Jeremias 29 - Biblia ande chib Romani

Lil katar o Jeremias e llenenge kai inllarde len phangle

¹ Gala si e alava katar o lil kai bichalda o profeta o Jeremias ando Jerusalem kai e phure kai achile katar gola kai inllarde len phangle, ta e poponenge ta e profetonenge ta sa e foroke kai o Nabukodonosor inllarda phangle katar o Jerusalem ande Babilonia

² mapalal kana likisto o charo o Jekonias, e charoina, e llene katar o cher e charoko, e sudura katar o Juda ta katar o Jerusalem, gola kai cheren ezgode sukar ta e llene bizai kai cherde o Jerusalem,

³ o lil inllarda le o Elasa, chavo katar o Safin ta o Gemarias chavo katar o Ilsias, o Sedekias charo katar o Juda bichalda len te llan ande Babilonia, kai o Nabukodonosor charo katar e Babilonia, o lil phenela gia:

⁴ Gia phenda o Del kai si le sa e zor, o Del katar o Israel, sa e llenenge kai si phangle kai cherdem te inllaren len katar o Jerusalem ande Babilonia:

⁵ Cheren chera, ta zivin andre, cheren tumenge vostanura ta jan katar so ka del tumen e phuv.

⁶ Zinin tumen, ta te aven tumen chaurre ta chorra, zinin tumare chorren ta tumare chaurren, te aven len chaurre ta chorra, cherdon mai but kote, ta na chiknion.

⁷ Cheren te avel pas ando foro kai cherdem te anen tumen, ta molin tumen e Devleke pala late, soke ande laki pas ka avel tumen pas.

⁸ Soke gia phenda o Del kai si le sa e zor, o Del katar o Israel: Te na kojaven tumen tumare poraukura kai si maskar tumende, ni tumare llene kai apogodin, ta na thoven sama pe sune kai dikhen.

⁹ Soke porokin kojaimaia ande mo anav, me ni bichaldem len phenel o Del.

¹⁰ Soke gia phenda o Del: Kana ande Babilonia ka nakhen e eftavardes burs, me ka avav tumende, ta ka cherdon tumenge me lache alava, te cherav tumen te irintumen pe gava than.

¹¹ Soke me llanav so misliu man tumendar, phenel o Del, mislura katar e pas, kai inai bilache, te dav tumen so tumen aduricharen.

¹² Ondaka ka ikharen man, ta ka aven ta ka molin tumen mange, ta me ka asunav tumen,

¹³ ka roden man ta ka malaven man, soke ka roden man sa tumare liea.

¹⁴ Ta tumen ka malaven man, phenel o Del, ta ka cherav te irinpe tumare phangle, ta ka chidav tumen katar sa e phuvia ta katar suako than kai chudiem tumen, phenel o Del, ka anav tumen kai o than kai cherdem te ikanen tumen.

¹⁵ A tumen phenden gia: O Del thoda amenge poraukura ande Babilonia.

¹⁶ A o Del phenda gia katar o charo kai besel po trono katar o David, ta katar sa e llene kai zivil ande gava foro, katar tumare phlal kai ni likiste tumenchar kana phangle tumen,

¹⁷ gia phenda o Del kai si le sa e zor: Me bichalav pe lende o jarni, e bok ta o nasualipe, ta ka cherav len sargo e simochine bilache, kai si gia bilache kai nasti janpe.

¹⁸ Ka llav pala lende e jarniea, bokhaia ta nasualimaia, ta sa e phuvia ka maren tumendar espurnia, ka proketin tumen, ka daran kana ka dikhen tumen ka asan tumendar ta ka maren espurnia maskar e phuvia kai chudiem tumen,

¹⁹ soke ni asunden me alava, phenel o Del, kai bichaldem te phenen tumenge me slugen e poraukura, cherel but vreme bi te achav, ta ni asunden, gia phenel le o Del.

²⁰ Goleke asunen o alav e Devleko, sa tumen kai avilen inllarde, kai me bichaldem tumen katar o Jerusalem ande Babilonia.

²¹ O Del kai si le sa e zor, Del katar o Israel, phenda gia katar o Akab chavo katar o Kolaias, ta katar o Sedekias chavo katar o Maasias, kai phenen tumenge e poroke kojamne ande mo anav ta phenen gia: Me ka thovav len ande va katar o Nabukodonosor charo katar e Babilonia, ta vou ka mundarel len angla tumare akha,

²² ta sa e llene kai inllarde len katar o Juda kai si ande Babilonia ka cheren len te achen proketime, ta ka phenen: Daboida te mukel tut o Del sargo o Sedekias ta sargo o Akab, kai pekla len pe iag charo katar e Babilonia.

²³ Soke cherde o bilachipe ando Israel, ta cherde o kurvaluko e rromienchar katar e llene kai zivina pasa lende, ta kojaimaia phende alava ande mo anav kai me ni phendem lenge, ta goia ezgoda me llanav la ta phenavla tumenge, gia phenel le o Del.

E orba e Semaiaseke

²⁴ A e Semaiaseke katar o Nejelam ka phe leke gia:

²⁵ Gia dia orba o Del kai si le sa e zor, o Del katar o Israel ta phenda: Tu bichaldan lila ande cho anav kai sa e foroke kai si ando Jerusalem, ta kai o popo o Sofonias chavo katar o Maaseias, ta sa e poponenge prema so tu phene:

²⁶ O Del thoda tut popo po than katar o popo o Joiada, te dikhe o cher e Devleko pe suako lleno dilo kai porokil ta te phande le ande rubie.

²⁷ ¿A soke akana ni dian po Jeremias katar o Anatot, kai phenel e poroka?

²⁸ Soke vou bichalda amen te phena gia ande Babilonia: But vreme ka achen phangle, cheren chera, ta zivin kote, thoven te barion septelia ta jan so ka del e phuv.

²⁹ Ta o profeta o Sofonias chitisardaia gava lil e profetake e Jeremiaseke.

³⁰ Ta avilo o alav e Devleko kai o Jeremias ta phenda:

³¹ Bichal te phenen sa e llenenge kai si phangle: Gia phenda o Del cheren o Semaias katar o Nejelam: Soke porokisarda tumenge o Semaias, ta me ni bichaldem le, ta soke cherda te uzdintumen ando kojaipe,

³² goleke o Del phenda gia: Me ka dukhavav e Semaiase katar o Nejelam ta leke porodo, ni ka avel le murus te zivil maskar gava foro ta ni ka dikhel o lachipe kai ka me cherav me foroke, phenel o Del, soke dia orba kojamni po Del.