Jeremias 21 - Biblia ande chib Romani

Phendol savi duk ka nakhel o Jerusalem

¹ O alav e Devleko avilo kai o Jeremias, kana o charo o Sedekias bichalda lete e Pasure chavo katar o Malkias ta e popo o Sofonias chavo katar o Maasias, ta phenen leke gia:

² Puch akana e Devle cheres amende, soke o Nabukodonosor charo katar e Babilonia marelpe amenchar, sai avel kai o Del ka cherel amenchar prema sa e bare ezgode kai cherda, ta o gua ka irilpe amendar.

³ Ta o Jeremias phenda: Gia ka phenen e Sedekiaseke:

⁴ Gia phenda o Gazda o Del katar o Israel: Me boldav palpale e ezgode marimake kai inllaren ande tumare va, golenchar kai tumen maren tumen e charoia katar e Babilonia, ta e llenen e kaldeura kai si avri katar e zidura ta kai si truial tumendar, me ka chidav len po maskaral katar o foro.

⁵ Ka marav man tumenchar, ka vazdav surale mo va pe tumende jolinaia ta silnomaia.

⁶ Ta ka dukhavav e llenen katar gava foro ta ka meren e zivirinie dive ta e manusa katar iek bari muka.

⁷ O Del phenel kai mapalal, ka del kai o Sedekias charo katar o Juda, pe slugen, e foro ta e llenen kai ni ka mundarel len e muka, o jarni ta e bok ando foro, ande va katar o Nabukodonosor charo katar e Babilonia, ande va katar lenge dusmanura ta katar gola kai roden te mundaren len, ta vou ka mundarel len e jarniea, ni ka prostil len ta ni ka avel leke zalba lendar, ta i ka tristolpe pala lende.

⁸ Ta gale foroke ka phene: Gia phenda o Del: Angla tumende thovav iek drom katar o zivoto, ta iek drom e merimako.

⁹ Ko ka achel ande gava foro ka mundaren le e jarniea, bokhatar o pala e muka, a ko likela ta te llala pe rig katar e kaldeura kai si truial tumendar, ka zivil, ka avel prostime leko zivoto ta golea ka dobil.

¹⁰ Soke me dikhlem pe gava foro bilachimaia, a na lachimaia, gia phenel le o Del, ande va katar o charo katar e Babilonia ka avel dini, ta ka phabarel la.

Phendol so ka nakhel o charo katar o Juda

¹¹ Ta e llenenge kai si ando cher katar charo e Judaeko ka phene: Asunen o alav e Devleko:

¹² Porodo e Davideko, gia phenda o Del: Thiarinako cheren kris, ta braduin e llene kai si dukhado katar gua kai dukhavel le, te na likel mi joli sargo iag, ta te phabol ta te na avel ko te mundarel la, pala o bilachipe kai cheren.

Phendol kai o Jerusalem ka aven dukhado

¹³ Me vazdiniaivav pe tumende, kai zivin pe umalia ta pe barra katar e umal, phenel o Del, tumen kai phenen: ¿Ko ka vazdiniaol pe amende, ta ko ka del ande amare chera?

¹⁴ O Del phenel: Me ka dukhavav tumen prema e joli katar e ezgode kai cheren ta ka cherav te phabol iag ande lengo vos, ta ka phabarel sa so si truial letar.