Jeremias 38 - Biblia ande chib Romani

Chuden e Jeremiase ande iek bunari suko

¹ O Sefatias chavo katar o Matan, o Gedalias chavo katar o Pasur, o Jukal chavo katar o Selemias ta o Pasur chavo katar o Malkias, asunde kai o Jeremias phenela gia sa e foroke:

² Gia phenda o Del: Kogo achela ande gava foro ka merel po jarni, O bokhatar, o nasualimatar. A ko ka llal pe rig katar e kaldeura ka zivil, soke lengo zivoto ka avel lengo chari, ta ka zivin.

³ Gia phenda o Del: Chachimaia gava foro ka avel dino ande va katar e boñikura e charoke katar e Babilonia, ta ka lel le.

⁴ Ta e sudura phende e charoke: Te merel akana gava manus, soke cherel te jasaren e vlaga e llene kai achen ande gava foro kai llan te marenpe, ta sa e llene katar o foro, pala e orbe kai phenel lenge, soke gava lleno ni rodel a pas gale foroke, vou rodel o bilachipe.

⁵ Ta o charo o Sedekias phenda: Vou si ande tumare va, me nasti cherav tumenge niso.

⁶ Ondaka von istarde e Jeremiase ta chudie le ando bunari katar o Malkias chavo katar o Malkias chavo katar o Amelek, ta thode le andre e solenchar. Ta ando bunari ni saia pai, andre saia glibo, ta o Jeremias achilo andre ando glibo.

⁷ Kana o charo besela po udar katar o Benjamin, O etiope o Ebed Melek eunuko katar o charoko cher kai vou thodaia e Jeremiase ando bunari,

⁸ likisto katar e charoko cher ta phenda gia e charoke:

⁹ Gazda murno ta charo, ni cherde sukar ande sa e ezgode kai cherde e profetake e Jeremiaseke, kai chudie le ando bunari, ta kote ka merel bokhatar soke inai ios marrno ando foro.

¹⁰ Ondaka o charo bichalda isto gole etiope o Ebed Melek, ta phenda leke: Le tuia tranda llene katar ta ikan katar o bunari e profeta e Jeremiase, mai anglal te merel.

¹¹ Ta inllarda pea e llenen ta dia ande charoko cher ta katar o than kai guruven e patave ikande kirpe ta patave purane ta chudia len ando bunari kai o Jeremias iekhe solenchar.

¹² Ta o etiope phenda e Jeremiaseke: Thou gala kirpe ta patave purane tala che pakha telal katar e sole ta o Jeremias cherda le.

¹³ Ta gia vazdie e Jeremiase ta ikande le e solenchar katar o bunari ta vou achilo ande bar katar e rubie.

O Sedekias bichalel te ikharen e Jeremiase

¹⁴ Mapalal o charo o Sedekias phenda te anen e profeta e Jeremiase kote kai saia vou, kai o trito than katar delpe andre ando cher e Devleko. Ta o charo phenda e Jeremiaseke: Ka puchav tut iek ezgoda, ta mangav te phen mange sa so llane.

¹⁵ Ta o Jeremias phenda leke: I te phendem chuke sa, tu ka mundare man, a te phendem chuke so te chere ni ka thove mange sama.

¹⁶ Ta o charo o Sedekias jala sovel e Jeremiaseke po chorial ta phenda leke: Ando anav e Devleko kai dia amen o zivoto, phenav chuke kai ni ka mundarav tut ta ni ka dav tut ande va katar gala llene kai roden te mundaren tut.

¹⁷ Ondaka o Jeremias phenda e Sedekiaseke: Goa phenda Gazda o Del kai si le sa e zor, Del katar o Israel: Te dian tut isto akana kai e sudura katar o charo katar e Babilonia, ka zivi ta ni ka phabaren gava foro ta ka zivi tu ta chi familia.

¹⁸ A te na dian tut kai e sudura katar o charo katar e Babilonia, gava foro ka avel dino ande va katar e kaldeura ta ka phabaren la ta nasti ka nase katar leke va.

¹⁹ Ta o charo o Sedekias phenda e Jeremiaseke: Dar mange katar e judiura kai llele pe rig katar e kaldeura, soke sai den man ande lenge va ta ka muken man ando lallao.

²⁰ Ta o Jeremias phanda: Ni ka den tut nikate. Asun akana o alav e Devleke kai phenav chuke ta ka llal chuke sukar ta ka zivi.

²¹ A te na manglan te de tut, gava si so sikada mange o Del:

²² Sa e diskinie kai achile ando cher katar o charo katar o Juda, ka aven ikande ta ka den len kai e sudura katar o charo katar e Babilonia ta isto e diskinie ka phenen: E Mai lache pharnave katar o charo kojade le ta dobisarde le. Mukle te den ando glibo leke porrne, die le e zea ta mukle le.

²³ Ta o Jeremias ni achilo ta phenda: Sa che diskinie ta che chaurre ka aven dine kai e kaldeura ta tu nasti ka nase katar lenge va, o charo katar e Babilonia ka phandel tut ta ka phabarel gava foro.

²⁴ Ta o Sedekias phenda e Jeremiaseke: Te na llanel niko so phendan mange ta ni ka mere.

²⁵ A te llangle e sudura kai diem tuia orba ta te avile tute ta te phende chuke: Phen amenge akana so phendan e charoke ta so phenda vou chuke ta na kojav amen, te na mundara tut,

²⁶ tu ka phene lenge gia: Molisailem e charoke te na bichalel man kai e Jonataneko cher soke kote ka merav.

²⁷ Ondaka avile sa e sudura kai o Jeremias ta puchle le, a vou phenda gia sar phenda leke o charo. Ta lleletar soke goia orba ni asundili.

²⁸ Ta o Jeremias achilo ande bar katar e rubie lligo ni dobisarde peke o Jerusalem.