Jeremias 22 - Biblia ande chib Romani

Poroka katar e charura e Judaeke

¹ Gia phenda o Del: Lla kai o cher katar o charo e Judaeko, ta kote de gaia orba,

² ta phen gia: Asun o alav e Devleko, tu charo katar o Juda kai bese po trono katar o David, tu ta che sluge, ta cho foro kai del katar gala udara.

³ Gia phenda o Del: Cheren kris ta o cha chipe, ta braduin e llene kai si dukhado, katar gua kai dukhavel le, ta na kojaven ta na choren gole kai si katar aver phuv, ni e minonen bi dadenge ta ni e phivlien, ta na mundaren gole kai inai dosalo pe gava than.

⁴ Soke te kandea chachimaia gava alav, e charura kai besen po than e Davideko, ka den katar e udara gale foroke ande pe bordona ta upral pe pe gra ta lenchar lenge sluge ta lengo foro.

⁵ A e na asunde gala alava, phenel o Del, me jalem sovel isto pe mande, kai gava cher ka achel pusto.

⁶ Soke gia phenda o Del cheres o cher katar e charura e Judaeke: Tu san mange sargo o burdo Galaad, sargo o than mai vazdino katar Libano, a ka cherav te ache pusto, ta sargo e forura kai kote ni zivil niko.

⁷ Ka chinavav chuke e zatrania, suako iek ka anel pe ezgode te marelpe, ta ka chinen che sedrura esvirime ta ka chuden len ande iag.

⁸ Ta but llene ka nakhen pasa gava foro, ta ka phenen iek avereke: ¿Soke cherda gia o Del gale bare foroia?

⁹ Ta ka phendol lenge: Soke mukla o alav katar lengo Gazda o Del, ta blagosisarde avere delen ta radisarde lenge.

Iek orba e Jeremiaseke cheres o Salum Joacaz

¹⁰ Na rov pala gua kai mulo, ta te na avel chuke zalba letar, rov zurale pala gua kai llaltar, soke ni ka irilpe nikada ta ni ka dikhel pi phuv kote kai biandilo.

¹¹ Soke gia phenda o Del cheres o Salum chavo katar o Josias, charo katar o Juda, kai charoisarda po than katar o Josias leko dad ta kai likisto katar: Ni ka irilpe ios kate.

¹² Ta ka merel kote kai inllarde le phanglo, ta ni ka dikhel ios gaia phuv.

E orba kai phenel katar o Joakim

¹³ ¡Tesko goleke kai cherel po cher kojaimaia, ta cherel pe sobe bangimaia, ta thovel e llenen te radin leke llabe ta ni pochinel lenge so mol lengo rado!

¹⁴ Ta phenel: Ka vazdav mange iek cher baro, ta sobe kai del e balav andre, ta cherel lake penllerave ta avrial thovel leke kotora kastune katar o sedro ta makhel le ando lolo.

¹⁵ ¿Ka charoi soke truial tutar si o sedro? Cho dad, ¿Ni jala ta piela ta cherda o chachipe ta ondaka llela leke sukar?

¹⁶ Vou cherda kris e llenenge kai trubul len, e llenenge kai si proste, ta ondaka llela leke sukar. ¿Ni pinllarela man? Phenel o Del.

¹⁷ A che akha ta cho lio si samo te dobi tu, ta te mundare e llenen kai inai dosale, ta te thove ande nuzda ta te dukhave averen.

¹⁸ Goleke o Del phenda gia katar o Joakim chavo katar o Josias, char katar Juda: Te na phenel niko ando roipe pala le: ¡Ioi, phlalorrea! ¡Ioi phiorrie! Ta na phenen ande duk: ¡Ioi gazda! ¡Ioi glamno!

¹⁹ Ando limori magarchoko ka avel prajome, terrindo ka inllaren le avri katar e udara katar o Jerusalem ta ka chuden le.

E orba cheres o Jerusalem

²⁰ like po burdo o Libano ta molisao, ta te asundol cho avazi po Basan ta urkisar, karing suako rig, soke sa gola kai volin tut si zatrime.

²¹ Dia tuia orba kana llala chuke sukar, a tu phendan: Ni ka llav. Gia cherdan sar kana sana terno, ta nikada ni asundan mo avazi.

²² Sa che chobanonen ka arakhel len e balav, ta golen kai volin tut ka inllaren len phangle, ondaka ka avel chuke lallao ta ni ka llane so ka chere pala sa cho bilachipe

²³ Zivisardan ando Libano, cherdan cho kuibo pe sedrura. ¡Gia surale ka urki kana dukhal tut, dukha sargo iekhe diskiniake kana si te bianel!

E orba e Devleki e charoke o Jekonias

²⁴ Ande mo anav, phenel o Del, kai o Konias chavo katar o Joasim charo katar o Juda te avela vou angrusti ande mi nai pe mo va o chacho, i kotar ikanava tut.

²⁵ Ka dav tut ande va katar gola kai roden te mundaren tut, ta ande va katar gola kai dara te dikhen pe tute, ea, ande va katar o Nabukodonosor charo katar e Babilonia, ta ande va katar e kaldeura.

²⁶ Ka cherav ta lla phanglo tu ta chi dei kai bianda tut, ande aver phuv kote kai ni biandilan, ta kote ka mere.

²⁷ Ta kote kai von zelin sa pe liea te irinpe, ni ka irinpe.

O profeta del po alav

²⁸ ¿Si gava lleno o Konias iek piri chudini ta phagi? ¿Si iek ezgoda kai niko ni mangel la? ¿Soke avile chudine vou ta leko porodo, ta chudie len ande iek phuv kai ni pinllarena?

²⁹ ¡Phuv, phuv, phuv! Asun o alav e Devleko.

³⁰ Gia phenda o Del: Pisisaren so ka avelpe gale llenea kai inai le porodo, gava lleno kai ni iek ezgoda lachi ni cher ande po zivoto, soke niko katar leko porodo ni ka resel te besel po trono katar o David, ta ni ka charoil po Juda.