Jeremias 26 - Biblia ande chib Romani

Phenen kai ka mundaren e Jeremiase

¹ Kana thoda te charoil o Joasim chavo e Josiaseko, charo katar o Juda, avilo gava alav e Devleko ta phenda:

² Gia phenda o Del: Thou tut ande bar katar o cher e Devleko, ta de orba sa e phuvienge katar o Juda, kai aven te blagosin ando cher e Devleko, sa e alava kai phendem chuke te de orba lenge, phen lenge sa.

³ Sai avelpe kai ka asunen ta ka irinpe suako iek katar po bilacho drom, ta me ka achavav e duk kai mangava te cherav lenge pala o bilachipe kai cheren.

⁴ Goleke ka phene lenge gia: Gia phenda o Del: Te na maladen man te llan pe mo zakono kai thodem angla tumende,

⁵ te acharen so phenen me sluge e poraukura, kai me bichalav tumenge cherel but vreme ta ni achav, kai tumen ni asunden len,

⁶ me ka cherav gale foroia sar cherdem ando Silo, ta gaia phuv ka avel proketime katar sa e forura katar e phuv.

⁷ Ta e popura, e poraukura ta sa o foro asunde e alava kai phenda o Jeremias ando cher e Devleko.

⁸ Kana o Jeremias getosarda te del sa e orba kai o Del phenda leke te phenel sa e foroke, e popura ta e poraukura ta sa o foro thode o va pe lete ta phenena: Akana ka mere.

⁹ ¿Soke phendan iek poroka ando anav e Devleko, ta phendan: Gava foro ka avel sargo o Silo, ta gaia phuv ka avel zatrime ta ni ka achel niko? Ta sa o foro chidinailo po Jeremias ando cher e Devleko.

¹⁰ Ta sudura katar o Juda asunde gala ezgode, ta llele katar o cher e charoko llik kai o cher e Devleko, ta besle katar delpe katar o udar o nevo katar o cher e Devleko.

¹¹ Ondaka die orba e popura ta e poraukura e sudonenchar katar o foro, ta phende: Prema so cherda gava manus vou si te merel, soke phenda iek poroka pe gava foro, gia sar asunden isto tumen.

¹² T o Jeremias dia orba sa e sudonenge ta sa e foroke, ta phenda lenge gia: O Del bichalda man te porokiu pe gava cher ta pe gava foro sa e alava kai tumen asunden.

¹³ Lacharen akana tumaro drom, ta e ezgode kai cheren, ta asunen e Devleko avazi ta ka delpe palpale katar o bilachipe kai phenda tumendar.

¹⁴ A me, sem ande tumare va, cheren manchar so mislina kai si orta te cheren.

¹⁵ A trubul te llanen kai te mundarden man, ka cheren te chordol pe tumende o rat katar iek bidosalo, ta pe gava foro ta pe llene kai zivin kate, soke chachimaia bichalda man tumende o Del te phenav tumenge sa gala alava ande tumare kan.

¹⁶ Ta e sudura ta sa o foro phende e poponenge ta e profetonenge: Gava lleno inai dosalo te mundaren le, soke ando anav katar amaro Del dia amenge orba.

¹⁷ Ondaka thodepe pe porrne nesave phure katar e phuv ta die orba e llenenge katar o foro kai sea chidine:

¹⁸ Kana o Esekias saia charo katar o Juda o Mikeas katar o Moreset porokisarda sa e foroke katar o Juda ta phenda: Gia phenda o Del kai si le sa e zor: O Sion ka avel anado sargo kana radin e phuv ta o Jerusalem ka cherdol iek umpa phagipe ta po burdo katar o cher ka barion e kasta.

¹⁹ ¿A so, mundarde le o Esekias charo katar o Juda ta sa o foro katar o Juda? ¿Ni darailo e Devletar ta molisailo angla o Del, ta o Del diape palpale katar o bilachipe kai dia orba pe lende? ¿Sai chera amen gia baro bilachipe amare zivotoke?

²⁰ Ta i saia aver lleno kai porokisarda ando anav e Devleko, o Urias chavo katar o Samanias, katar o Kiriat Iarim, ta porokisarda pe gava foro ta pe gaia phuv, prema sa e alava katar o Jeremias,

²¹ ta asunde leke alava o Charo Joasim ta sa leke sudura ta leke glamne llene, ta o charo mangela te mundarel le. O Urias llangla ta darailo ta naslo ando Ejipto.

²² Ta o charo o Joasim bichalda llenen ando Ejipto, llelo o Elnatan chavo katar o Akbor ta avere llenen llele lea.

²³ Ikande e Uriase katar o Ejipto ta ande le kai o charo o Joasim ta mundarda le pe jarniea ta chudia leki esnaga ande limoria kai si varekake.

²⁴ A o Ajikam chavo katar o Safan arakhela e Jeremiase te na den le ande va e foroke te mundaren le.