Jeremias 4 - Biblia ande chib Romani

O Del phenel te irinpe katar po bilachipe

¹ Te sai iria tut ioi Israel, phenel o Del, irisao mande. Ta te lea cho gadope kai si angla mande, ta te na llelan incha ta karinga,

² ta te jaia sovel ando anav e Devleko, pala o chachipe pala e kris ta pala so si orta, ondaka e phuvia ka aven blagosime ande leko anav ta ande le ka veselinpe.

³ Soke gia phenel o Del suakone muruseke katar o Juda ta katar o Jerusalem: Putaren e phuv tumenge ta na thoven e simiche maskar e karrne.

⁴ Manusalen katar o Juda ta katar o Jerusalem, cheren tumenge e sirkunsision pala o Del ta phenen kai me sem tumaro Gazda, thoven ande tumaro lio te achardol o alav kai diem tumen, te na avelpe kai mi joli ka likel sargo iag ta ka phabol ta ni ka avel ko te mundarel la pala e ezgode bilache kai tumen cheren.

Mangen te den ta te marenpe ando Juda

⁵ Den orba ando Juda, cheren te asundol ando Jerusalem ta phenen: Basalen e tuturuga pe phuv, den orba ande iek than ta phenen: Chidiniaiva ta da ande forura zidome.

⁶ Vazden o bariako ando Sion, nasen ta na achen, soke me cherav te avel o bilachipe katar o norte ta bari zatrania.

⁷ O liono likel kai saia gurudino, ta gua kai zatril e phuvien llal ta likisto katar po than te mukel pusti chi phuv, che phuvia ka achen puste ta niko ni ka zivil andre.

⁸ Goleke thoven patave zalosne, roven ta kukin zalbatar soke e joli e Devleki ni llelitar amendar.

⁹ O Del phenel kai ande gua llive, o charo ka jasarel e zor ta i leke sudura, ta e popura nasti ka pachan so llalpe ta e poraukura ka chudinpe.

¹⁰ Ta phendem: ¡Ioi, ioi Devla Gazda! chachimaia kojadan zurale gale foro ta i o Jerusaleme kana phendan: Pas ka avel tumen, soke o jarni reslo llik kai o lio.

¹¹ Ande gua vreme ka phenen gale foroke ta i e Jerusalemeke: Iek balav suki avili upral katar o pusto kai e chei me foroki, inai e balav kai chistolpe o lliu kana chuden le upre.

¹² E balav kai me ka anav ka avel mai bari, ta akana me ka chinav kris pe lende.

E dusmanura thovenpe truial katar o Israel

¹³ Ka likel sargo oblako, ta leko bordon sargo bari balav, leke gra si mai lokhe neko e agile. ¡Tesko amenge soke chinade san te zatrin amen!

¹⁴ Jalav cho lio katar o bilachipe Jerusalem, te sai ave braduime. ¿Gachin ios ka muke te aven maskar tute e mislura bilache?

¹⁵ Soke iek avazi anel e lachi viasta katar o Dan ta cherel te asundol e zatrania katar o burdo katar o Efrain.

¹⁶ Phenen gia e phuvienge: Cheren te asundol ando Jerusalem gia: Duratar aven boñikura katar aver phuvia, ta ka urkin pe forura katar o Juda.

¹⁷ Thode pe truial katar o Juda sargo llene kai arakhen e umalia soke ni kandie man, gia phenel le o Del.

¹⁸ Cho drom ta e ezgode kai chere cherde chuke gaia ezgoda, gava si cho bilachipe, goleke e duk ka del andre ande cho lio.

Duk katar o Jerusalem pala po foro

¹⁹ ¡Chinel man e duk ande mo lli! Dukhan man e zile katar mo lio, mo lio izdral andre ande mande, ni ka achav, soke mo duo asundem sar basel e tuturuga ta asunda e avazura katar o maripe.

²⁰ Phenen ka avel phagipe pala o phagipe, soke sa e phuv si zatrime, oma si zatrime me chare ta si zatrime me chitura.

²¹ ¿Gachin ios si te dikhav o bariako, ka asunav sar basel e tuturuga?

²² Soke mo foro si dilo, ni pinllarde man, von si chave dile ta ni acharen, von si bizai te cheren o bilachipe, a ni llangle te cheren o lachipe.

O Jeremias dikhel e zatrania kai avel

²³ Dikhlem pe phuv, ta saia pusti ta chuchi, dikhlem po miloso, ta ni saia le villelo.

²⁴ Dikhlem pe burdura ta izdrana, ta sa e burdura avile zatrime.

²⁵ Dikhlem ta ni saia ni iek manus ta sa e chiriklia lleleatar.

²⁶ Dikhlem pe umal zeleni kai cherdili sargo o pusto ta sa leke forura sea zatrime angla o Del, angla leki joli kai phabola.

²⁷ Soke phenda le Del gia: Sa e phuv ka avel zatrime, a ni ka zatriv la sa.

²⁸ Goleke ka avel zalosno sa e phuv ta ando miloso upre ka avel truniariko, soke diem orba, mislisailem ta ni boldiem mo mislo ta ni ka dav man palpale katar gaia ezgoda.

²⁹ Kana asundilo sar aven e llene pe gra ta e llene kai chuden e llide, sa o foro naslo, die andre ando vos maskar e kasta, ta likiste pe barra, sa e llene lleletar katar e forura ta ni achilo ni iek lleno te zivil andre.

³⁰ A tu, kai sai zatrime, ¿So ka chere? I te furiadoa ando lolipe, i te lacharea tut ando sunakai, i te makhea che akha, samo gia lachare tut, ni ka mol tut niso e llenenge kai volina tut ta ka roden te mundaren tut.

³¹ Soke asundem iek avazi sargo katar iek diskinia kai maladol lake, urkipe sargo katar iek kai bianel e purvo drom, avazi katar e chei katar o Sion kai rovel ta inzarel pe va ta phenel: ¡Tesko mange akana! kai inai man vlaga pala e llene kai aven te mundaren.