakhen pe dar, ka peren ando anadipe kai si po drom ka achadon tumare porrne pe sole, tumen kai zivin ando Moab, gia phenel le o Del.

⁴⁴ Ko ka nasel daratar, ka perel ando anadipe ta ko ka likel katar o anadipe, ka achadol leko porrno ando solo. Soke me ka anav po Moab, u burs katar leki duk.

⁴⁵ Tala e senka katar o Esbon thodepe bi zoriaia gola kai nasena. A katar o Esbon likisti e iag ta plameko katar o Sijon, ta phabarda o than katar o Moab ta o soro katar leke chaurre kai urlina.

⁴⁶ ¡Tesko chuke Moab! Zatrime si o Kemos, soke phangle che chaurren ta che chorren.

⁴⁷ A ka cherav te irinpe katar o phandipe ando vreme kai avel mai angle, gia phenel le o Del. Gia chinda o Del e Moabeke.