Jeremias 3 - Biblia ande chib Romani

O Israel ni kandia e Devle

¹ Phenen kai vareko te mukela pe rromia, ta voi llaltar avere murusea, ¿Nasti lel le pale? Soke avela iek baro lallao gole phuviake. A tu kai cherdan o kurvaluko bute amalenchar, ¡irisao mande! Gia phenel le o Del.

² Dik upre pe burdura, ta phen kai ni cherdan o kurvaluko. Pasa e droma besea lenge sargo arabe po pusto, ta pala cho kurvaluko ta cho bilachipe meliardan gale phuvia.

³ Goleke e paia avile achadine, ta ni avilo o bursin pasa o milai. San sargo iek kurvichka, ¡Ni llane so si o lallao!

⁴ A katar angle, ¿ni ka phene mange, murno Del, kai sikadan man ande mo ternipe?

⁵ ¿Ka ave joliariko ostade? ¿Chi joli ka aven sa o vreme? A tu dian orbe ta cherdan o bilachipe kai manglan.

O Del phenel e Israeleke ta e Judaeke te irinpe katar po bilachipe

⁶ O Del phenda mange ande llivesa katar o charo o Josias: ¿Dikhlan so cherda e phuv katar o Israel kai ni kandel? Voi llal pe bare burdura ta telal katar e bare kasta, ta kote cherel o kurvaluko.

⁷ Me misliva kai pala sa gala ezgode kai cherda, ka irilpe mande, a ni irisaili, ta dikhla la laki phei e Juda goia kai ni kandel.

⁸ Ta dikhla kai me tradiem e phuvia katar o Israel pala o kurvaluko kai cherda ta kai diem la iek lil te llaltar, a ni daraili voi e Juda laki phei kai ni kandel, ta i voi lleli ta cherda o kurvaluko.

⁹ Ta sar ni thoda sama pe po kurvaluko, e phuv melaili, ta cherda o kurvaluko e barrea ta e kastea.

¹⁰ Ta pala sa gala ezgode, laki phei e Juda kai ni kandel ni irisaili mande chachimaia, irisaili kojaimaia, gia phenel le o Del.

¹¹ Ta phenda mange o Del: E phuv katar o Israel kai ni kandel si mai chachi neko e Juda e kojamni.

¹² Lla ta phen gala alava karing o norte, ta phen: O Del phenel gia: Irisao, ioi Israel kai ni kande, ni ka cherav te perel pe tute mi joli, mi joli ni ka avel ostade soke mange si zao. Gia phenel le o Del

¹³ Phen chi dos, soke cherdan o bilachipe e Devleke cho Gazda ta cherdan o kurvaluko llenenchar katar aver phuvia telal katar e bare kasta, ta ni asundan mo avazi, gia phenel le o Del.

¹⁴ Irin tumen mande chaurralen kai ni kanden, gia phenel le o Del, soke me sem tumaro rrom ta ka lav tumen suakone katar suako foro, ta duien katar suako familia, ta ka anav tumen kai o Sion,

¹⁵ ta ka dav tumen chobanura sar me mangav, te inllaren tumen bizaimaia.

¹⁶ Ta kana ka cherdo mai but llene ta kana ka barion pe phuv, ande gola llivesa, gia phenel le o Del, ni ka phenen ios: Arka katar o alav e Devleko, ni ka avel ande lengo mislo ta ni ka denpe golli latar, ta li ka zelin la ta ni ka cherdol aver.

¹⁷ Ande gola llivesa ka thoven o anav katar o Jerusalem: Trono e Devleko, ta sa e phuvia ka aven lete ando anav e Devleko ando Jerusalem, ta ni ka llan pala po zuralo lio.

¹⁸ Ande gola llivesa ka llan katar o Juda kai o Israel, ta ka aven katar e phuv katar o norte kai e phuv kai cherdem te len tumare papura.

O Israel pachal ande aver dela

¹⁹ Me puchava: ¿Sar ka thovav tumen sargo chaurre ta sar ka dav tumen e phuv kai zelilpe, e barvali phuv katar e forura? Ta phendem: Ka ikharen man: Murno Dad, ta ni ka durion mandar.

²⁰ A gia sar e mukel e diskinia pe rrome, gia cherden mange o bilachipe, ioi Israel, gia phenel le o Del.

²¹ Iek avazi asundilo chak upral, rovena ta molinape e chave katar o Israel, soke bangarde po drom, ta bristraile katar o Gazda lengo Del.

²² Irin tumen, chaurralen kai ni kanden, ta ka sastarav tumaro bilachipe. kate sam, ava tute, soke tu san o Gazda amaro Del.

E Israelitura den anglal

²³ Chachimaia e burdura ni mol len niso, ta ni e burkania kai si pe burdura, chachimaia ando Gazda amaro Del si o braduipe katar o Israel.

²⁴ O lallao jala o rado katar amare dada sar kana sama terne, lenge bakre, lenge guruva, lenge chaurre ta lenge chorra.

²⁵ Pelam amenge ande amaro lallao ta uchardam amen amare lallaimaia, soke cherdam o bilachipe e Gazdake amaro Del, amen ta amare dada, sar kana sama terne, ta llik allive ta ni asundam o avazi katar o Gazda amaro Del.