Jeremias 43 - Biblia ande chib Romani

Inllaren e Jeremiase ando Ejipto

¹ Kana o Jeremias phenda e foroke sa e alava kai phenda lenge o Gazda lengo Del,

² phenda gia e Azariaseke chavo katar o Osaias ta e Joananeke chavo katar o Kareaj ta sa e murusenge barikane phende gia e Jeremiaseke: Kojave, ni bichalda tut o Gazda amaro Del te phene te na lla te zivi ando Ejipto,

³ soke o Baruk chavo katar o Nerias del chuke amare orbe te sai de amen ande va katar e kaldeura, te mundaren amen o te inllar phangle ande Babilonia.

⁴ Ta o Joanan, sa e sudura katar e boñikura ta sa e llene katar o foro, ni kandie o avazi e Devleko kai phenela lenge te achen ande phuv katar o Juda.

⁵ Ta o Joanan ta sa e sudura katar e boñikura, lie sa e llenen kai achilea katar o Juda, kai irisailea katar sa e phuvia kai bichaldea len te sai zivin ando Juda,

⁶ murusen, diskinien ta minonen ta e charoke chorren ta suakone llene kai muklaia o Nebuzaradan o gazda katar e boñikura e Gedaliasea ta e profeta e Jeremiase ta e Baruke.

⁷ Ta die ando Ejipto soke ni kandie o avazi e Devleko ta resle llik kai o foro Tafnes.

⁸ Ta ando Tafnes o Del dia orba e Jeremiasea ta phenda leke:

⁹ Le barra bare ta uchar len e gliboia upral pe chikle kai si po udar katar o cher e Faraonoko ando Tafnes, cher le angla e llene katar o Juda,

¹⁰ ta phen lenge: Gia phenda o Del kai si le sa e zor, o Del katar o Israel: Me ka anav me sluga o Nabukodonosor charo katar e Babilonia ta ka thovav leko trono upral pe gala barra kai gurudem ta ka bariarel pi soba upral pe lende.

¹¹ Ka avel ta ka zatril e phuvia katar o Ejipto. Gola kai si lenge chinado te meren, ka meren, gola kai si lenge chinado te inllaren len phangle, ka inllaren len phangle ta gola kai si te meren po jarni, ka meren po jarni.

¹² Ta ka phabarel e chera katar e dela katar o Ejipto, len ka inllarel phangle ta ka chistol o Ejipto gia sar o chobano chistol po gertachi ta ka likel kotar ande pas.

¹³ Ta i ka phagel e slike katar o Bet Semes kai si ando Ejipto ta ka phabarel e chera katar e dela kai si ando Ejipto.