Jeremias 19 - Biblia ande chib Romani

E paramichi katar e piri phagi

¹ Gia phenda o Del: Lla ta chin iek piri kai cherel o lleno kai radil e chikaia, ta inllar tuia llenen phure katar o foro, ta llenen phure katar e popura,

² ta lla kai e umal katar o chavo katar o Ben Jinon kai si angla o udar pe rig katar likel o kham, ta kote ka phene so me ka phenav chuke.

³ Ka phene gia: Asunen o alav e Devleko, tumen e charura katar o Juda, ta tumen kai zivin ando Jerusalem. Gia phenel o Gazda o Del katar o Israel kai si le sa e zor: Me anav iek bari belava pe gava than, ta kogo ka asunel le ka basen lenge kan.

⁴ Soke mukle man, ta cherden te na pinllaren gava than, ta phabarde o taimano avere delenge kai von ni pinllarena ni von ta ni lenge dada, ni e charura katar o Juda, ta perade gava than e ratea katar e llene chache.

⁵ Ta cherde thana vazdine e Baaleke te phabaren pe minonen sargo kurbano isto e Baaleke, a me ni phendem lenge te cheren goia ezgoda, ni diem orba ta ni avila mange ni ando mislo.

⁶ Goleke ka aven llivesa, phenel o Del, kai gava than ni ka ikharen le ios Tofet, ni umal katar o Ben Jinon, soke ka ikhardol Umal katar o Mundaripe.

⁷ Ta ka muriu so mangen te cheren o Juda ta Jerusalem pe gava than, ka mundaren len e jarniea lenge dusmanura, ta ka peren ande va katar gola kai mangen te mundaren len, ta ka dav lengo man te jan le e chiriklia e milosoke ta e zivirinie dive katar e phuv.

⁸ Ta ka cherav te avel lenge dar ta te maren espurnia katar gaia phuv, kogo ka nakhel latar ka chudilpe ta ka maren espurnia katar lako phagipe.

⁹ Ta ka cherav te jan pe chaurrengo mas ta pe chorrengo ta suako iek ka jal o mas pe amaleko, pala e nuzda ta e belava kai ka cheren len te nakhen lenge dusmanura ta gola kai mangen te mundaren len.

¹⁰ Ondaka ka phage e piri angla e llene kai llan tuia

¹¹ ta ka phene lenge gia: Gia phenda o Del kai si le sa e zor: Gia ka dukhavav gale foro ta gale phuvia, sargo kana vareko phagel iek piri chikaki, kai nasti cherdol pale, ta ando Tofet ka aven prajome, soke ni ka avel aver than te prajon.

¹² Gia ka cherav pe gava than, phenel o Del, ta e llenenchar kai si kote, ka cherav lenchar gia sar cherdem ando foroia o Tofet.

¹³ E chera katar o Jerusalem ta e chera katar e charura katar Juda, ka aven sargo o Tofet, ka aven gado pala suako cher kai upral phabarde o taimano sa e cheraienge katar o miloso ta chudie e mol katar e dela avere phuvienge.

¹⁴ Ta irisailo o Jeremias katar o Tofet, kote kai o Del phendaia leke te inllarel e poroka, ta thodape pe porrne ande bar katar o cher e Devleko ta phenda sa e foroke:

¹⁵ Gia phenda o Del kai si le sa e zor: