Jeremias 46 - Biblia ande chib Romani

O Ejipto jasarel ando Karkemis

¹ O Del dia orba e Jeremiasea, cheres sa e phuvia.

² Dia orba katar o Ejipto: Katar e boñikura katar Faraon o Nekao charo katar o Ejipto, kai saia pasa e len e Eufrates ando Karkemis ta kai zatrisarda le o Nabukodonosor charo katar e Babilonia, ando burs starto kana charoila o Joakim charo katar o Juda.

³ Lacharen tumenge o eskudo ta soia te arakhen tumen ta llan te marentumen.

⁴ Phanden tumare e kavisa tumare grastenge tumen kai llan pe lende, thoven e challa sastrune, chiston e lanse ta thoven pe tumende e patave zurale.

⁵ ¿Soke dikhlem len darane ta dena palpale? Lenge llene tromane daraile ta nasle ta ni dikhle pala pete. E dar saia pe suako rig, gia phenel o Del.

⁶ Te na nasel o lleno lokho ta te na llaltar o tromano. Ando norte pasa o pai katar o Eufrates eskombaie ta peletar.

⁷ ¿Ko si gua kai likel sargo iek len ta leke paia miskonpe sargo lena?

⁸ O Ejipto si kai buliol sargo e len ta leke paia miskonpe sargo lena, ta phenda: Ka likav, ka pherav e phuv, ka zatriv e foro ta golen kai zivin andre.

⁹ Te llan e gra ta te divonpe e bordona, te liken e tromane, e etiope ta e llene katar e Put te inllaren o eskudo, ta e llene katar o Lud te lacharen pe arkura ta te inllaren len.

¹⁰ A gua llive ka avel e Devleke kai si le sa e zor, iek llive kai ka pochinel pe dusmanonenge. Ta o jarni ka jal ta ka chaliol, ta ka matol lenge ratea, soke e Devleke kai si le sa e zor ka avel iek kurbano ande phuv katar o norte pasa o pai katar e len Eufrates.

¹¹ Lla ando Galaad ta le meriso chei chorrie katar o Ejipto. Ka pie but draba, a tu nasti sasto.

¹² E phuvia asun de kai san ando lallao, pe sa e phuv asundilo cho roipe, soke dui tromane maladile ta e li dui peletar pe phuv.

O Nabukodonosor del ando Ejipto te marelpe

¹³ O Del dia orba e profetaia e Jeremiaseke, katar o Nabukodonosor charo katar e Babilonia ta sar ka avel te zatril e phuv katar o Ejipto:

¹⁴ Phenen ando Ejipto ta cheren te llanenle ando Migdol. Cheren te llanenle i ando Menfis ta ando Tafnes ta phenen gia: Thou tut pe porrne ta lachar tut, soke o jarni ka zatril che foro.

¹⁵ ¿Soke zatrisarde che zidura? Nasti achile pe porrne, soke o Del espidia len.

¹⁶ But si e boñikura kai peren iek pe aver, ta phende: Uste ta iri amen kai amaro foro ta ando foro kai biandilam, nasa katar o jarni kai dobil amen.

¹⁷ Kote urkisarde: O Faraon o charo katar o Ejipto si zatrime. Mukla te nakhel o vreme.

¹⁸ Me ziviu phenel o Charo, vou ikhardol Del kai si le sa e zor, kai sargo o burdo o Tabor maskar e burdura ta sargo o burdo o Karmelo pasa e mora, isto gia ka avel vou.

¹⁹ Lacharen tumare ezgode te lla phangle, tumen kai zivin ando Ejipto, soke o Menfis ka avel zatrime lligo ni ka achel niko andre.

²⁰ O Ejipto si sargo iek sukar guruvorri, a e zatrania avel katar o norte.

²¹ Ta lenge tromane kai sea maskar lende i von irisaile sargo guruvorra thule, saurre nasle ta ni mardepe soke avilo pe lende o llive katar lengi zatrania, o llive te aven dukhade.

²² Ka basen sargo sapa, soke ka aven lenge dusmanura e toverenchar, sargo e llene kai aven te chinen e kasta.

²³ Ka chinen lenge kasta, gia phenel o Del, makar nasti te delpe andre ando vos, soke von ka aven mai but, ka aven sargo e langoste kai nasti llindon.

²⁴ O Ejipto ka achel ando lallao, ka avel dino kai o foro katar o norte.

²⁵ O Del kai si le sa e zor, o Del katar o Israel phenda: Me dukhavav e Amone del katar o Tebas, e Faraono, e Ejipto, leke delen ta sa golen kai uzdinpe ande lende.

²⁶ Ta ka adu len ande va katar gola kai roden te mundaren len, ande va katar o Nabukodonosor charo katar e Babilonia ta ande va katar leke sluge. Ta mapalal ka zivin kote sargo omanglal, gia phenenle o Del.

O Del ka braduil pe foro

²⁷ A tu na dara, tu san mo sluga o Jakob, na jasar e vlaga Israel, soke me ka braduiv tut duratar, ta i che porodo katar e phuv kai phangla len. Ta ka irilpe o Jakob ta ka lelpe letar o chiñipe ta ka llal leke sukar ta niko ni ka daravel le.

²⁸ Jakob, sluga murno, na dara, gia phenel o Del, soke me sem tuia. Soke ka zatriv sa e phuvien kai rispisardem tut maskar lende. A tut ni ka zatriv tut sa, ka zatriv tut ando chachipe. A ni ka mukav tut bi te le chi duk.