Jeremias 42 - Biblia ande chib Romani

O foro mangel katar o Jeremias te mililpe pala lende

¹ Avile sa e sudura katar e boñikura, ta o Jonatan chavo katar o Kareaj, o Azarias chavo katar o Osaias ta sa o foro, katar o mai baro, llik kai o mai minono,

² Ta phende gia e profetake e Jeremiaseke: Le akana amaro molipe ta molisao tu pala amende e Devleke che Gazdake pala sa gala llene, soke katar but llene achilam nesave gia sar dikhe,

³ mang e Devletar te sikavel amenge o drom katar si te phira ta so si te chera.

⁴ Ta o profeta o Jeremias phenda lenge: Asundem. Me ka moliv man e Gazdake tumaro Del, gia sar phenden, ta sogo ka phenel tumenge o Del me ka phenavle tumenge ta ni ka guruvav tumendar niso.

⁵ Ta von phende e Jeremiaseke: O Del te cherel so si orta, te na cherdam prema save avela e ezgoda kai cho o Del o Gazda ka bichalel tut te phene amenge.

⁶ Avela amenge drago o ni avela amenge drago, amen ka asuna o avazi katar amaro Del o Gazda kai bichaldam tut lete, soke amenge ka llal sukar te asundam o avazi katar amaro Del o Gazda.

O Del del anglal po molipe katar o Jeremias

⁷ Nakhle des llive kotar ta o Del dia orba e Jeremiasea.

⁸ Ta o Jeremias ikharda e Joanane chavo katar o Kareaj ta sa e sudonen katar e boñikura kai sea lea ta sa e foro, katar o mai minono llik kai o mai baro.

⁹ Ta phenda lenge: Goa phenda o Gazda o Del katar o Israel, kai tumen bichalden man te anav angla le tumaro molipe:

¹⁰ Te achilen esmiro ande gaia phuv, ka vazdav tumen ta ni ka peravav tumen, ka thovav tumen pe phuv ta ni ka ikanav tumen, soke dukhado sem pala so cherdem tumenge.

¹¹ Na daran katar o charo katar e Babilonia kai daravel tumen. Na daran letar phenda o Del, soke me sem tumenchar te ikanav tumen katar leke va ta te braduiv tumen.

¹² Ta ka avel mange zalba tumendar, ta leke ka avel zalba pala tumende ta ka cherel te irin tumen ande tumari phuv.

¹³ A te phenden: Ni ka zivi ande gaia phuv ta ni ka kanda so phenel o Gazda tumaro Del,

¹⁴ ta te phenden kai mangen te den ando Ejipto soke kote ni ka dikhen maripe, ta ni ka asunen sar basel e tuturuga ta ni ka nakhen bok ta kai kote ka zivin,

¹⁵ goleke akana asunen e alava e Devleke, tumen e llene kai achen katar o Juda: Gia phenel o Del kai si le sa e zor, o Del katar o Israel: Te boldinailen te llan te den ando Ejipto ta dien te zivin andre,

¹⁶ o jarni kai tumen daran letar, ka resel i kote ando Ejipto ta e bok kai tumen daran latar, ando Ejipto ka llal pala tumende ta kote ka meren.

¹⁷ Sa e llene kai ka boldiniaon te den ando Ejipto te zivin kote, ka meren po jarni, bokhatar ta nasualimatar. Niko lendar ni ka achel llundo ta niko ni ka nasel katar e duk kai me ka anav pe lende.

¹⁸ Soke gia phenda o Del kai si le sa e zor, o Del katar o Israel: Gia sar jolailem po foro katar o Jerusalem, isto gia ka joliaivav pe tumende kana ka den ando Ejipto. Ta sa e llene ka proketin tumen, ka chudinpe tumendar ta ka maren tumendar espurnia ta ni ka dikhen ios gava than.

¹⁹ O Del phenda gia tumendar, kai sen so achel katar o Juda: Te na llan ando Ejipto, allive phenavle tumenge.

²⁰ ¿Soke thoden tumaro zivoto po kojaipe? Isto tumen bichalden man te dav orba tumare Devlea ta phenden mange: Molisao e Gazdake amare Devleke pala amende ta phen amenge sa so ka phenel chuke amaro Del ta amen ka cherale.

²¹ Ta allive phendem le tumenge ta ni kandien o avazi katar o Gazda tumaro Del ta ni e ezgode kai bichalda man te phenav tumenge.

²² A kana trubul te llanen kai ka meren po jarni, bokhatar ta nasualimatar, ka meren kote kai mangena te zivin.