Jeremias 20 - Biblia ande chib Romani

E poroka katar o Pasur, dusmano katar o Jeremias

¹ O popo Pasur chavo katar o Imer kai saia o mai breche ando cher e Devleko, asunda e Jeremiase kai porokila gala alava.

² Ta o Pasur chalada e bichoia e Jeremiase ta phangle le pasa o udar o baro katar o Benjamin pasa o cher e Devleko.

³ Nakhla iek llive ta o Pasur ikanda e Jeremiase katar o phandipe. Ondaka o Jeremias phenda leke: O Del ni thoda cho anav Pasur, cho anav thoda Magor Misabib.

⁴ Soke o Del phenda gia: Ka cherav te ave iek dar isto tu chuke ta i e llenenge kai volin tut, ta ka mundaren len che dusmanura ta ka dikhe le che akhenchar, ta sa e Judae ka dav le ande va katar o charo katar e Babilonia ta ka inllarel len phangle ande Babilonia ta ka mundarel len e jarniea.

⁵ Ta ka dav sa o barvalipe katar gava foro, sa lengo rado ta lenge ezgode kuch ta ka dav sa o barvalipe katar e charura katar o Juda ande va katar lenge dusmanura ta ka len sa lenge ezgode, ka istaren len ta ka inllaren len ande Babilonia.

⁶ A tu Pasur, ta sa chi familia ka llan phangle, ka de ande Babilonia ta kote ka mere, ta kote ka ave prajome tu, ta sa gola kai volin tut, gola kai tu phendan lenge e poroke kojamne.

O Jeremias phenel pe nuzde e Devleke

⁷ Devla, tu dian manchar orba volimaia, ta me asundem tut dragostimaia. Avilan mai zuralo mandar ta dobisardan. Suako llive kusen man, sa maren mandar espurnia,

⁸ Soke suako drom kai dav orba, cherav le zurale ta urkiu: ¡Silnope ta zatrania! Soke o alav e Devleko cherel te kusen man ta te maren mandar espurnia suako llive.

⁹ Ta phendem: Ni ka dav man golli ios letar, ta ni ka dav orba ios ande leko anav, a ande mo lio saia vareso kai phabola, sargo iek iag andre ande me kokala, mangava te terpiu le, a nasti cherdem le.

¹⁰ Soke asunava sar dena me orbe ta phenena: ¡E dar si pe suako rig! ¡Pukhaven, pukhaven le! Sa me amal dikhena dal ka dav man palpale. Sai avel kai ka kojadol phenena von, ta ka dobi le amen, ta ka ikana amari duk pe lete.

¹¹ A o Del si manchar sargo iek lleno baro ta silno, goleke, gola kai llan pala mande ka eskonban, ta ni ka dobin, ta ka aven thode ando baro lallao, soke ni ka llal lenge sukar, sa po zivoto ni ka llanen so te cheren ta ni ka bristarenpe nikada so nakhle.

¹² ¡Ioi Devla kai si tut sa e zor! tu zumave e llenen kai si chache, tu kai dikhe e mislura ta o lio, cher te dikhav sar dukhave len, soke ande che va muklem mi orba.

¹³ Llilaben e Devleke, blagosin e Devle, soke braduisarda o zivoto e chorreko katar e va e dusmanonenge,

¹⁴ Proketo te avel o llive kai biandilem, o llive kai mi dei bianda man te na avel blagosime.

¹⁵ Proketo te avel o lleno kai phenda me dake: Murus maladila che rromiake, ta dia le iek bari veselia.

¹⁶ Te avel gua lleno sargo e forura kai o Del zatrisarda ta ni diape palpale, daboida te asunel urkipe thiarinako ta kukipe ollivesea,

¹⁷ soke ni mundarda man ando lli me dako, ta mi dei te avilia mo limori, ta te achilia e thudea ostade.

¹⁸ ¿Soke likistem katar me dako lli? ¿Te dikhav o rado ta e duk? ¿Ta me llivesa te chinion ando lallao?