Jeremias 30 - Biblia ande chib Romani

O Del phenel so ka cherel e foroke mai angle

¹ O Del dia orba e Jeremiase ta phenda:

² Gia dia orba o Del katar o Israel, ta phenda: Pisisar sa e alava kai phendem chuke.

³ Soke aven llivesa, phenel o Del, kai ka anav e llenen kai si phangle katar mo foro o Israel ta katar o Juda, o Del phenel le, ta ka anav len kai e phuv kai diem lenge paponen, ta ka veselinpe.

⁴ Gala si e alava kai o Del dia orba katar o Israel ta katar o Juda.

⁵ Soke gia phenda o Del: Soke asundam avazura kai daran ta kai izdran, ta ni asundam e pas.

⁶ Puchen akana, ta dikhen dal o murus bianel, soke dikhlem kai sa e murusa sea lenge va pe lenge kukura, sargo iek diskinia kai ka maladol lake, ta sa e llene parrnile po mui.

⁷ ¡Tesko ka avel ande gua baro llive! ni ka avel aver llive sargo gua, vreme nuzdako katar o Juda, a ka avel bradui ma katar e nuzda.

⁸ Ande gua llive, phenel o Del kai si le sa e zor, me ka phagav o pharipe katar lengi korr, ta ka phagav so phende tumen ta nikada ni iek lleno katar aver phuvia ni ka cheren tumen sluge te radin lenge,

⁹ soke ka radin e Gazdake tumaro Del ta e Davideke tumaro charo.

O Del braduil pe foro

¹⁰ Goleke tu mo sluga o Jakob na dara, phenel Del, ta te na lel tut e dar, Israel, soke me sem gua kai braduisarda tut duratar ta che porodo katar e phuv kai sana phanglo, ta o Jakob ka irilpe, ta ni ka avel ko te daravel le.

¹¹ Soke me sem tuia te braduiv tut, phenel o Del, ta ka zatriv sa e phuvien kai rispisardem tut maskar lende, a tut ni ka zatriv, soke ka dukhavav tut ando chachipe, ta ni ka mukav tut bidukhaia.

¹² Soke gia phenda o Del: Nasti sasto katar cho phagipe, ta dukhadi si chi ran.

¹³ Inai ko te krisil chuke te sastarel tut, inai chuke ni iek drab lacho.

¹⁴ Sa gola kai volina tut bristarde tut, ni roden tut, soke gia sar dukhavel iek dusmano, isto gia dukhadem tut, chaladem tut e bare nuzdaia, pala o baro bilachipe kai cherdan ta pala chi bari dos.

¹⁵ ¿Soke urki pala cho phagipe? nasti sasto, soke pala cho baro bilachipe ta pala chi bari dos cherdem chuke gaia ezgoda.

¹⁶ A ka aven zatrime sa gola kai zatrisarde tut, ta sa che dusmanura, sa ka llan phangle, ustade ka aven gola kai ustade tut, ta sa gola kai chorde tut, von ka aven chordine.

¹⁷ A me ka cherav te avel chuke o sastipe, ta ka sastarav che rrane, gia phenel o Del, soke ikharde tut chudino ta phenena: Gava si o Sin, kai niko ni delpe golli letar.

¹⁸ Gia phenda o Del: Me cherav te irinpe e phangle katar e chare e Jakoboke, ta ka avel mange zao katar leke chare, ta o foro ka avel vazdino pe leko burdo, ta o Cher e Devleko ka vazden le pale.

¹⁹ Ta von ka den fala ta ka asundon avazura katar iek foro veselo, ka cherav te bariol lengo foro ta ni ka aven cherricha, ka cherav te bariol lengo foro ta ni ka maren lendar espurnia.

²⁰ Ta ka aven leke chaurre sargo omanglal, ta e llene ka chidiniaon angla mande pe porrne. Ta ka dukhavav sa lenge dusmanonen.

²¹ Lendar ka likel lengo gazda, ta maskaral lendar ka likel gua kai ka gazdaril len, ta ka cherav le te avel pase, ta vou ka avel pasa mande, soke ¿Ko si gua kai tromal te avel pasa mande? phenel o Del.

²² Ta ka aven mo foro ta me ka avav tumaro Del.

²³ O baro bursin likel jolinaia katar Del, o bursin kai bariol po soro golengo kai ni pachan.

²⁴ Ni ka achel e joli e Devleki kai phabol, lligo ni ka cherel ta ka getol so thodape te cherel, po son katar e llivesa ka acharen gaia ezgoda.