Jeremias 25 - Biblia ande chib Romani

O dusmano kai avel katar o norte

¹ O alav kai avilo kai o Jeremias pala sa o foro katar o Juda ando burs starto katar o Joasim chavo katar o Josias, charo katar o Juda, gua saia o purvo burs katar o Nabukodonosor charo katar e Babilonia,

² gaia orba phenda la o profeta Jeremias sa e foroke katar o Juda ta sa e llenenge kai zivin ando Jerusalem, ta phenda:

³ Katar o trito burs katar o Josias chavo katar o Amon charo katar o Juda, llik kai gava llive, kai si bis ta trin burs, avilo mande o alav e Devleko, ta cherel but vreme kai dav orba ta ni achav, a tumen ni asunden.

⁴ Ta o Del bichalda tumenge sa e profetanen, bichalda len tumende but vreme bi te achen, a tumen ni asunden len ta ni thoden lenge sama

⁵ kana phenena: Irintumen akana katar tumaro bilachipe ta katar e ezgode bilache kai cheren, ta ka zivin ande phuv kai o Del dia tumen ta tumare paponen ostade,

⁶ ta na llan pala averenge dela te radin lenge ta te blagosin len, ta na den man joli e ezgodenchar kai si cherde tumare vastenchar, ta ni ka dukhavav tumen.

⁷ A ni asunden man ta dien man joli e ezgodenchar kai si cherde tumare vastenchar te llal tumenge bilache, gia phenele o Del.

⁸ Goleke gia phenda o Del kai si le sa e zor: Soke ni asunden mo avazi,

⁹ ka bichalav ta ka lav sa e vichen katar o norte, gia phenel le o Del, ta me sluga o Nabukodonosor charo katar e Babilonia, ta ka anav len te marenpe e llenenchar katar gaia phuv ta golenchar kai zivin kote ta sa e phuvienchar kai si truial ta ka zatriv len, ta ka thovav len ando lallao ta ka maren lendar espurnia ta ka achen puste ostade.

¹⁰ Ta ka cherav te na avel ios maskar lende o avazi veselo, avazi katar e bori ta avazi katar o llamutro, ni ka basel o barr kai morel o lliu ta ni ka phabol o villelo katar ni iek memeli.

¹¹ Sa gaia phuv ka avel thodi ande zatrania, ta ande dar, ta gala phuvia ka radin e charoke o Nabukodonosor eftavardes burs.

¹² Ta kana ka nakhen e eftavardes burs, ka dukhavav e charo katar e Babilonia ta gole foro pala lengo bilachipe, ta e phuvia katar e kaldeura, ta ka cherav la pusto ostade, gia phenda le o Del.

¹³ Ta ka anav pe goia phuv sa me alava kai phendem pe late, sa e alavenchar kai si pisime pe gava lil, kai porokisarda o Jeremias pe sa e phuvia.

¹⁴ Soke i von ka aven sluge katar but phuvia ta but charura, ta ni ka pochinav lenge prema so cheren, ta prema e ezgode kai cheren pe vastenchar.

E duk katar e phuvia

¹⁵ Soke gia phenda mange o Del katar o Israel: Le katar mo va o taso kai e mol katar gaia joli, ta de te pien sa e phuvia kai me ka bichalav tut.

¹⁶ Ta ka pien, ka izdran ta ka diliaon, pala o jarni kai me bichalav maskar lende.

¹⁷ Ta liem o taso katar e Devleko va, ta diem te pien sa e phuvia, kai o Del bichalda man:

¹⁸ Kai o Jerusalem, kai e phuvia katar o Juda ta kai lake charura ta kai lake sudura, te achen zatrime, ande espurnia ta ando lallao ta proketime sar si llik allive,

¹⁹ kai o Faraon charo katar o Ejipto, leke slugen, leke sudonen ta sa leke foro,

²⁰ ta sa e phuvia kai si amime, kai sa e phuvia katar e phuv katar o Uz ta kai sa e charura katar e phuv katar e Filistea, kai o Askalon, kai e Gaza, kai o Ekron ta kai gola kai achile katar Asdod,

²¹ kai o Edom, kai o Moab ta kai e chave katar o Amon,

²² Kai sa e phuvia katar o Tiro, kai sa e charura katar o Sidon, kai e charura kai si pe goia rig pasa e mora,

²³ kai o Dedan, kai o Tema, kai o Buz, kai sa gola kai randen po soro,

²⁴ kai sa e charura katar e Arabia, kai sa e charura katar e phuvia amime kai zivin po pusto,

²⁵ kai sa e charura katar o Zimri, kai sa e charura katar o Elam, kai sa e charura katar e Media,

²⁶ kai sa e charura katar o norte, kai si pase ta kai si dur iek averetar, ta kai sa e phuvia kai si pe phuv. Ta mapalal ka piel o charo katar e Babilonia.

²⁷ Ta ka phene lenge gia: Gia phenda o Del kai si le sa e zor, Del katar o Israel: Pien ta maton, ta chaden ta peren, ta na usten ios, pala o jarni kai me bichalav tumenge.

²⁸ A te na mangle te pien katar o taso kai de len, tu ka phene lenge gia: O Del phenda gia: Trubul te pien.

²⁹ Soke ande phuv kote kai ikharen man, kote ka dukhavav, ¿A tumen mislin kai ni ka aven dukhade? Tumen ka aven dukhade, soke anav o jarni pe sa e llene kai zivin pe phuv, gia phenel le o Del kai si le sa e zor.

³⁰ Goleke tu ka poroki pe lende sa gala alava ta ka phene lenge gia: O Del ka basel katar o miloso ta katar o than santo kai zivil ka asundol leko avazi, ka basel zurale pe po foro, pe sa e llene kai zivin pe phuv ka asundol sargo e llili kai llilaben gola kai ustaven e drak.

³¹ Ka asundol pe suako than e phuviako, soke o Del chinel kris pe phuvia, o Krisari suakone manuseko, ka thovel po jarni e bilachen, gia phenel le o Del.

³² Gia phenda o Del kai si le sa e zor: O bilachipe ka llal phuv phuviate, ta baro bursin ka vazdiniaol but duratar.

³³ Ande gua llive e llene e Devleke kai mule ka aven rispime katar iek rig e phuviaki llik kai ogoia rig, ta niko ni ka roven lenge, ni ka chiden lenge esnage te prajon len, sargo llubri ka achen upral pe phuv.

³⁴ Kukin chobanura, ta urkin, taulintumen ando prajo, gola kai arakhen e stoka, soke avilo tumaro o vreme te chinen tumari korr ta te aven rispime, ta ka peren sargo iek taso kuch.

³⁵ Ni ka avel kai te nasen e chobanura, ta nasti ka kurtulinpe gola kai arakhen e stoka.

³⁶ ¡E chobanura urkin, ta kukin e llene kai arakhen e stoka! soke o Del zatrisarda len.

³⁷ Ta e char zeleni ka avel zatrime pala e iag katar e joli e Devleki.

³⁸ Mukla pe foro sargo iek liono kai mukel o than kai gurudola, soke lengi phuv achili zatrime pala e joli katar lengo dusmano ta soke saia divome jolinatar.