Jeremias 18 - Biblia ande chib Romani

E chik ta o lleno kai cherel piria

¹ O Alav e Devleko avilo kai o Jeremias ta phenda:

² Uste ta lla kai o lleno kai radil e chikaia, ta kote ka cherav te asune me alava.

³ Ta llelem kai o cher katar o lleno kai radil e chikaia, ta vou radila po kolo.

⁴ Ta e piri kai vou cherela murisaili ande leko va, ta cherda latar aver piri, ta avila leke te cherel la mai sukar.

⁵ Ondaka o Del phenda mange gia:

⁶ O Del phenel: ¡Ioi Israel! ¿Sar nasti ka cherav me tumenchar gia sar cherel gava lleno kai radil e chikaia? Isto gia sen tumen ande me va.

⁷ Ande iek vreme sai dav pe forura ta pe charoine, te ikanav, te peravav ta te zatriv,

⁸ a gola forura te irilape katar po bilachipe, gua bilachipe kai me phendem letar, i me ka iriu man katar e duk kai mangava te dav len,

⁹ ta ande iek vreme ka dav orba e llenengi katar e charoina, te vasdiniaol o phagipe, ta te thodol e simicha ande phuv.

¹⁰ A te cherda o bilachipe angla me akha, ta ni asunel mo avazi, ka iriu man katar o lachipe kai mangava te cherav leke.

¹¹ Goleke, de orba suakone murusea katar o Juda ta e llenenchar kai zivin ando Jerusalem, ta phen lenge: Gia phenda o Del: Me chinavav tumenge e duk ta misliu man so ka cherav tumenge, irintumen suako iek katar po bilachipe, ta lacharen tumaro drom ta e ezgode kai cheren.

¹² A von phende: Ni ka thova sama, soke amen ka lla pala amare dela, ta suako iek amendar ka chera so phenel amenge amaro bilacho lio.

¹³ Goleke o Del phenda gia: Puchen akana e phuvien, ¿Ko asunda iek orba sargo gaia? But gado si so cherda e chei katar o Israel.

¹⁴ ¿A so, ni ka avel ios o iv katar o Libano pe barra katar e umalia? ¿Ni ka aven ios e paia sudre kai aven duratar katar aver phuvia?

¹⁵ A mo foro bristarda man, ta phabarde o taimano avere delenge, ta eskombaia pe pe droma pe droma e purane, ta ni phirel pe droma e lache,

¹⁶ ta thovel pi phuv ande zalba, ta te maren latar espurnia ostade, kogo ka nakhel latar ka chudilpe ta nasti ka pachan so dikhen.

¹⁷ Sargo balav katar o norte ka rispiu len angla lenge dusmanura, ka dav len e zea ta ni ka dikhen mo mui ando llive kai ka jasaon.

E orba sar te zatrin e profeta

¹⁸ Ta phende: Aven te dikha so ka chera e Jeremiaseke, soke o zakono ka avel suako llive e popoke, ta e orba e bizaieke, ta o alav e profetake. Aven te dukhava le ande orba, ta na thova leke sama pe so phenel.

O Jeremias molilpe

¹⁹ ¡Ioi Devla! Dik pe mande, ta asun e orbe katar gola kai marenpe manchar.

²⁰ ¿Pochindol o bilachipe po lachipe, te anaven mange iek limori? de tut golli kai thodem man angla tute te dav orba lachi pala lende, te duriavav lendar chi joli.

²¹ Goleke muk te meren bokhatar lenge minone, cher te fuladon pala o meripe ta te achen e diskinie bi ninonenchar ta phivlia, te mundaren lenge rromen, ta te mundaren e jarniea lenge ternen kana ka llan te marenpe.

²² Te asundol lengo roipe ande lenge chera, kana ka ane pe lende e boñikonen, soke anade iek limori te jasaivav, ta thode iek solo te achadon me porrne.

²³ A tu Devla, pinllare sa lenge e orbe kai von chinaven te mundaren man, na prostisar lengi dos, ta na kos lengo bilachipe angla tu, daboida te peren, cher le gia lenchar kana ka avel o vreme katar chi joliariko.