Jeremias 17 - Biblia ande chib Romani

O bilachipe ta e duk katar o Juda

¹ O bilachipe katar o Juda si pisime sastrune cheskaia kai pe iek rig si la o bar mai zuralo, pisime si po kotor barr katar leko lio ta pe singa katar leke altare,

² a lenge chaurre denpe golli katar lenge altare ta katar lenge slike katar e Asera, kai si pasa e bare kasta ta pe umalia vazdine,

³ pe burdura ta pe umalia. Sa cho barvalipe ka dav le te choren le pala o bilachipe katar che thana vazdine ande sa chi phuv.

⁴ Ta ka jasare sa e phuv kai diem tut, ta ka cherav te radi che dusmanonenge ande phuv kai ni pinllarea, soke pe mi joli phabardan iag kai ni ka merel nikada.

Aver orbe

⁵ Gia phenda o Del: Proketo o manus kai uzdilpe ando manus ta thovel pi zor ande aver manus, ta duriol leko lio katar o Del.

⁶ Gua lleno ka avel sargo e char suki po pusto, ta ni ka dikhel kana ka avel o lachipe, ta ka zivil ando sukipe katar o pusto, ande phuv kai si pusti ta kai ni zivil niko.

⁷ Blagosime o manus kai uzdilpe ando Del, ta kai leki vera si o Del.

⁸ Soke ka avel sargo o kas kai si thodo te bariol pasa o pai, ta pasa e len ka barion leke zile, ni ka daral kana ka avel o tatipe ta leke patra ka aven zelene, ta ando burs kai ni ka delpeke ni ka sukol, ta ni ka mukel te del septelie.

⁹ O lio so mai kojamno neko sa e ezgode, ta bilacho, ¿Ko ka pinllarel le?

¹⁰ Me o Del, kai dikhav andre ande mislura, kai zumavav e lie te dav suakone prema e cherel, prema e ezgode kai cherel.

¹¹ Sargo e perdis kai arakhel averenge arnorre, isto gia si e llene kai barvaon kojaimaia, ta po dopas katar po zivoto mukel sa ta mai angle dikhol kai si diliaol.

¹² Trono katar e zor, glamno sar kana saia mai anglal, si o than katar amaro santuario.

¹³ ¡Ioi Devla! ¡Tu san so aduricharel o Israel! kogo ka mukel tut ka achel ando lallao, gola kai ka durion tutar ka aven sargo anava pisime pe chisai, soke mukle e Devle, kai si o pai kai likel katar e phuv.

O Jeremias molilpe e Devleke

¹⁴ ¡Ioi Devla! sastar man ta ka avav sasto, braduisar man ta ka avav braduime, soke tu san so me blagosiv.

¹⁵ Von phenen mange: ¿Kaitalo o alav e Devleko? ¡Te cherdol isto akana!

¹⁶ A me ni llelem pala tute te cherav te aven dukhade, ta ni manglem te nakhen iek belava, tu llane le, sogo phendem, phendem le angla tute.

¹⁷ Te na ave mange iek dar, soke tu arakhe man ando llive bilacho.

¹⁸ Te achen ando lallao gola kai roden te maren man, a na te achav me ando lallao, te chudinpe von, a me te na chudiu man, an pe lende o llive bilacho, ta dukhav len dui droma mai but.

E orba katar o sabado

¹⁹ Gia phenda mange o Del: Lla ta thov tut po udar katar e chave katar o foro, kotar katar den ta liken e charura katar o Juda, ta thov tut pe sa e udara katar o Jerusalem,

²⁰ ta phen lenge gia: Asunen o alav e Devleko, charura katar o Juda ta sa o Juda ta sa e llene kai zivin ando Jerusalem kai den katar gala udara.

²¹ Gia phenda o Del: Arakhen tumaro zivoto ta na inllaren pharipe ando llive sabado, ta te nakhaven gua pharipe katar e udara katar o Jerusalem.

²² Ta na ikanen katar tumare chera pharipe ando llive sabado, ta na cheren ni iek rado. Blagosin o llive sabado, gia sar phendem tumare paponenge.

²³ A von ni asunde, ta ni thode sama, zuriarde po soro te na asunen, ta te na sikon.

²⁴ A o Del phenel: Te kandien man, ta ni nakhaven pharipe katar e udara katar gaia phuv ando llive sabado, ta te blagosina o llive sabado, ta te na cherden ni iek rado ande gua llive,

²⁵ ka den ande gava foro upral pe bordona ta pe gra e charura ta sudura kai besen po trono katar o David, von, lenge sudura, e murusa katar o Juda ta e llene kai zivin ando Jerusalem, ta ostade ande gava foro ka zivin llene.

²⁶ Ta ka aven katar e forura e Judaeke, truial katar o Jerusalem, katar e phuv e Benjamineki, katar e Sefala, katar e burdura katar o Negev, te den kurbano kai phabardol ta kurbano, ezgode dine ta taimano, ta ka anen kurbano blagosimako kai o cher e Devleko.

²⁷ A te na asunden man te blagosin o llive sabado, ta te nakhaden pharipe katar e udara katar o Jerusalem ando llive sabado, me ka cherav te fuliel iag pe tumare udara, ta ka zatriv e chera katar o Jerusalem ta ni ka merel e iag.