Jeremias 16 - Biblia ande chib Romani

O Del phenel so ka cherel o Jerusalem

¹ O Del phenda mange gia:

² Te na zini tut ta te na aven tut ni chorra ni chaurre pe gava than.

³ Soke gia phenda o Del katar e chaurre ta e chorra kai ka biandon pe gava than, ta katar lenge dea kai ka bianen len ta katar lenge dada kai ka cheren len ande gaia phuv:

⁴ Ka meren katar e muke dukhade, ni ka aven lenge ta ni ka prajon len, ka aven sargo llubri upral pe phuv, e bok ta o jarni ka mundaren len, ta lenge esnage ka jan len e chiriklia e milosoke ta e zivirinie dive e phuviake.

⁵ Soke gia phenda o Del: Na de ando cher zalosno, ta na rov, ta na de len zor, soke me liem mi pas katar gava foro, liem lendar mi zalba ta mo zao, gia phenel le o Del.

⁶ Ka meren ande gaia phuv bare ta i minone, ni ka prajon len ta ni ka roven lenge, ni ka randen po mas ta ni ka chinen pe bal pala lende,

⁷ Niko ni ka del len kotor marrno kana ka aven zalosne te den len zor pala o meripe, ta niko ni ka del len taso pai te lel lendar e duk pala po dad o pala pi dei.

⁸ Ta na de ande iek cher kai thode e zinia te bese lenchar ja ta te pie.

⁹ Soke gia phenda o Del kai si le sa e zor, o Del katar o Israel: Me ka cherav angla tumare akha ta ande tumare llivesa te achel suako avazi kai dragostilpe ta suako avazi veselo, ta suako avazi katar o murus ta katar e diskinia kai si zinime.

¹⁰ Ta kana ka phene lenge sa gala ezgode gale foroke, von ka phenen chuke: ¿Soke o Del phenel kai ka aven pe amende sa gala bilache ezgode? ¿Savo bilachipe gia baro cherdam? ¿Savo bilachipe cherdam ta savi si amari dos, kai cherdam amare Devleke amaro Gazda?

¹¹ Ondaka ka phene lenge gia: Soke tumare papura mukle man, gia phenel le o Del, ta llele pala e dela katar aver phuv, radisarde lenge, die changenchar angla lende, mukle man ta ni kandie so phenel mo zakono,

¹² a tumen cherden ios mai gore neko tumare papura, soke tumen llan suako iek pala so phenel tumenge tumaro bilacho lio, ta ni asunen man.

¹³ Goleke, me ka chudav tumen katar gaia phuv, ande aver phuv kai ni tumen ni tumare papura ni phinllaren, ta kote ka radin avere delenge orachaia ta ollivesea, soke ni ka avel mange zao tumendar.

¹⁴ A o Del phenel kai ka aven llivesa kai ni ka phendol ios: Ando anav e Devleko, kai cherda te liken katar o Ejipto e chave katar o Israel,

¹⁵ von ka phenen: Ando anav e Devleko, kai cherda te e chaven katar o Israel te liken katar o phuv katar o norte, ta katar sa e phuvia kai chudiaia len, ta ka iriu len kai lengi phuv, kai diem lenge paponen.

¹⁶ O Del phenel: Me bichalav but macharia ta ka istaren tumen, ta mapalal ka bichalav but llene kai istaren e zivirinie, ta ka istaren tumen pe sa e burdura ta pe sa e umalia, ta maskar o putardipe katar e pechine.

¹⁷ Soke me akha dikhen sa so cheren, ta ni gurudile mange, ta ni lengo bilachipe ni gurudilo angla me akha.

¹⁸ A mai anglal ka pochinav lenge dui droma pe lengo bilachipe, soke meliarde mi phuv e esnagenchar katar lenge dela, ta pherde mi phuv ande lengo gadope.

O Jeremias molilpe e Devleke

¹⁹ ¡Ioi Devla! tu san mo zido ta mi zor, ta san o than kai te gurudivav kana avel e duk, tute ka aven e forura katar suako rig e phuviaki ta ka phenen: Chachimaia sea ando kojaipe amare papura, ta ni mol niso, inai so te dobi lendar.

²⁰ ¿Ka cherel o manus dela vou peke? A gola inai dela.

O Del del anglal

²¹ Goleke akana ka sikavav tumen, ka cherav te pinllaren mo va ta mi zor, ta ka llanen kai me sem o Del.