Jeremias 33 - Biblia ande chib Romani

E orba katar so si te avel

¹ Pale o duito avilo o alav e Devleko kai o Jeremias kana saia phanglo ande bar katar e rubie ta phenda leke:

² Gia phenda o Del, kai cherda e phuv, o Del kai cherda la te achel pe po than, leko anav si o Del:

³ Man mandar ta me ka dav chuke anglal ta ka sikavav chuke ezgode kai si gurudine kai tu ni pinllare.

⁴ Soke o Gazda o Del katar o Israel phenda gia katar e chera katar gava foro ta katar e chera katar e charura e Judaeke, kai si peradine e kastenchar ta e toverenchar.

⁵ Soke avile te marenpe e Kaldeonenchar, te pherdol esnage katar e manusa mule, gola kai me dukhadem len me silnomaia ta me jolinaia, soke gurudem mo mui katar gava foro pala lengo bilachipe.

⁶ Me ka anav lenge sastipe ta drab, ta ka sastarav len, ta ka sikavav lenge but pas ta chachipe.

⁷ Ta ka cherav te irinpe e phangle katar o Juda ta e phangle katar o Israel, ta ka cherav te aven pale gia sar sea omanglal.

⁸ Ta ka chistou len katar sa o bilachipe kai cherde mange, ta kai ni kandie man.

⁹ Ta o anav katar o Jerusalem ka avel mange blagosipe ta baripe maskar sa e forura kai si pe phuv, kai asunde sa o lachipe kai me cherav lenge, ta ka daran ta ka izdran pala sa o lachipe ta sa e pas kai me ka dav len.

¹⁰ Gia phenda o Del: Pe gava than, kai tumen phenen kai si pusto ta kai inai manusa ni zivirinie, ande forura katar o Juda ta pe droma katar o Jerusalem, kai si zatrime ta inai manusa te zivin kote ni zivirinie,

¹¹ ka asundon avazura vesele, avazi katar e bori ta katar o llamutro, avazi katar e llene kai phenen: Blagosin e Devle kai si le sa e zor, soke o Del si lacho, soke leko volipe si ostade, ka asundol o avazi katar gola kai ka den fala ezgodenchar kai si dine kai o cher e Devleko. Soke pale ka anav e llenen kai sea phangle ando foro gia sar cherdem le omanglal, gia phenda le o Del:

¹² Gia phenel o Del kai si le sa e zor: Pe gava than pusto, kai inai manusa ni zivirinie, ta ande sa leke forura, ka aven cherorra katar e chobanura kai ka inllaren e stoka bakrengi te jan e char.

¹³ Ande forura kai si pe burdura, ande forura kai si ando Sefala, ande forura katar o Negev, ande phuv katar o Benjamin, ta truial katar o Jerusalem ta ande forura katar o Juda ka nakhen e bakre katar e va golenge kai ka llinen len, gia phenda le o Del.

¹⁴ Ka aven llivesa, phenel o Del, kai me ka cherav e alava kai phendem e llenenge katar o Israel ta e llenenge katar o Juda.

¹⁵ Ande gola llivesa ta ande gua vreme ka cherav te likel katar e vicha e Davideki iek lleno chacho kai ka cherel so si orta ta ka anel o chachipe pe phuv.

¹⁶ Ande gola llivesa o Juda ka avel braduime, ta o Jerusalem ka zivil bidarako, ka ikharen la: O Del si amaro chachipe.

¹⁷ Soke o Del o Gazda phenda: Nikada ni ka achel chucho o trono e Davideko bi te besel pe lete iek murus katar o Israel.

¹⁸ Ni ka nakhel ni iek lleno katar e popura ta katar e levita te bi te del angla mande kurbano phabardo ta te phabarel so si dino, ta te cherel kurbano suako llive.

¹⁹ Avilo o alav e Devleko kai o Jeremias ta phenda:

²⁰ Gia phenda Del: Te phagea mo alav kai si man e llivesea ta mo alav kai si man e riatea, ta te na avel ni llive ni riat ande po vreme,

²¹ sai phagava i mo alav kai si man e Davidea, te na avel le porodo te charoil pe leko trono, ta mo alav e levitonenchar ta e poponenchar, kai radin mange.

²² Gia sar nasti llindon e cheraia e milosoke ta sar nasti llindol e chisai e moraki, gia ka cherav te bariol o porodo katar mo sluga o David ta e levitura kai ka radin mange.

²³ Avilo o alav e Devleko kai o Jeremias ta phenda:

²⁴ ¿Ni dikhlan so del orba gava foro, kai phenel: Dui viche kai o Del esvirisarda chudia len? ta von ni thoven sama me foroke, ta ni dikhen le ios sargo iek foro.

²⁵ Gia phenda o Del: Te na avel ios mo alav e llivesea ta e riatea, ta na thodem e zakonura katar o miloso ta e phuv,

²⁶ ni ka avel ni o porodo katar o Jakob ni katar o David mo sluga, te lav katar leko porodo ko te avel gazda pe po porodo kai ka avel mai angle e Abraame, e Isake ta e Jakobo. Soke ka cherav te irinpe lenge phanglen, ta ka avel mange zalba lendar.