Jeremias 27 - Biblia ande chib Romani

O gazdaripe sargo iek kas phanglo pe korr

¹ Kana iakom charoila o Joasim chavo katar o Josias charo katar o Juda, avilo gava alav e Devleko kai o Jeremias, ta phenda:

² O Del phenda mange gia: Cher chuke iek kavisa ta iek kasta ta thov len pe chi korr.

³ Ta ka bichale len kai o charo katar o Edom, ta kai o charo katar o Moab, ta kai o charo katar e chave katar o Amon, ta kai o charo katar o Tiro, ta kai o charo katar o Sidon, te inllaren len e bichalde kai aven ando Jerusalem kai o Sedekias o charo katar o Juda.

⁴ Ta ka phene te phenen pe gazdenge: Gia phenda o Del kai si le sa e zor, o Del katar o Israel: Gia ka phenen tumare gazdenge:

⁵ Me cherdem e phuv, e manuse ta e zivirinie kai si pe sa e phuv, inzardem mo va ta cherdem len me bare zoriaia, ta diem la kake me manglem.

⁶ Ta akana me thodem sa gala phuvia ande va katar o Nabukodonosor charo katar e Babilonia, ta i e zivirinie dive diem le te radin leke.

⁷ Ta sa e phuvia ka radin leke, leke chaurreke ta leke unukoneke, lligo ni ka avel o vreme katar leki phuv, ta ka cheren la sluga but phuvia ta bare charura.

⁸ Ta e phuv ta e charoina kai ni ka aven sluge katar o Nabukodonosor charo katar e Babilonia, ta te na mukle te thoven pe pi korr o kas gazdarimako katar o charo e Babiloniako, ka dukhavav gole phuvia e jarniea e bokhaia ta e bare mukaia, gia phenel le o Del, lligo ni ka zatriv len sa leke vastea.

⁹ A tumen na asunen tumare profetanen, ni tumare llenen kai apogodin, ni golen kai dikhen sune, ni golen kai cheren te zalintumen pe orbenchar ta phenen: Ni ka radin e charoke katar e Babilonia.

¹⁰ Soke von phenen iek poroka kojamni, te cheren tumen te durion katar tumari phuv, ta me te chudav tumen ta te meren.

¹¹ A e phuv kai ka mukel te thoven pe laki korr o pharipe katar charo katar e Babilonia ta te radisarda leke, ka mukav la ande pi phuv ta kote ka merel, gia phenel le o Del.

¹² Ta i diem orba e Sedekiasea charo katar o Juda prema sa gala alava ta phendem leke: Muken te thoven tumari korr telal katar e zor e charoki katar e Babilonia, ta radin leke ta leke foroke ta ka zivin.

¹³ ¿Soke ka mere tu ta cho foro po jarni, bokhatar ta katar e muke, prema so phenda o Del katar e phuv kai ni ka radil e charoke katar e Babilonia?

¹⁴ Na asunen so phenen e alava katar e poraukura kana phenen tumenge: Ta na radin e charoke katar e Babilonia, soke von kojaven tumen.

¹⁵ Soke me ni bichaldem len, phenel o Del, ta von porokin kojaimaia ande mo anav, te sai chudav tumen ta te meren tumen ta e poraukura kai porokin tumenge.

¹⁶ Ta i diem orba i e poponenge ta sa gale foroke ta phendem lenge: Gia phenda o Del: Na asunen e alava katar tumare poraukura kai porokin tumenge ta phenen: Akana e ezgode kai si ando cher e Devleko ka irinpe katar e Babilonia isto akana, soke porokin tumenge kojaimaia.

¹⁷ Te na asunen len, radin e charoke katar e Babilonia te zivin, ¿Soke te avel zatrime gava foro?

¹⁸ A von te si poraukura, ta te si lenchar o alav e Devleko, molin tumen akana e Devleke kai si le sa e zor ta gia pala e ezgode kai achile ando cher e Devleko ta ando cher katar o charo katar o Juda ta ando Jerusalem, te na llan ande Babilonia.

¹⁹ Soke gia phenda o Del kai si le sa e zor kana dia orba katar e direkura, katar e bari tepsia kai chidiniaol o pai, katar lake porrne, ta katar ogola ezgode kai achen ande gava foro,

²⁰ kai ni ikanda o Nabukodonosor charo katar e Babilonia kana inllarda katar o Jerusalem ande Babilonia e Jekoniase chavo katar o Joasim charo katar o Juda ta katar o Jerusalem.

²¹ Gia phenda o Del kai si le sa e zor, o Del katar o Israel, katar e ezgode kai achile ando cher e Devleko, ta ando cher katar o charo katar o Juda ta ando Jerusalem kana phenda:

²² Ande Babilonia ka aven inllarde, ta kote ka achen lligo ni ka avav tumende, ta mapalal ka anav len ta ka thovav len pe to than, gia phenel le o Del.