Jeremias 34 - Biblia ande chib Romani

Iek orba e charoke o Sedekiaseke

¹ Alav e Devleko kai o Jeremias kana o Nabukodonosor charo katar e Babilonia ta sa leke boñikura, ta sa e phuvia e suetoke kai sea tala leko va, ta sa e forura, marenape e Jerusalemea ta sa leke foronenchar, ta phenda:

² Gia phenda o Del katar o Israel: Lla ta de orba e Sedekiasea charo katar o Juda, ta phen leke: Gia phenda o Del: Me ka dav gava foro ande va katar o charo katar e Babilonia ta ka phabarel la,

³ ta ni ka nase katar leko va, soke ka phandel tut ta ka ave dino ande leko va ta ka dikhe pe akha katar o charo katar e Babilonia ta pasa tute ka del tuia orba ta ka de ande Babilonia.

⁴ Goleke, asun e alava e Devleko Sedekias charo katar o Juda: Gia phenda tutar o Del: Ni ka mere po jarni.

⁵ Ka mere ande pas, ta gia sar phabarde e patrorra kai khanden sukar, isto gia ka phabaren len pala tute, ta ka roven chuke ta ka phenen, ¡Ioi, gazda! Soke me phendem le, gia phenel o Del.

⁶ Ta dia orba o profeta o Jeremias e Sedekias charo katar o Juda sa gala alava ando Jerusalem.

⁷ Ta e boñikura katar o charo katar e Babilonia marelape e foroia katar o Jerusalem ta sa e foronenchar katar o Juda kai achilea, o Lakis ta o Aseka, soke gala achilea katar e forura zidome ando Juda.

Phagle o alav kai saia te mukliaren e ebreonen kai sea phangle

⁸ O alav e Devleko avilo kai o Jeremias, mapalal kana o charo o Sedekias dia po alav sa e foroke ando Jerusalem ta phenda te aven mukliarde,

⁹ te mukliarel suako lleno pe sluga murus ta pe sluga diskinia, ebreo o ebrea, te na thovel niko sluga pe phlalen e judionen te radin lenge.

¹⁰ Ta kana asunde gaia orba e mai bare sudura, ta sa o foro kai dia po alav te mukliarel suako lleno pe sluga muruse ta suako lleno pe sluga diskinia, ta te na thoven len sluge, kandie ta mukle len.

¹¹ A mapalal diepe palpale, ta cherde te irinpe e sluge murus ta diskinie kai mukliardea ta thode len te radin lenge.

¹² Ondaka avilo o alav e Devleko kai o Jeremias ta phenda leke:

¹³ Gia phenel o Del o Gazda katar o Israel: Me diem mo alav tumare paponenchar o llive kai ikandem len katar o Ejipto, kana sea sluge, ta phenda:

¹⁴ Pala e efta burs suako lleno ka mukel pe phlale ebreo kai bichinde leke, ka radil leke sov burs ta ka mukliarel le, a tumare popura ni asunde man, ta ni thode sama.

¹⁵ A tumen allive cherdilena aver ta cherden o lachipe angla me akha ta suako lleno tumendar phenden kai ka mukliarel gole kai si pasa le, ta dien tumaro alav angla mande, ando cher kote kai ikharen man.

¹⁶ A tumen boldinailen ta kuslen mo anav ta suako iek pale lia pe sluga muruse ta suako iek pe sluga diskinia kai mukliardena te cheren sogo mangena ta cherden len sluge te radin tumenge.

¹⁷ Goleke o Del phenda gia: Tumen ni asunden man te mukliarel suako iek tumendar pe phlale, ta suako iek gole kai si pasa le, a me, phenel o Del, ka mukliarav o jarni, ta o nasualipe ta e bok, ta ka sa e forura ka avel lenge lallao tumendar.

¹⁸ Ta ka dav gole llenen kai phagle mo alav kai diem len, kai ni cherde so phenen e alava katar o alav kai diem len kana sea angla mande, ta chinde po dopas o telcho ta nakhle maskar e dui kotora:

¹⁹ suakone katar e mai preche llene katar o Juda ta e mai preche katar o Jerusalem, e sudonen ta e poponen ta sa e foro katar e phuv kai nakhlo po maskaral katar o telcho,

²⁰ ka dav len ande va katar lenge dusmanura ta ande va katar gola kai mangen te mundaren len, ta lenge esnage mule ka jan len e chiriklia e milosoke ta e zivirinie kai si pe phuv.

²¹ A e Sedekiase charo katar o Juda ta leke sudonen ka dav len ande va katar lenge dusmanura ta ande va katar gola kai mangen te mundaren len, ta ande va katar e boñikura katar o charo katar e Babilonia kai llelotar tumendar.

²² Me ka phenav, phenel o Del, ta ka cherav te irinpe kai gava foro ta ka marenpe lea ta ka len le ta ka phabaren le, ta ka mukav puste e forura katar o Juda, ta ni ka achel niko ande lende.