Jeremias 47 - Biblia ande chib Romani

Poroka katar e filisteura

¹ O Del dia orba e profetaia e Jeremiasea ta phenda leke katar e filisteura, mai anglal te zatril o Faraon o foro Gaza.

² Gia phenda o Del: Katar o norte bariol o pai ta ka llal zurale. Ka chingaren sa e phuv, e foro ta e llenen kai zivin andre, ta sa e llene kai si pe phuv ka roven ta ka kukin.

³ Pala e porrne e grastenge kai basena, pala e burkania katar lenge bordona, pala lenge tochkura kai basena, e dada jasarde e vlaga ta nasti arakhle pe chaurren.

⁴ Pala o llive kai avel te zatril sa e filisteonen, te zatril o Tiro ta o Sidon sa gola kai allive pomozin len. O Del ka zatril e filisteonen, golen katar o Kaftor kai si pasa e mora.

⁵ Jaliarde e Gaza, mulo o Askalon ta so achela katar e umalia. ¿Gachin ios ka rani tu tut?

⁶ ¡Ioi jarni e Devleki! ¿Soke ni ache? thov tut gurudino ta achi esmiro.

⁷ ¿Sar ka che esmiro a o Del bichalda tut te mare tut e Askalonea, ta e llenenchar kai si pasa e mora?