Jeremias 28 - Biblia ande chib Romani

O Jeremias ta o profeta o Jananias

¹ Isto ande gua burs, kana iakom charoila o Sedekias charo katar o Juda, ando burs starto, ta ando chon panchto, kana o Jananias chavo katar o Azur, kai saia profeta katar o Gabaon, dia manchar orba ando cher e Devleko angla e popura ta angla sa o foro ta phenda:

² Gia phenda o Del kai si le sa e zor, o Del katar o Israel: Phaglem o pharipe katar o charo katar e Babilonia.

³ Trin burs mai angle ka cherav te anen pale pe gava than sa e ezgode katar o cher e Devleko, kai o Nabukodonosor charo katar e Babilonia lia katar gava than ta inllarda ande Babilonia,

⁴ ta me ka cherav te irilpe pe gava than o Jekonias chavo katar o Joakim, charo katar o Juda ta sa e llenen kai inllarde katar o Juda ta die ande Babilonia, soke me ka phagav o pharipe katar o charo katar e Babilonia, gia phenel le o Del.

⁵ Ondaka o profeta o Jeremias dia orba e profetake o Jananias, angla e popura ta angla sa o foro kai saia ando cher e Devleko.

⁶ Ta phenda o profeta o Jeremias: Gia te avelpe, gia te cherel le o Del. Te cherel o Del e alava kai phendan kana porokisardan kai si te anen pale pe gava than e ezgode katar o cher e Devleko ta sa e llenen kai avile inllarde.

⁷ A asun gava alav kai ka phenav chuke ta sa e foroke:

⁸ E poraukura kai sea mai anglal mandar ta tutar ando vreme o purano, porokisarde katar o maripe, katar e duk ta e muke pe but phuvia ta pe bare charoine.

⁹ Kana iek profeta porokil katar e pas, ta leko avav cherdol, ka avel pinllardo ka pachan kai chachimaia bichalda le o Del.

¹⁰ Ondaka o profeta o Jananias ikanda o pharipe katar e korr katar o profeta o Jeremias, ta phagla le.

¹¹ Ta o Jananias dia orba angla sa o foro, ta phenda: Gia phenda o Del: Isto gia ka phagav o pharipe kai thoda o Nabukodonosor charo katar e Babilonia pe korr katar sa e phuvia, ande dui burs ios. Ta o Jeremias llelo pe dromea.

¹² Ta kana o profeta o Jananias phagla o pharipe katar e korr katar o profeta o Jeremias, o avilo o alav e Devleko kai o Jeremias ta phenda:

¹³ Lla kai o Jananias ta phen leke gia: Gia phenda o Del: Phaglan o pharipe kastuno kai llal pe korr, a akana ka chere len sastrune.

¹⁴ Soke gia phenda o Del kai si le sa e zor, o Del katar o Israel: Pharipe sastruno thodem pe korr katar sa gala phuvia, te sai aven sluge katar o charo o Nabukodonosor charo katar e Babilonia, ta ka radin leke, ta i dia le e zivirinie dive.

¹⁵ Ondaka o profeta o Jeremias phenda e profetake o Jananias: Akana asun, Jananias: O Del ni bichalda tut, a tu cherdan gale foro te uzdinpe ando kojaipe.

¹⁶ Goleke o Del phenda gia: Me ka ikanav tut katar e phuv, ka mere ande gava burs, soke dian orba kojamni po Del.

¹⁷ Ta isto ande gua burs mulo o profeta o Jananias ando chon eftato.