Jeremias 35 - Biblia ande chib Romani

O Jeremias ta e rekabitura

¹ O Del dia orba e Jeremiasea ande llivesa katar o Joasim chavo katar o Josias, charo katar o Juda, ta phenda:

² Lla kai e rekabitura ta de lenchar orba ta thov len ando cher e Devleko, ande iek katar e sobe ta de len te pien mol.

³ Ondaka liem manchar e Jazaniase chavo katar o Jeremias, ta unuko katar Jabasinias, leke phlalen ta sa leke chaven ta sa e vicha katar e rekabitura,

⁴ ta inllardem len kai o cher e Devleko, ande soba katar e chave katar o Iojanan chavo katar o Lligdalias manus e Devleko, ta besela pasa e soba katar e sudura kai si upral pe soba katar o Maseias chavo katar o Salum kai arakhela o udar.

⁵ Ta thodem angla e chave katar e familia katar e rekabitura tasura pherde mol, ta phendem lenge: Pien mol.

⁶ A von phende: Ni ka pia mol, soke amaro dad o Jonadab chavo katar o Rekab mukla pe amende alava ta phenda: Ni ka pien mol nikada tumen ni tumare chaurre,

⁷ ta ni ka cheren chera, ta ni ka avel tumen umal te thoven te barion e simiche, ta ni ka thoven te barion e drakha, ta ni ka avel tumari, soke ka zivin ande chare sa tumaro zivoto, te zivin but burs pe phuv kai tumen zivin.

⁸ Ta amen kandiam o alav katar amaro dad o Jonadab chavo katar o Rekab anda sa so phenda amenge, te na pia mol sa amaro zivoto, ni amen, ni amare rromia, ni amare chaurre ni amare chorra,

⁹ ta te na chera amenge chera te zivi ande lende ta te na avel amen drakha ni phuv ni umal te barion e simiche,

¹⁰ Goleke zivi ande chare ta kandiam ta cherda sa prema so phenda amenge amaro dad o Jonadab.

¹¹ A kana o Nabukodonosor charo katar e Babilonia avilo pe gaia phuv, phendam: Aven te gurudiva ando Jerusalem, te na dikhen amen e boñikura katar e kaldeura ta katar e boñikura katar e llene katar e Siria, ta achilam ando Jerusalem.

¹² Avilo o alav e Devleko kai o Jeremias ta phenda:

¹³ Gia phenda o Del kai si le sa e zor, Del katar o Israel: Lla ta phen e murusenge katar o Juda ta e llenenge kai zivin ando Juda ta e llenenge kai zivin ando Jerusalem. ¿Ni ka sikon te kande me alava? Gia phenda o Del.

¹⁴ Zuralo saia o alav katar o Jonadab chavo katar o Rekab, kai mukla alava pe pe chave te na pien mol ta ni pile mol llik akana, te kanden o alav pe dadeko, a me diem tumenchar orba chak omanglal te ni achav, ta ni asunden man.

¹⁵ Ta bichaldem sa tumen kai sen me poraukura, omanglal ta ni achilem te phenav tumenge: Irin tumen suako iek katar po bilacho drom ta lacharen so cherden ta na llan pala e dela kojamne te radin lenge ta ka zivin ande phuv kai diem tumen ta tumare paponen, a ni thoden mange sama ta ni asunden man.

¹⁶ Chachimaia e chave katar o Jonadab chavo katar o Rekab saia lenge zuralo o alav kai mukla lenge lengo dad, a gava foro ni kandia man.

¹⁷ Goleke, gia phenda o Del kai si le sa e zor, Del katar o Israel: Me ka anav po Juda ta pe sa e llene kai zivin ando Jerusalem sa o bilachipe kai phendem lendar, soke diem lenge orba ta ni asunde man, diem len mui ta ni die anglal.

¹⁸ Ta o Jeremias phenda gia e llenenge katar e Rekabitura: Gia phenda o Del kai si le sa e zor, Del katar o Israel: Soke kandien e alava katar Jonadab tumaro dad ta cherden sa e zakonura kai dia tumen, ta cherden prema sa so phenda tumenge,

¹⁹ goleke, gia phenda o Del kai si le sa e zor, Del katar o Israel: Ni ka nakhel iek llive bi te avel angla mande iek murus katar o Jonadab chavo katar o Rekab.