Jeremias 37 - Biblia ande chib Romani

O Sedekias mangel vareso katar o Jeremias

¹ O charo o Nabukodonosor thoda e te avel charo ando Juda e Sedekiase chavo katar o Josias, po than katar o Konias chavo katar o Joakim.

² A ni o Sedekias ni leke sluge ni o foro, ni kandie e alava kai o Del bichalda lenge pala o Jeremias.

³ Ta o charo o Sedekias bichalda e Jukale chavo katar o Selemias ta e popo e Sofoniase chavo katar o Maasias, te phenen gia e profetake e Jeremiaseke: Molisao pala amende akana e Devleke amaro Del.

⁴ Ta o Jeremias llala pe suako rig maskar e llene ando foro, soke nios ni thodea le ande rubie.

⁵ A kana e boñikura katar o Faraon likiste katar o Ejipto, ta llangle le e kaldeura kai thodeape truial katar o Jerusalem, nasle katar o Jerusalem.

⁶ Ondaka o Del dia orba e profetaia e Jeremiasea ta phenda leke gia:

⁷ Gia phenda o Gazda o Del katar o Israel: Ka phenen gia e charoke katar o Juda kai bichalda tumen te puchen man: E boñikura e Faraonoke kai likistea te pomozin tumen, irisaile kai pi phuv ando Ejipto.

⁸ Ta e kaldeura pale ka aven te marenpe tumenchar ta ka lenle ta ka phabaren la.

⁹ Gia phenda o Del: Na kojaven isto tumen, ta na phenen: E kaldeura ka durion amendar. Soke ni ka durion.

¹⁰ Soke i te dukhaven sa e boñikonen katar e kaldeura kai marenpe tumenchar ta te achile nesave murusa ranime, suako iek lendar ka ustel katar pi chara ta ka llal te phabarel o foro.

Phanden e Jeremiase

¹¹ Ta kana e boñikura katar e kaldeura lleletar katar o Jerusalem pala e boñikura e Faraonoke,

¹² o Jeremias llalatar katar o Jerusalem kai e phuv katar o Benjamin te na avel ios pasa o foro.

¹³ Ta kana avilo kai o udar katar o Benjamin, kote saia iek gazda katar e boñikura kai ikhardola Irias chavo katar o Selemias ta unuko katar o Jananias, ta istarda le ta phangla e profeta e Jeremiase ta phenda leke: ¡Tu llatar pe rig katar e kaldeura!

¹⁴ Ta o Jeremias phenda: Iok, ni llav pe rig katar e kaldeura. A o Irias ni asunda le ta phangla le ta inllarda le angla e sudura.

¹⁵ Ta e sudura jolaile po Jeremias, chalade le e bichoia ta phangle le ando cher katar o pismiri o Jonatan, soke cherdaia po cher rubie.

¹⁶ Ta o Jeremias dia ando cher katar o bunari ta ande sobe kai si telal katar e phuv. Ta kana vou saia andre but llivesa,

¹⁷ o charo o Sedekias bichalda llenen ta ikande le. Ta o charo ande po cher puchla le po chorial, ta phenda leke: ¿Dia chuke orba o Del? Ta o Jeremias phenda: Ea. Ta phenda vareso ios: Ka ave dino ande va katar o charo katar e Babilonia.

¹⁸ Ta o Jeremias phenda e charoke e Sedekiaseke: ¿Savo bilachipe cherdem chuke ta che slugenge ta gale foroke te thove man ande rubie?

¹⁹ ¿Kaitalen che poraukura, gola kai porokin chuke ta phenen: Ni ka avel o charo katar e Babilonia te marelpe tumenchar ni gale phuviaia?

²⁰ Akana asun man, moliv man chuke kai san gazda ta mo charo. Asun sar moliv man chuke, na cher te inllaren man pale kai o cher katar o pismiri o Jonatan, te na merav kote.

²¹ Ondaka o charo o Sedekias phenda te phanden le ande bar katar e rubie, ta cherda te den le iek marrno ando llive, katar o drom e llenengo kai cheren marrno, lligo ni ka getolpe sa o marrno katar o foro. Ta o Jeremias achilo ande bar katar e rubie.