Jeremias 23 - Biblia ande chib Romani

O lachipe kai si angle

¹ O Del phenel: ¡Tesko e chobanonenge kai zatrin ta rispin e bakren katar mi stoka!

² Goleke, o Gazda o Del katar o Israel phenda gia e chobanonenge kai arakhen me foro: Tumen rispisarden me bakren ta daraden len, ta ni arakhlen len. Goleke me dukhavav tumen pala so cheren.

³ Ta isto me ka chidav si ka achel katar me bakre katar sa e phuvia kai chudiem len, ta ka cherav te irinpe kai pe chera, ta ka barion ta ka cherdon mai but.

⁴ Ta ka thovav lenge chobanura te arakhen len, ta ni ka daran ios, ni ka avel lenge dar ta ni ka aven dukhade ios, gia phenel le o Del.

⁵ Del phenel gia: Aven llivesa kai ka cherav te bariol iek chaurro katar o porodo e Davideko ka avel chacho ta ka gazdaril sargo charo vou ka avel bizai, ka chinel kris ta ka cherel so si orta pe phuv.

⁶ Ande leke llivesa ka avel braduime o Juda ta o Israel ka zivil bidarako, ta gava ka avel o anav kai ka ikharen le: O Del amaro chachipe.

⁷ Goleke o Del phenel kai aven llivesa, kai ni ka phenen ios: Ando anav e Devleko kai cherda te liken e chave katar o Israel andar e phuv katar o Ejipto,

⁸ akana ka phenen: Ando anav e Devleko kai cherda te liken, ta anda e porodo katar o Israel katar e phuv katar o norte, ta katar sa e phuvia kai me tradiem len, ta ka zivin ande pi phuv.

E orba cheres e poraukura

⁹ Mo lio si dukhado pala e poraukura, sa me kokala izdran, sargo mato sem, ta sargo iek manus kai istarda le e mol, angla o Del ta angla leke sante alava.

¹⁰ Soke e phuv si pherdi kurvaluko, pala e armaia e phuv si pusti, e char katar e umalia sukili. Lengo phiripe ni saia chacho ta lengo rado ni saia orta.

¹¹ Goleke, o popo ta i o profeta si bilache, i ande mo cher maladem lengo bilachipe, gia phenel le o Del.

¹² Goleke, lengo drom ka avel sargo iek than kai zinzal ando truniariko, ka aven espidime, ta ka peren pe lete, soke me ka anav pe lende o bilachipe kana ka avel o burs katar lengi duk, gia phenel le o Del.

¹³ Dikhlem kai e poraukura katar e Samaria, ni phenen o chachipe phenena e poroka ando anav katar o Baal, ta cherde te kojadol mo foro o Israel.

¹⁴ Ta dikhlem kai e poraukura katar o Jerusalem cheren dilipe, cheren o kurvaluko, llana ando kojaipe ta dena zor e bilachen te na irilpe ni iek katar po bilachipe, saurre sea mange sargo e Sodoma, ta e llene kai zivina kote sargo e Gomorra.

¹⁵ Goleke o Del kai si le sa e zor phenda gia gole profetonenge: Me ka cherav te jan o cherke, ta ka cherav te pien o pai cherko, soke katar e poraukura katar o Jerusalem likisto o kojaipe pe sa e phuv.

¹⁶ Gia phenda o Del kai si le sa e zor: Te na asunen e alava katar e poraukura kana phenen tumenge e poroka, cheren te aduricharen ezgode kai ni mol len niso, den orba katar e sune kai likiste katar lengo lio, ta ni phenen so likel katar e Devleko mui.

¹⁷ Ni chitilpe lenge ta phenen gia golenge kai den man joli: O Del phenda: Ka avel tumen pas, ta varekake kai si besno ande po lio phenen leke gia: Ni ka avel o bilachipe pe tumende.

O Jeremias del orba zurale

¹⁸ ¿Ko pinllarel e ezgode kai samo o Del llanel? ¿Ko dikhla ta asunda leke alava? ¿Ko thoda sama pe leke alava ta asunda len?

¹⁹ ¡E Devletar avel iek baro bursin! ¡Gava bursin si pase te perel po soro katar e bilache llene!

²⁰ Ni ka llaltar e joli e Devleki lligo ni ka cherel le, ta lligo ni ka cherel so thoda ande po lio te cherel, tumen ka acharen le mai angle.

E orba e Devleki pe poraukura kojamne

²¹ Me ni bichaldem gole profetanen, a von prastena, me ni diem lenchar orba, a von phende e poroka.

²² A te avilea manchar pe me ezgode gurudine, cherdea te asunel mo foro me alava, ta cherdea te irilpe katar po bilacho drom ta katar o bilachipe kai cherel.

²³ ¿Me sem Del samo kana sem pase? ¡Iok! ¡Me sem Del i duratar!

²⁴ O Del phenel: ¿Sai gurudol vareko pe iek than kai me ni ka dikhav le? ¿Ni pherav me o miloso ta e phuv?

²⁵ Me asundem so phende gola poraukura, phende poroka kojamni ande mo anav, ta phenena: Suno, suno dikhlem.

²⁶ ¿Gachin ios ka avel gaia ezgoda ando lio katar e poraukura kai porokin so inai chachipe, ta kai pookin o kojaipe katar lengo lio?

²⁷ ¿Ni mislinpe kai cheren te bristarelpe katar mo anav mo foro, lenge sunenchar kai phenen iek avereke gia sar bristraile katar mo anav purane cheres o Baal?

²⁸ O profeta kai ka dikhel iek suno, te phenel o suno, a golete kai ka avel mo alav, te phenel mo alav o chachuno. Inai iek ezgoda e char suki ta o lliu, gia phenel le o Del.

²⁹ ¿Ni phenel o Del kai leko alav sargo e iag ta sargo iek chokano kai phagel e barra?

³⁰ Goleke o Del phenel gia: Me ni sem e profetonenchar kai choren me alava iek averetar.

³¹ O Del phenel: Me ni sem e profetonenchar kai den orbe kai me ni phendem lenge te phenen.

³² O Del phenel: Me ni sem golenchar kai porokin sune kojamne, ta phenenlen, ta cheren te kojadol mo foro pala lengo kojaipe ta lenge orbe gugle, a me ni bichaldem len ta ni phendem lenge niso, ta nisavo lachipe ni cherde gale foroke, gia phenel le o Del.

Sar ka delpe orba katar e poroka e Devleki

³³ Ta kana ka puchel tut gava foro, o iek profeta, o iek popo ta ka phenel chuke: ¿Savi si e poroka e Devleki? Tu ka phene lenge: Ka mukav tumen, phenda o Del.

³⁴ Ta o profeta, o popo o foro kai phenela: Poroka e Devleki, me ka bichalav duk pe gua lleni ta pe leko cher.

³⁵ Gia ka phenel suako iek pe amaleke, ta suako iek pe phlaleke: ¿So dia anglal o Del, ta so phenda o Del?

³⁶ Ta nikada ios ka dentumen golli te phenen: Poroka e Devlei, soke suakoneko alav ka avel leke iek poroka, soke murisarden e alava katar o Del o llundo, katar o Del kai si le sa e zor, amaro Del.

³⁷ Gia ka phene e profetake: ¿So dia chuke anglal o Del ta so phenda o Del?

³⁸ A te phendan: Poroka e Devleki, goleke o Del phenel gia: Soke phendan o alav, Poroka e Devleki, a me phendem: Na phen: Poroka e Devleki,

³⁹ goleke, me ka bristarav man tumendar, ta ni ka aven ios angla amende ni tumen ni o foro kai diem tumare paponen,

⁴⁰ ka kusen tumen ostade ta ka avel pe tumende iek lallao kai ni ka bristaren nikada.