Jeremias 32 - Biblia ande chib Romani

O Jeremias chinel iek bar

¹ O Del dia orba e o Jeremias, o burs desto katar o Sedekias charo katar o Juda, kai saia o burs desojtoto katar o Nabukodonosor.

² Ondaka e boñikura e charoke katar e Babilonia thodepe truial katar o Jerusalem ta o profeta o Jeremias saia phanglo ande bar katar e rubie kai sea ando cher e charoko katar o Juda.

³ O Sedekias charo katar o Juda phanglaia le soke phenda gia: Gia phenda o Del: Me dav gale phuvia ande va e charoke katar e Babilonia ta ka lel la,

⁴ ta o Sedekias charo katar o Juda ni ka nasel katar e va e charoko katar e Kaldeura, soke ka avel dino ande va katar o charo katar e Babilonia ta ka del lea orba ta ka dikhel leko mui ta leke akha,

⁵ ta ka inllarel e Sedekiase ande Babilonia ta kote ka achel lligo ni ka avav te dikhav le, ta te mardan tut e kaldeonenchar, ni ka llal chuke sukar, gia phenel le o Del.

⁶ O Jeremias phenda: Alav e Devleko avilo mande:

⁷ O Janamel chavo katar cho kako o Samuel avel tute ta phenel: Chin mi phuv kai si ando Anatot, soke tu sai chinela.

⁸ Ta avilo mande o Janamel chavo katar mo kako, gia sar phenda o Del, pe bar katar e rubie ta phenda mange: Chin akana mi phuv kai si ando Anatot ande phuv katar Benjamin, soke chiri sai avel, ta tu sai pochinela, chin la chuke. Ondaka llanglem kai saia o alav e Devleko.

⁹ Ta chindem e phuv katar o Janamel, chavo katar mo kako, kai saia ando Anatot, ta phariadem leke e love, ta pochindem desefta tolaria rupune.

¹⁰ Ta pisisardem o lil ta thodem pe late o sello ta andem llenen te pisin i von pe late, ta phariadem e love angla lende.

¹¹ Mapalal liem o lil katar e arli, pe lete saia o sello prema o zakono ta gia sar sam sikade ta aver lil putardo isto sargo o gua kai si phanglo.

¹² Ta diem o lil katar e arli kai o Baruk chavo katar Nerias ta unuko katar o Majseias, angla o Janamel ta angla e llene kai pisisarde po lil, angla sa e judiura kai sea angla e rubie.

¹³ Ta angla lende phendem gia e Barukeke:

¹⁴ Gia phenda o Del kai si le sa e zor, o Del katar o Israel: Le gala lila katar e arli, gava lil kai si pe lete o sello, ta o gua kai si putardo ta thov len ande iek piri chikaki te na murinpe but vreme,

¹⁵ Soke gia phenda o Del kai si le sa e zor, o Del katar o Israel: Ka chinen chera, phuvia ta umalia drakhenge ande gaia phuv.

Molipe katar o Jeremias

¹⁶ Ta kana diem o lil katar e arli kai o Baruk chavo katar o Nerias, molisailem e Devleke ta phendem:

¹⁷ ¡Ioi Gazda Devla! Tu inzardan cho va ta cherdan o miloso ta e phuv che bare, tu sai chere sogo mange,

¹⁸ kai si chuke zalba katar but llene ta dukhave e chaven pala lenge dadengo bilachipe, baro Del, zuralo, Del kai si le sa e zor si leko anav,

¹⁹ baro ande orba ta glamno ande so chere, soke tu dikhe sa so cheren e manusa, ta de suakone prema so cherel,

²⁰ tu cherdan te dikhon bare ezgode ando Ejipto llik allive, ta ando Israel, ta maskar e manusa, ta cho anav barilo gia sar llangliolpe allive.

²¹ Ta ikandan katar o Ejipto che foro e Israele bare ezgodenchar kai dikhon, che zurale vastea ta bare daraia,

²² ta dian len gaia phuv, ta dian cho alav lenge dadenge kai ka de la lenge, e phuv kai llal sargo pai o thud ta o aullin,

²³ ta die ande goia phuv ta veselisaile, a ni asunde cho avazi, ta ni llele prema cho zakono, ni cherde so phendan lenge, goleke cherdan te perel pe lende sa gava bilachipe.

²⁴ E kaldeura ka den ando foro kastenchar ta ka len le peke, ta ka avel dino o foro ande va katar e kaldeura kai marenpe lea, e jarniea, e bokhaia ta nasualimaia, gaia ezgoda cherdili gia sar tu phendan ta akana dikhe la isto tu.

²⁵ ¡Ioi Gazda Devla! ¿A tu phendan mange: Chin chuke e phuv e lovenchar, ta thov llenen te dikhen, a e phuv si dini ande va katar e kaldeura?

²⁶ Ta avilo o alav e Devleko kai o Jeremias ta phenda leke:

²⁷ Me sem o Gazda, o Del sa e manusengo, ¿Si vareso kai nasti cherav?

²⁸ Goleke, gia phenda o Del: Ka dav gale phuvia ande va katar e kaldeura, ta ando va katar o Nabukodonosor charo katar e Babilonia, ta ka lel la.

²⁹ Ta ka aven e kaldeura kai marenpe gale phuviaia, ta ka phabaren la, ka phabaren i e chera kai upral dena o thuv e Baaleke ta chudie e mol avere delenge, te joliaren man.

³⁰ Soke e chave katar o Israel ta e chave katar o Juda cherde samo o bilachipe angla me akha sar kana sea terne, soke e chave katar o Israel samo joliarde man e bilachimaia kai cheren pe vastenchar, gia phenda le o Del.

³¹ Soke gava foro dia man joli ta joliarda man sar kana vazdie le llik akana, goleke ka lav le angla me akha,

³² pala sa o bilachipe katar e chave e Israeleke ta katar e chave e Judaeke, kai joliarde man, von, lenge charura, lenge sudura, lenge popura ta lenge poraukura, ta e murusa katar o Juda ta e llene kai zivin ando Jerusalem.

³³ Von die man e zea ta ni die po mui, ta kana sikavava len rano bi te achav, ni asunde man te sikon.

³⁴ Ta i thode o gadope ando cher kai phendol mo anav, ta meliarde le.

³⁵ Ta cherde altarura e Baaleke, kai sea ande umal katar o chavo e Inomeko, te nakhaven katar e iag pe chaurren ta pe chorren e Molokeke, a goia ezgoda me ni phendem lenge techeren, ta ni saia ni ande mo mislo kai ka cherenle.

Iek alav katar pala so si te avel

³⁶ Ta pala sa gala ezgode akana o Gazda ta Del katar o Israel phenel gale foroke, kai tumen phenen: Ka avel dino ande va katar o charo e Babiloniako e jarniea, e bokhaia ta e nasualimaia:

³⁷ Me ka chidav tumen katar sa e phuvia kai chudiem tumen ande mo silnope, mi joli ta mi bari duk, ta ka cherav te irin tumen kai gava than ta ka cherav te zivin kate bidarako,

³⁸ von ka aven mo foro ta me ka avav lengo Del.

³⁹ Ta ka dav len iek lio, ta iek drom te daran mandar ostade, te llal lenge sukar ta i lenge chaurrenge mapalal lendar.

⁴⁰ Ta ka dav len mo alav ostade, kai ni ka dav man palpale te cherav lenge o lachipe, ta ka thovav mi dar ande lengo lio, te na durion mandar.

⁴¹ Ta ka veseliu man lenchar pala o lachipe kai ka dav len, ta ka thovav len chachimaia pe gaia phuv sa me liea.

⁴² Soke gia phenda o Del: Gia sar andem pe gava foro sa gava bilachipe, isto gia ka anav sa o lachipe kai phenav lendar,

⁴³ ta ka avel len umalia ande gaia phuv kai tumen phenen: Pusti si, inai niko, inai ni manusa ni zivirinie, dini si kai e kaldeura.

⁴⁴ Ka chinen tumenge phuv e lovenchar, ta ka cheren lila ta ka thoven pe lende o sello ta ka thoven llenen te dikhen e arli, ande phuv katar o Benjamin ta truial katar o Jerusalem, ta ande forura katar o Juda, ta ande forura kai si pe burdura, ta ande forura katar e Sefela, ta ande forura katar o Negev, soke me ka cherav te irinpe lenge llenen kai si phangle. Gia phenel le o Del.